بۇگىن حالىقارالىق تۇركى اكادەمياسى «مۇستافا شوقاي جانە تۇركىستان يدەياسى» اتتى حالىقارالىق ونلاين-بەينەكونفەرەنتسيا وتكىزدى. القالى جيىن تۇركى الەمىنىڭ كورنەكتى قوعام جانە مەملەكەت قايراتكەرى, الاش ارىسى, تۇركىستان اۆتونومياسىنىڭ جەتەكشىسى مۇستافا شوقايدىڭ 130 جىلدىعىنا وراي ۇيىمداستىرىلدى, دەپ حابارلايدى Egemen.kz
ونلاين فورماتتا وتكەن باسقوسۋعا حالىقارالىق تۇركى اكادەمياسىنىڭ پرەزيدەنتى دارحان قىدىرالى, مەديسون ۋنيۆەرسيتەتىنىڭ پروفەسسورى تيمۋر كوجاوعلى (اقش), بەلگىلى الاشتانۋشى عالىم, پروفەسسور, اكادەميك مامبەت قويگەلدى, ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى زيابەك قابىلدينوۆ, تاتارستان عىلىم اكادەمياسى جانىنداعى تاتار ەنتسيكلوپەدياسى جانە ايماقتانۋ ينستيتۋتىنىڭ ديرەكتورى گيليازوۆ يسكاندەر, وزبەكستان عىلىم اكادەمياسى تاريح ينستيتۋتىنىڭ ءبولىم مەڭگەرۋشىسى, پروفەسسور رادجابوۆ كاحرامون, نازارباەۆ ۋنيۆەرسيتەتىنىڭ پروفەسسورى يۋلاي شاميلوگلۋ, قورقىت اتا اتىنداعى قىزىلوردا مەملەكەتتىك ۋنيۆەرسيتەتى, «مۇستافا شوقايتانۋ» عىلىمي-زەرتتەۋ ورتالىعىنىڭ عىلىمي جەتەكشىسى ابدىجالەل باكىر, ش. ءۋاليحانوۆ اتىنداعى تاريح جانە ەتنولوگيا ينستيتۋتى دۇنيەجۇزى تاريحى ءبولىمىنىڭ مەڭگەرۋشىسى, پروفەسسور گۇلجاۋھار كوكەباەۆا, سونىمەن قاتار اقش, قازاقستان, وزبەكستان, تاتارستان جانە تۇركيا ەلدەرىنەن تانىمال شوقايتانۋشى عالىمدار مەن بەلگىلى قوعام قايراتكەرلەرى قاتىسىپ, مازمۇندى باياندامالار جاسادى.
جيىندى جۇرگىزىپ وتىرعان اكادەميا باسشىسى دارحان قىدىرالى م.شوقايدىڭ 130 جىلدىعى ونىڭ ءوزى ارمانداعان تۇركى مەملەكەتتەرى تاۋەلسىزدىگىنىڭ 30 جىلدىعىنا تۇسپا-تۇس كەلىپ وتىرعانىن اتاپ ءوتتى.