تۇركى كەڭەسىنىڭ العاشقى باس حاتشىسى حاليل اقىنجى «وتكەننىڭ ەنشىسىندەگى داۋدىڭ ءبارى ءبىزدىڭ تاريحي سانامىزدىڭ تەرەڭ تۇكپىرىندە قالۋى كەرەك» دەپ سانايدى.
بۇل تۋرالى ول نۇر-سۇلتان قالاسىندا حالىقارالىق تۇركى اكادەمياسى وتكىزگەن «تۇركى الەمى: تاريحي-مادەني مۇرا» اتتى حالىقارالىق كونفەرەنتسيادا سويلەگەن سوزىندە ايتتى.
«الەم تاريحىن تۇركى حالىقتارىنسىز ەلەستەتۋ مۇمكىن ەمەس. جاھاندىق دەڭگەيدەگى عىلىمي جەتىستىكتەر مەن مادەني قۇندىلىقتاردىڭ كوپشىلىگى قىتايدان جەرورتا تەڭىزىنە دەيىنگى كەڭىستىكتى الىپ جاتقان ءبىزدىڭ الىپ قۇرلىعىمىزعا تيەسىلى. سونىمەن قاتار, بۇل ايماقتىڭ ەڭ ءىرى قاقتىعىستار الاڭىنا اينالعان دا كەزدەرى بولدى...
وتكەننىڭ ەنشىسىندەگى داۋدىڭ ءبارى ءبىزدىڭ تاريحي سانامىزدىڭ تەرەڭ تۇكپىرىندە قالۋى كەرەك جانە كەلەشەگىمىزدىڭ كەمەلدىگى ءۇشىن ودان ساباق الا بىلۋگە ءتيىسپىز.
بۇگىندە بۇۇ جانە بارشا الەمدىك قاۋىمداستىق مويىنداعان تۇركى مەملەكەتتەرىنىڭ تاۋەلسىزدىگى توقتاۋسىز نىعايىپ كەلەدى. بۇگىنگى كونفەرەنتسيا سياقتى عىلىمي فورۋمدار ءبىزدىڭ ەلدەرىمىزدىڭ جانە كورشىلەس مەملەكەتتەردىڭ ىنتىماقتاستىعىن نىعايتا تۇسۋگە ىقپال ەتەدى.
سونىمەن قاتار, بۇگىن تانىستىرىلعان تۇركى اكادەمياسى تۇپنۇسقا مالىمەتتەرگە سۇيەنە وتىرىپ ىجداھاتتىلىقپەن ازىرلەپ شىققان تۇركى الەمىنىڭ اتلاسى بۇل باعىتتاعى العاشقى بىرەگەي باسىلىم بولىپ سانالادى. ەندىگى جەردە بۇل اتلاس ءبىزدىڭ ءبىرىنشى بولىپ جۇگىنەتىن سەنىمدى تاريحي دەرەككوزگە اينالادى دەپ سەنەمىن. تۇركى اكادەمياسىن وسى جەتىستىگىمەن شىن جۇرەكتەن قۇتتىقتايمىن» دەدى ول ءوز بايانداماسىندا.
ايتا كەتۋ كەرەك, ونلاين-وففلاين رەجيمدە وتكەن اتالعان شاراعا 20-دان استام مەملەكەتتەن عالىمدار مەن ساراپشىلار, سونداي-اق, تۇركى ەلدەرىنىڭ بىرقاتار رەسمي تۇلعالارى, حالىقارالىق ۇيىمداردىڭ وكىلدەرى قاتىستى.