وتكەن جىل وتاندىق كاسىپكەرلەرگە سىناق كەزەڭى بولعان-دى. مەملەكەت تاراپىنان ولارعا بارىنشا قولداۋ كورسەتىلدى. ەل پرەزيدەنتىنىڭ تىكەلەي تاپسىرماسىمەن قولعا الىنعان قولداۋ شارالارى ءوز جەمىسىن بەردى دە.
كوروناۆيرۋستىڭ ەل اۋماعىندا جەدەل تارالۋىنا بايلانىستى 2020 جىلعى 15 ناۋرىزدا مەملەكەت باسشىسى رەسپۋبليكادا توتەنشە جاعداي ەنگىزۋ تۋرالى جارلىققا قول قويدى. ىلە ەكونوميكانى تۇراقتاندىرۋ جونىندەگى شارالار قابىلداندى.
ۇلتتىق ەكونوميكا مينيسترلىگىنىڭ رەسمي مالىمەتتەرىنە سۇيەنسەك, 2020 جىلعى 16 ناۋرىز – 15 ماۋسىم ارالىعىندا ەكىنشى دەڭگەيلى بانكتەردەن نەسيە العان 12,5 مىڭ شاعىن جانە ورتا بيزنەس سۋبەكتىسىنىڭ 165 ملرد تەڭگە كولەمىندەگى كرەديتىن تولەۋ مەرزىمى كەيىنگە قالدىرىلدى. بۇل جەڭىلدىكتى بانكتەردەن نەسيە العان 30 مىڭ سۋبەكتىنىڭ شامامەن 40 پايىزدان استامى پايدالاندى.
ەلدەگى جاعداي ەسكەرىلە وتىرىپ, «بيزنەستىڭ جول كارتاسى – 2025» باعدارلاماسىنداعى سالالىق شەكتەۋلەر الىنىپ تاستالدى. ءسويتىپ كەز كەلگەن شاعىن جانە ورتا بيزنەس سۋبەكتىسى باعدارلاماعا قاتىسىپ, جەڭىلدەتىلگەن قارجىلاندىرۋعا قول جەتكىزۋگە مۇمكىندىك الدى. ءبىر كاسىپكەرگە بەرىلەتىن نەسيەلىك قولداۋ مولشەرى 7 ملرد تەڭگەگە دەيىن ۇلعايتىلدى. اينالىم قاراجاتىن تولىقتىرۋدى قارجىلاندىرۋ 500 ملن تەڭگەگە دەيىن كەڭەيدى. سونداي-اق شاعىن كاسىپكەرلىك سۋبەكتىلەرىنە شاعىن نەسيە بەرۋدىڭ جاڭا قۇرالى ەنگىزىلدى. كەپىلدىك بەرۋ قۇرالى بويىنشا سوما 1 ملرد تەڭگەگە دەيىن ۇلعايتىلدى.
2020 جىلعى 20 جەلتوقسانداعى جاعدايعا سايكەس, «بيزنەستىڭ جول كارتاسى – 2025» باعدارلاماسى اياسىندا سۋبسيديالاۋ قۇرالى بويىنشا 358 ملرد تەڭگەنىڭ 3 227 جوباسى, كەپىلدىك بەرۋ قۇرالى بويىنشا 237 ملرد تەڭگەنىڭ 5 689 جوباسىنا قول قويىلعان. سونداي-اق باعدارلاما شەڭبەرىندە ەكونوميكانىڭ زارداپ شەككەن سەكتورلارىندا 12 اي كەزەڭىندە شاعىن جانە ورتا بيزنەستىڭ بارلىق قولدانىستاعى كرەديتتەرى بويىنشا جىلدىق 6 پايىزعا دەيىنگى پايىزدىق مولشەرلەمەلەردى سۋبسيديالاۋ كوزدەلگەن.
2021 جىلدىڭ سوڭىنا دەيىن 800 ملرد تەڭگەگە 8 پايىزدىق مولشەرلەمە بويىنشا شاعىن جانە ورتا بيزنەستى جەڭىلدىكپەن نەسيەلەۋ باعدارلاماسى جۇمىس ىستەيدى. 2020 جىلعى 20 جەلتوقسانداعى جاعداي بويىنشا باعدارلاما اياسىندا 492 ملرد تەڭگەگە 4 962 قارىز بەرىلگەن.
ۇلتتىق ەكونوميكا مينيسترلىگى پاندەمياعا بايلانىستى قالىپتاسقان جاعدايدى ەسكەرە وتىرىپ, «قاراپايىم زاتتار ەكونوميكاسى» باعدارلاماسى بويىنشا كرەديتتەۋدىڭ جالپى كولەمى 400 ملرد تەڭگەدەن 1 ترلن تەڭگەگە دەيىن ۇلعايعانىن ايتادى. 2020 جىلعى 20 جەلتوقسانداعى جاعداي بويىنشا باعدارلاما اياسىندا 462 ملرد تەڭگەگە 2 038 جوبا ماقۇلدانىپ, قارجىلاندىرىلعان.
سونىمەن قاتار پاندەمياعا بايلانىستى سالىقتىق جەڭىلدىكتەر دە جاسالدى.اتاپ ايتقاندا, 2020 جىلدىڭ سوڭىنا دەيىن ءىرى ساۋدا نىساندارى, ساۋدا ويىن-ساۋىق ورتالىقتارى, كينوزالدار, تەاترلار, كورمەلەر جانە سپورت نىساندارى م ۇلىك سالىعىن تولەمەيتىن بولدى.
سالىق سالۋدىڭ جالپىعا بىردەي بەلگىلەنگەن تارتىبىمەن جۇمىس ىستەيتىن جەكە كاسىپكەرلەر دە جىل سوڭىنا دەيىن جەكە تابىس سالىعىنان بوساتىلدى. اگروونەركاسىپتىك كەشەندى قولداۋ ماقساتىندا ءىرى قارا مال مەن اسىل تۇقىمدى بالاپانداردى قامتيتىن بيولوگيالىق اكتيۆتەرىنىڭ يمپورتىنا قوسىمشا قۇن سالىعى سالىنبايتىن بولدى. سونىمەن قاتار اۋىل شارۋاشىلىعى ءونىمىن وندىرۋشىلەر اۋىل شارۋاشىلىعى ماقساتىنداعى جەرگە جەر سالىعىن تولەۋدەن بوساتىلدى.
بۇدان بولەك, باعانىڭ ءوسۋىن تەجەۋ ءۇشىن الەۋمەتتىك ماڭىزى بار ازىق-ت ۇلىك تاۋارلارى ءۇشىن قوسىمشا قۇن سالىعىنىڭ مولشەرلەمەسى 2020 جىلدىڭ 1 قازانىنا دەيىن 12 پايىزدان 8 پايىزعا دەيىن تومەندەتىلدى. قوعامدىق تاماقتانۋ, قوناقۇي جانە تۋريستىك قىزمەت سالالارىندا جۇمىس ىستەيتىن سالىق تولەۋشىلەردى جىل سوڭىنا دەيىن م ۇلىك سالىعىنان بوساتۋ بەلگىلەندى. قازاقستان رەسپۋبليكاسىنىڭ اۋماعىندا بەنزين, ديزەل وتىنى بويىنشا اكتسيزدەلەتىن تاۋار وندىرۋشىلەر اكتسيز تولەۋدەن بوساتىلدى.
سالىقتىق اكىمشىلەندىرۋ شارالارى دا قابىلداندى. سونىڭ ناتيجەسىندە 2020 جىلعى 1 ماۋسىمعا دەيىن شاعىن جانە ورتا بيزنەس سۋبەكتىلەرى ءۇشىن بارلىق سالىقتار مەن بيۋدجەتكە تولەنەتىن مىندەتتى تولەمدەردى جانە الەۋمەتتىك جارنالاردى (جەكە تابىس سالىعى, الەۋمەتتىك سالىق, قىزمەتكەر ءۇشىن الەۋمەتتىك جانە مەديتسينالىق ساقتاندىرۋ) تولەۋ, سونداي-اق سالىقتىق, كەدەندىك جانە الەۋمەتتىك تولەمدەر بويىنشا بەرەشەكتى ماجبۇرلەپ ءوندىرىپ الۋ كەيىنگە قالدىرىلدى. بيزنەسكە فيسكالدىق قىسىمدى تومەندەتۋ ماقساتىندا توتەنشە جاعداي كەزەڭىندە سالىقتىق تەكسەرۋلەر توقتاتىلدى.
ميكرو, شاعىن, ورتا بيزنەس سۋبەكتىلەرى ءۇشىن 2020 جىلعى 1 ساۋىردەن باستاپ 1 قازانعا دەيىن, ءىرى بيزنەس سۋبەكتىلەرى ءۇشىن 1 شىلدەگە دەيىن ەڭبەكاقى تولەۋ قورىنان سالىقتىڭ جانە باسقا دا مىندەتتى تولەمدەردىڭ نولدىك مولشەرلەمەلەرى بەلگىلەندى.
ۇشۋدى توقتاتا تۇرۋ كەزەڭىندە ينفراقۇرىلىمدى قولداۋ جانە جۇمىس ورىندارىن ساقتاۋ ماقساتىندا بارلىق اۋەجايلار اعىمداعى جىلعى 1 ساۋىردەن 1 قازانعا دەيىن م ۇلىك سالىعىنان بوساتىلدى. اۋە كەمەلەرىنىڭ ليزينگ مامىلەلەرىنە تەحنيكالىق قىزمەت كورسەتۋ جانە زاڭدىق سۇيەمەلدەۋ بويىنشا رەزيدەنت ەمەستەر ءۇشىن قوسىلعان قۇن سالىعىن تولەۋدى جىل سوڭىنا دەيىن كەيىنگە قالدىرۋ ۇسىنىلدى.
توتەنشە جاعدايدىڭ ەنگىزىلۋىنە بايلانىستى جۇمىس كولەمىنىڭ تومەندەۋىن ەسكەرە وتىرىپ, جەكە پراكتيكامەن اينالىساتىن ادامدار (نوتاريۋستار, ادۆوكاتتار, سوت ورىنداۋشىلارى, مەدياتورلار) اعىمداعى جىلعى 1 قازانعا دەيىن م ۇلىك سالىعىنان بوساتىلدى. مەديتسينا قىزمەتكەرلەرىن قولداۋ ماقساتىندا ەپيدەمياعا قارسى ءىس-شارالارعا تارتىلعان قىزمەتكەرلەرگە ەڭبەكاقى تولەۋ قورىنان بارلىق سالىقتار مەن الەۋمەتتىك تولەمدەردەن ۇستەمەاقىلار الىنىپ تاستالدى.
سالىق تولەۋشىلەرگە ىڭعايلى بولۋ ءۇشىن 2019 جىلعى مىندەتتەمەلەر بويىنشا سالىق ەسەپتىلىگى نىساندارىن ۇسىنۋ مەرزىمى 2020 جىلعى 31 ناۋرىزدان 2020 جىلعى 31 مامىرعا اۋىستىرىلدى.
2020 جىلعى 1 ماۋسىمنان 2020 جىلدىڭ سوڭىنا دەيىنگى كەزەڭدە تاۋ-كەن مەتاللۋرگيا كەشەنى كاسىپورىندارى ءۇشىن قوسىمشا قۇن سالىعىن اۆتوماتتى تۇردە قايتارۋ (تەكسەرۋسىز قايتارۋ) مولشەرى 70 پايىزدان 80 پايىزعا دەيىن ۇلعايتىلدى. تاۋ-كەن مەتاللۋرگيا كەشەنىنىڭ كاسىپورىندارى ءۇشىن كورپوراتيۆتىك تابىس سالىعى بويىنشا اۆانستىق تولەمدەردىڭ 33 پايىزىن 2020 جىلدىڭ ەكىنشى جانە ءۇشىنشى توقسانىنان 2021 جىلعى 10 ساۋىرگە اۋىستىرۋ كوزدەلگەن.
ازاماتتىق اۆياتسيا سالاسىنا ەكونوميكانىڭ ەڭ كوپ زارداپ شەككەن سەكتورلارىنىڭ ءبىرى رەتىندە سالىقتىق جەڭىلدىكتەر بەرىلدى. دالىرەك ايتساق, 2020 جىلدىڭ سوڭىنا دەيىن ۇشاقتارعا قوسالقى بولشەكتەر يمپورتىنا قوسىمشا قۇن سالىعى الىنىپ تاستالدى. 2020 جىلدىڭ سوڭىنا دەيىن اۋەجايلاردىڭ جەر سالىعىن جانە جەر ۋچاسكەلەرىن پايدالانۋ تولەماقىسى جويىلدى.
تۇتاستاي العاندا, اتالعان شارالاردى قابىلداۋ اۋەجايلاردىڭ ينفراقۇرىلىمىن قولداۋعا, جۇمىس ورنىن ساقتاۋعا جانە ەكونوميكالىق ءوسۋدى قالپىنا كەلتىرۋگە باعىتتالدى.
دەر كەزىندە جاسالعان قادامداردىڭ ءتيىمدى بولعانىنا كۋا بولىپ وتىرمىز. قابىلدانعان شارالاردىڭ ناتيجەسىندە بيزنەس سۋبەكتىلەرى ايتارلىقتاي ۇلكەن شىعىنعا ۇشىراماي, نەگىزگى ءوسىمدى ساقتاپ قالا الدى. بۇل كاسىپكەرلەردىڭ مەملەكەت قولداۋىن ناقتى سەزىنگەن كەزەڭ رەتىندە ەستە قالدى.