بۇقتىرما سۋ قويماسىنداعى وتكەلدىڭ جايى كۇرمەۋى شەشىلمەيتىن ماسەلەگە اينالىپ, جىلدار بويى كۇرشىم, مارقا, ۇلكەن نارىن ءوڭىرى حالقىنىڭ وبلىس ورتالىعىمەن قاتىناسۋىن قيىنداتىپ كەلە جاتقان ەدى.
كەشەگى كەڭەس داۋىرىندە ەرتىس وزەنى – بۇقتىرما سۋ قويماسى ارقىلى وتكەل قىزمەتىن اتقارىپ تۇرعان «ەرتىس», «ەنيسەي» اتتى ەكى ۇلكەن پاروم جارتى عاسىرعا جۋىق جوندەۋ كورمەي پايدالانىلعاندىقتان ابدەن ەسكىرىپ, جول پروكۋراتۋراسى تاراپىنان جۇزۋىنە تىيىم سالىنعان بولاتىن.
بۇقتىرما سۋ قويماسىنداعى وتكەلدىڭ جايى كۇرمەۋى شەشىلمەيتىن ماسەلەگە اينالىپ, جىلدار بويى كۇرشىم, مارقا, ۇلكەن نارىن ءوڭىرى حالقىنىڭ وبلىس ورتالىعىمەن قاتىناسۋىن قيىنداتىپ كەلە جاتقان ەدى.
كەشەگى كەڭەس داۋىرىندە ەرتىس وزەنى – بۇقتىرما سۋ قويماسى ارقىلى وتكەل قىزمەتىن اتقارىپ تۇرعان «ەرتىس», «ەنيسەي» اتتى ەكى ۇلكەن پاروم جارتى عاسىرعا جۋىق جوندەۋ كورمەي پايدالانىلعاندىقتان ابدەن ەسكىرىپ, جول پروكۋراتۋراسى تاراپىنان جۇزۋىنە تىيىم سالىنعان بولاتىن. ولاردىڭ ورنىنا كومىر-قۇم سياقتى سۋسىمالدى ماتەريالدار تاسىمالداۋعا ارنالعان تىركەمەلى «ساماي» مەن «سۇڭقار» اتتى شاعىن ەكى بارجا كەلگەن ەدى. مەنشىك يەلىگىندەگى شاعىن پارومدار جەل كوتەرىلسە, قابىرشىق مۇز تۇسسە, جۇرە المايدى. ونداي كەزدە وسكەمەنگە تۋرا جول جابىلاتىن. ەكى جاعادا ۋلاپ-شۋلاپ قالعان حالىقتىڭ جاعدايىن ءتۇسىنۋ قيىن ەمەس. اينالما جول زىريان, زايسان قالالارىن باسىپ وتەتىندىكتەن, وبلىس ورتالىعى ءتىپتى الىستادى. جول شىعىنى ەسەلەپ ارتىپ, قانشاما ۋاقىت زايا كەتەتىن بولدى. ءوزى بي, ءوزى قوجا مەنشىك يەلەرى «قاشان جۇرەم, قاشان توقتايمىن ءوزىم بىلەمىن» دەپ كەرگىدى, قالايدا پايدا تابۋ ءۇشىن تاسىمال قۇنىن ءوسىردى. نەشە جىل بويى, امال جوق, ءوڭىر حالقى وعان دا كوندى. جىعىلعانعا جۇدىرىق دەگەندەي, «ىشتەن شىققان» تاكسيستەر جول اقىسىن اسىرىپ, 220 شاقىرىمدىق وسكەمەنگە دەيىن 5000 تەڭگەدەن «تاكسا» قويدى. تاۋاردىڭ, تاماقتىڭ, قۇرىلىس ماتەريالدارىنىڭ باعاسى ەرىكسىز-ىرىقسىز ايعا شاپتى.
ءسويتىپ جۇرگەندە, جاقىندا ەلدىڭ شەتىندەگى, جەلدىڭ وتىندەگى حالىقتىڭ كوزى اشىلدى.
وبلىس اكىمى ب.ساپارباەۆتىڭ پارمەندى كومەگىمەن ديزەلدى «ەنيسەي» ەلەكتروحودى كوممۋنالدىق مەنشىككە ءوتىپ, وبلىستىق بيۋدجەتتەن قارجى ءبولىنىپ, كۇردەلى جوندەۋدەن وتكەن سوڭ «كۇرشىم» دەپ اتى قازاقشالانىپ, قايتا پايدالانۋعا بەرىلدى. قازىر «قىزىل تۋ» پاروم وتكەلىنىڭ بارلىق ماسەلەسىمەن اينالىساتىن «وبلشىعىسجول» مەكەمەسى بازاسىندا جەكە جاۋاپكەرشىلىگى شەكتەۋلى سەرىكتەستىگى قۇرىلدى.
«كۇرشىم» پارومىنىڭ ىسكە قوسىلۋىنا وراي سالتاناتتى شارا وتكىزىلدى. ايتۋلى شارادا ءوڭىر باسشىسى بەردىبەك ساپارباەۆ كۇرشىمدىكتەردى جاعىمدى جاڭالىقپەن قۇتتىقتاپ, اۋداننىڭ ءوركەندەي تۇسۋىنە تىلەك ءبىلدىردى. پارومنىڭ جەكە مەنشىكتەن مەملەكەت مەنشىگىنە ءوتۋى بىرىككەن اراب امىرلىكتەرىنەن كەلگەن ىسكەرلىك سەرىكتەستىكتەردىڭ دەمەۋشىلىگىنىڭ ارقاسىندا, 80 ملن. تەڭگە گرانت ءبولىنىپ, جۇزەگە اسقاندىعىن اتاپ, ولارعا ريزاشىلىعىن ءبىلدىردى.
60 جەڭىل كولىك سىياتىن, 185 توننا جۇك كوتەرەتىن پارومنىڭ 6 بالدىق شتورمعا, قولايسىز اۋا رايىنا دا توتەپ بەرەتىندىگى قاتىناستىڭ قاۋىپسىزدىگىنە كەپىل بولماق. ەكى جاعاداعى ۇزىن-سونار كەزەك كەلمەسكە كەتتى.
سونىمەن, تۋرا جولدىڭ كولىك قاتىناسى رەتكە كەلتىرىلدى. تاسىمال باعاسىنىڭ تومەندەۋى دە قۋانتادى. پاروم بەكىتىلگەن كەستە بويىنشا تاڭعى ساعات 6-دان كەشكى ساعات 9-عا دەيىن كۇنىنە 16 رەيس جاسايدى. ەلەكتروحود قالىڭدىعى 25 سانتيمەترگە دەيىنگى مۇزدى جارىپ جۇرە الادى.
– ءسات ساپار ساعان, «كۇرشىم» پارومى! – دەيدى بۇگىندە اۋدان حالقى اسقان ريزاشىلىقپەن.
كۇرشىم, مارقاكول ءوڭىرىنىڭ تۇرعىندارى اتىنان:
ە.اقتەكەنوۆ, ن.قايىروۆ, ن.قاليتوۆا, س.ىسقاقوۆ, ا.شالاباەۆ.
شىعىس قازاقستان وبلىسى.