كورنەكتى جازۋشى دۋلات يسابەكوۆتىڭ پەساسى نەگىزىندە تۇسىرىلگەن «اپكە» تەلەسەريالىنىڭ العاشقى بولىمدەرى «قازاقستان» ۇلتتىق تەلەارناسىندا ءجۇرىپ جاتىر. جۋىردا وسى تەلەحيكايانىڭ تۇساۋكەسەر راسىمىنە وراي بريفينگ ۇيىمداستىرىلدى.
كورنەكتى جازۋشى دۋلات يسابەكوۆتىڭ پەساسى نەگىزىندە تۇسىرىلگەن «اپكە» تەلەسەريالىنىڭ العاشقى بولىمدەرى «قازاقستان» ۇلتتىق تەلەارناسىندا ءجۇرىپ جاتىر. جۋىردا وسى تەلەحيكايانىڭ تۇساۋكەسەر راسىمىنە وراي بريفينگ ۇيىمداستىرىلدى.
«اپكە» وتكەن عاسىردىڭ جەتپىسىنشى جىلدارى دۇنيەگە كەلگەن شىعارما. سودان بەرى زامان وزگەردى, ۇرپاق اۋىستى. قۇندىلىقتارعا دەگەن ءتۇرلى كوزقاراستار پايدا بولدى. رۋحانياتتى نارىققا بەيىمدەۋ تۋرالى ويلار دا ايتىلا باستادى. بىراق, ادامزاتپەن بىرگە جاساسىپ كەلە جاتقان نەگىزگى ادامگەرشىلىك زاڭدارى قوعامدىق وزگەرىستەرگە ەشقاشان دا تاۋەلدى بولماق ەمەس. ويتكەنى, ول تۇتاس حالىقتىڭ سۇرانىسىنا يە, كۇندەلىكتى تۇتىنۋعا قاجەتتى «شيكىزات». ءبىز ءۇشىن تۇتاس حالىقتىڭ سۇرانىسىنا لايىق سونداي شىعارمانىڭ ءبىرى – «اپكە». ءوز تاعدىرىنان باۋىرلارىنىڭ قامىن بيىك قويعان ابزال جاننىڭ ماڭايىندا ءوربيتىن وقيعا, ياعني, «اپكە» پەساسى ەكى ساعاتقا لايىقتالعان. ول 36 جىلدان بەرى م.اۋەزوۆ اتىنداعى اكادەميالىق دراما تەاترى مەن باسقا دا وبلىستىق تەاترلاردا قويىلىپ كەلەدى. ال, سونىڭ نەگىزىندە جاسالعان «اپكە» – 16 سەريادان تۇراتىن, جاڭا زامانعا لايىقتالعان كينوتۋىندى.
جازۋشى دۋلات يسابەكوۆ ءوز شىعارماسىنىڭ تەلەحيكاياعا ارنالىپ, قالىڭ كورەرمەنگە جول تارتقانى ءۇشىن الدىمەن «قازاقستان» ۇلتتىق ارناسىنىڭ باسشىلىعىنا ريزاشىلىعىن ءبىلدىردى. فيلم ۇلتتىق ارنانىڭ تاپسىرىسىمەن, نۇرگەلدى سادىعۇلوۆ, مۇرات بيدوسوۆ, باتىرحان سازاحانوۆ, ءجاميت كوشەرباەۆ سىندى رەجيسسەر-ستسەناريستەردىڭ, فيلمگە قاتىسى بار تاعى باسقا دا جانداردىڭ ەڭبەكتەرىنىڭ ارقاسىندا ءدۇنيەگە كەلدى. «قازاقتا كوش جۇرە تۇزەلەدى دەيتىن جاقسى ءسوز بار. ويتكەنى, ءبىز سەريال ءتۇسىرۋدى ەندى عانا قولعا الىپ جاتىرمىز. سول ءۇشىن كەمشىلىكتەر جوق ەمەس. «ءاپكەگە» قاتىستى العاندا ونىڭ باعاسىن كەيىننەن كينوسىنشىلار ايتا جاتار. مەن بۇگىن بۇل تۋىندىمنىڭ شەرۋى توقتاماعانىنا ريزاشىلىعىمدى بىلدىرگىم كەلەدى. ساحنادا العاش اپكە ءرولىن سومداعان فاريدا ءشارىپوۆا ەدى. قازىر ارامىزدا جوق. ودان كەيىن اپكە بوپ ساحناعا شىققانداردىڭ دا الدى اجە بوپ كەتتى. مىنە, ەندى جاڭا زاماننىڭ كينوداعى «اپكەسىمەن» كەزدەسەيىن دەپ وتىرمىز. جالپى, تۋىندى ءبىر جانردان ەكىنشى جانرعا وتكەندە مازمۇندىق, كوركەمدىك جاعىنان ءبىر نارسەلەردى جوعالتىپ, ەكىنشى ءبىر نارسەلەردى تاۋىپ جاتادى. ونىڭ ۇستىنە تەلەحيكايا باسقا زاماندا ءتۇسىرىلىپ وتىر. كينونى الدىن الا كورگەنىم جوق. مەن دە ەل قاتارلى كورىپ شىعاتىن بولامىن», – دەدى دۋلات يسابەكوۆ.
«قازاقستان» رترك» باسقارما ءتورايىمىنىڭ ورىنباسارى قاينار ولجاي ۇلتتىق ارنادا ءبىر اي بۇرىن تۇرىك پەن كورەيدىڭ سەريالدارى توقتاعانىن, ولاردىڭ ورنىنا بۇدان بىلاي وتاندىق ونىمدەر ۇسىنىلاتىنىن جەتكىزدى. قازاق دراماتۋرگياسىنىڭ كوشىن باستاپ كەلە جاتقان بەلگىلى قالامگەردىڭ «اپكە» تۋىندىسى حالىققا ۇسىنىلىپ وتىرعان العاشقى سۇبەلى ءدۇنيە ەكەنىن, بۇنى ءتۇسىرۋگە كينو جانە تەلەۆيزيا سالاسىندا بەلگىلى ءبىر جەتىستىككە جەتكەن ماماندار تارتىلعانىن باياندادى.
ايتا كەتەيىك, «اپكە» فيلمىنە ريتا كۇمىسقاليەۆا, قۋانىش كەرىمقۇلوۆ, دارىن شىنىبەك, ايدانا اسقار, ءالي تۇرسىنحانوۆ, باقىتجان الپەيىسوۆ, شىنار اسقاروۆا, ەرلان ءبىلال, ايزادا ساتىبالديەۆا, جالعاس تولعانباي جانە تاعى باسقا اكتەرلەر مەن اكتريسالار تۇسكەن.
ايگۇل سەيىلوۆا,
«ەگەمەن قازاقستان».