ەلوردادا قالا اكىمىنىڭ ورىنباسارى باقتيار ماكەننىڭ قاتىسۋىمەن توتەنشە جاعدايلاردىڭ الدىن الۋ جانە جويۋ جونىندەگى كوميسسيانىڭ وتىرىسى ءوتتى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
جيىندا ەلوردادا كوروناۆيرۋس ينفەكتسياسىنىڭ تارالۋىنا جول بەرمەۋ, سايلاۋ ۋچاسكەلەرىندە دايىندىق جانە وتكىزۋ كەزىندە قاۋىپسىزدىكتى قامتاماسىز ەتۋ شارالارى تالقىلاندى.
قازىرگى ۋاقىتتا ەلوردادا تاۋلىگىنە 50-دەن 120-عا دەيىن اۋرۋ تىركەلگەن. كۆي دياگنوستيكاسى بويىنشا تاۋلىكتىك قۋاتى 12 250-گە دەيىنگى 21 زەرتحانا مەن 7 ينفەكتسيالىق جانە ءبىر كارانتيندىك ستاتسيونار جۇمىلدىرىلدى. قازىرگى ۋاقىتتا بارلىق زەرتحانالاردىڭ جۇكتەمەسى 25-تەن 40%-عا دەيىن, كۇنىنە 1 500-دەن 5 000-عا دەيىن زەرتتەۋلەر جۇرگىزىلەدى. كۆي دياگنوزى راستالعان ستاتسيونارلارداعى پاتسيەنتتەر سانى 212 ادامدى, پنەۆمونيامەن 39 ادامدى قۇرايدى.
سايلاۋ ۋچاسكەلەرىنە قاتىستى توقتالساق, قالا اۋماعىندا بارلىعى 283 سايلاۋ ۋچاسكەسى ورنالاسقان, ونىڭ 248-ءى اشىق جانە 35-ءى جابىق (مەد. ورتالىقتار, اۋرۋحانالار, اسكەري بولىمدەر جانە ت.ب.)
دەنساۋلىق ساقتاۋ مينيسترلىگىنىڭ كوروناۆيرۋس ينفەكتسياسى تارالۋىنىڭ الدىن الۋ الگوريتمىنە سايكەس, 2021 جىلعى 5-8 قاڭتار ارالىعىندا ەلوردادا سايلاۋ كوميسسيالارىنىڭ مۇشەلەرىن, سەنىم بىلدىرىلگەن تۇلعالار مەن باقىلاۋشىلارعا پتر-تەستىلەۋ جۇرگىزىلەدى.
«سايلاۋ ۋچاسكەلەرىندە جۇرتتىڭ جاپپاي جينالۋىنا جول بەرمەۋ ماقساتىندا تۇرعىندار ءۇشىن ارنايى شىعۋ جولدارى قاراستىرىلاتىن بولادى. بارلىق ۋچاسكەلەر دايىن بولۋى جانە قاجەتتى قورعانىس قۇرالدارىمەن جابدىقتالۋى كەرەك: دەزينفەكتسيالىق كىلەمشەلەر, ەدەندەگى بەلگىلەر, قاتىسۋشىلاردىڭ قوزعالىسىنا ارنالعان قورشاۋلار مەن توسقاۋىل تاسپالارى, پايدالانىلعان جەكە قورعانىس قۇرالدارىن جيناۋعا جانە كادەگە جاراتۋعا ارنالعان كونتەينەرلەر, انتيسەپتيكالىق زاتتار, جەكە قورعانىس قۇرالدارى. جالپى, قالانىڭ بارلىق قىزمەتى ەلوردا تۇرعىندارى 10 قاڭتاردا ازاماتتىق جانە كونستيتۋتسيالىق بورىشىن ەش كەدەرگىسىز ورىنداي الۋى ءۇشىن جوعارى دايىندىق جۇرگىزۋى ءتيىس», – دەپ اتاپ ءوتتى اكىمنىڭ ورىنباسارى.
جيىن قورىتىندىسى بويىنشا باقتيار ماكەن كوروناۆيرۋس ينفەكتسياسىنا قارسى ءىس-قيمىل بويىنشا كارانتيندىك شارالاردى كۇشەيتۋدى, بارلىق سايلاۋ ۋچاسكەلەرىندە قاۋىپسىزدىك پاسپورتىنىڭ بولۋىن جانە سانيتارلىق نورمالاردىڭ ساقتالۋىن تەكسەرۋدى, قالالىق قىزمەتتەردىڭ جۇمىسىن كۇشەيتۋدى تاپسىردى.
ەستەرىڭىزگە سالا كەتەيىك, ەلوردا كوروناۆيرۋستىڭ تارالۋ قارقىنى بويىنشا «سارى ايماقتا» ورنالاسقان. تۇرعىندار بارلىق شارالاردى, ياعني بەتپەردە كيىپ, ارا قاشىقتىقتى ساقتاۋ كەرەك.