بۇگىن شىمكەنت قالاسىنىڭ اكىمى مۇرات ايتەنوۆ العاشقى سايلاۋشىلار قاتارىندا بولىپ قالاداعى № 231 سايلاۋ ۋچاسكەسىنە بارىپ, داۋىس بەردى. ءوز تاڭداۋىن جاساعان شاھار باسشىسى ەل ازاماتتارى مەن بىرگە شىمكەنتتىكتەردە ازاماتتىق ۇستانىمى مەن بەلسەندىلىگىن تانىتىپ, سايلاۋعا جوعارى دەڭگەيدە قاتىساتىنىنا سەنىمدى ەكەنىن ايتتى.
«بۇل ساياسي ءىس-شارا – ەلىمىز ءۇشىن وتە ماڭىزدى. بۇل – بولاشاعىمىزدى تاڭداۋ. تۇرعىنداردىڭ جارقىن كەلەشەگىن ايقىندايتىن ءسات. قالا تۇرعىندارى بۇرىن وتكەن سايلاۋلاردا بەلسەندىلىك تانىتقان, بۇگىن دە جوعارى دەڭگەيدە قاتىسادى دەپ ويلايمىن», - دەدى م.ايتەنوۆ.
بۇگىندە شىمكەنتتە 617 مىڭنان استام سايلاۋشى بار. جالپى قالا اۋماعىندا 312 سايلاۋ ۋچاسكەسى جۇمىس ىستەۋدە.