ۇكىمەت قاۋلىسىمەن ەكولوگيا, گەولوگيا جانە تابيعي رەسۋرستار مينيسترلىگىنىڭ قاراماعىندا بالىق شارۋاشىلىعى كوميتەتى قۇرىلدى, دەپ حابارلايدى Egemen.ءkz تىلشىسى مينيسترلىكتىڭ تەلەگرام كانالىنا سىلتەمە جاساپ.
سالانىڭ جەكە ۆەدومستۆوعا بىرىكتىرىلۋى جاقىندا قابىلدانعان بالىق شارۋاشىلىعىن دامىتۋدىڭ 2030 جىلعا دەيىنگى مەملەكەتتىك باعدارلاماسىن ءتيىمدى جۇزەگە اسىرۋعا, بالىق ءوسىرۋ, تۇتىنۋ جانە ەكسپورت كولەمىن جوسپارعا ساي ارتتىرۋعا مۇمكىندىك بەرەدى. مەملەكەت باسشىسى 2020 جىلدىڭ قىركۇيەك ايىنداعى جولداۋىندا قازاقستاننىڭ بالىق شارۋاشىلىعىنداعى الەۋەتى زور ەكەنىن ەسكەرە وتىرىپ, ونى دامىتۋعا اسا ءمان بەرۋ قاجەتتىگىن ايتقان.ەسكە سالايىق, ەلىمىزدە اۋىل شارۋاشىلىعى مينيسترلىگى قۇرامىندا بولعان بالىق شارۋاشىلىعى كوميتەتى 2014 جىلى تاراتىلعان. ودان بەرى بالىق رەسۋرستارىن قورعاۋ, ءتيىمدى پايدالانۋ جانە كوبەيتۋ سالاسىنداعى مەملەكەتتىك ساياساتتى ەكولوگيا مينيسترلىگىنىڭ ورمان شارۋاشىلىعى جانە جانۋارلار الەمى كوميتەتى جۇرگىزىپ كەلەدى. سالاعا قاتىستى مىندەتتەردىڭ كوميتەت پەن جەرگىلىكتى اتقارۋشى ورگانداردىڭ جانە بالىق شارۋاشىلىعىنداعى ءوزىن ءوزى باسقارۋ سۋبەكتىلەرىنىڭ اراسىندا ءبولىنۋى ورتالىقتاندىرىلعان تۇردە ءتيىمدى جۇمىس ىستەۋگە كەدەرگى كەلتىرەدى.ال جۇمىستى جۇيەلى تۇردە جۇرگىزۋ ارقىلى مەملەكەتتىك باعدارلامادا كورسەتىلگەندەي سۋ رەسۋرستارىنداعى بالىق ءوسىرۋ كولەمىن 600 مىڭ تونناعا جەتكىزۋگە بولادى. بالىق ەكسپورتىن 300 مىڭ تونناعا دەيىن ارتتىرۋ جوسپارى دا بار. ول ءۇشىن 545 جاڭا بالىق شارۋاشىلىعى قۇرىلىپ, 323 شارۋاشىلىق تولىق جوبالىق قۋاتىنا شىعادى.قازىرگى ۋاقىتتا جاڭا كوميتەتتىڭ الدىندا مەملەكەتتىك باعدارلامانىڭ جۇزەگە اسۋىنا جول اشاتىن سالانى مەملەكەتتىك قولداۋ اياسىن كەڭەيتۋ, زاڭنامانى جەتىلدىرۋ, بالىق جەمى ءوندىرىسىن جولعا قويۋ, كادرلىق قامتاماسىز ەتۋ جۇمىستارىن اتقارۋ مىندەتتەرى تۇر.