قازاق – تاۋەلسىزدىك ءۇشىن عاسىرلار بويى كۇرەسكەن حالىق. بۇل كۇرەس 1991 جىلمەن اياقتالعان جوق. قازىر دە جالعاسىپ كەلەدى. ءتىپتى قازىرگى كۇرەستىڭ ءوز ەرەكشەلىكتەرى بار. ءبىز, ەڭ الدىمەن, ازاماتتارىمىز بەن وسكەلەڭ ۇرپاقتىڭ تاريحي ساناسىن, زاماناۋي, ازات كوزقاراسىن نىعايتۋىمىز قاجەت. مىنە, وسى باعىتتاعى كۇرەس توقتاماۋى شارت.
«تاۋەلسىزدىك بارىنەن قىمبات» اتتى ماقالاسىندا پرەزيدەنتىمىز وسى تۋرالى ايتتى. جالپى, مەنىڭشە, بۇل ماقالانى اسا جاۋاپتى كەزەڭدەگى ەلىمىزدىڭ نەگىزگى يدەولوگيالىق باعىتتارىن كورسەتەتىن قۇجات دەپ اتاۋعا بولادى.
ءبىرتۇتاس ۇلت بولۋ وڭاي ەمەس. از ەمەسپىز, كوپپىز. ءتۇرلى پىكىر-كوزقاراستارىمىز دا بار. وڭتۇستىك-سولتۇستىك, ناعىز-شالا, كورەي-ۇيعىر, قازاقتىلدى-ءورىستىلدى دەگەن توپتارعا بولىنبەۋمىز قاجەت. سوندىقتان ءبىزدى بىرىكتىرەتىن مىقتى ۇعىمدار بولۋى كەرەك. پرەزيدەنتىمىز ولار تۋرالى دا ايتتى.
بىرىنشىدەن, ەڭ مىقتى بىرىكتىرۋشى فاكتور – ءتىل. ءبىر تىلدە سويلەيتىن ۇلتتىڭ بولاشاعى زور. جاستار كوپ ءتىل بىلسە جامان ەمەس, بىراق ءبىر-ءبىرىڭدى ءتۇسىنۋ ءۇشىن, قوعامنىڭ تىنىسىن تەرەڭ سەزىنۋ ءۇشىن ءبارىمىز مەملەكەتتىك ءتىلدى بىلگەنىمىز ءجون. ونىڭ ۇستىنە ورتاق مەنتاليتەت پەن رۋحاني قۇندىلىقتاردى قالىپتاستىرۋ جولىندا ءتىل باستى رولگە يە.
ەكىنشىدەن, ءوزىنىڭ جەرى بار ەل عانا مەملەكەت دەپ اتالادى. جەر شەتەلدىكتەرگە ساتىلمايدى دەپ ايتتى پرەزيدەنتىمىز. بىراق وسى جەردى دۇرىستاپ پايدالانۋىمىز كەرەك. اۋىل شارۋاشىلىعىن دامىتىپ, تابيعي رەسۋرستاردى قورعاپ, تابيعاتىمىزدى قۇرمەتتەۋمىز قاجەت. از ەڭبەك رەسۋرستارى بار ايماقتارعا قانداستارىمىزدى شاقىرۋ دا ارتىق ەمەس.
ۇشىنشىدەن, ورتاق تاريحىمىز بار. بالالارعا ارنالعان فيلمدەردى ءتۇسىرۋدى, كىتاپتاردى جازۋدى جانە قازاق حالقىنىڭ تاريحي شەجىرەسىن باسقا تىلدەرگە اۋدارۋدى تولىق قولدايمىن. مىڭجىلدىقتارمەن ولشەنەتىن تاريحىمىزدى ناسيحاتتايىق.
تورتىنشىدەن, ۇلتارالىق كەلىسىم. ءبىز 90-جىلداردىڭ باسىندا الەۋمەتتىك جانە ۇلتارالىق قاقتىعىستارعا جول بەرمەگەن حالىقپىز. كوپەتنوستىقتى ارتىقشىلىققا اينالدىرا بىلدىك. بولاشاقتا دا وسى ماقسات جولىندا جۇمىس ىستەيىك.
بەسىنشىدەن, ورتاق بولاشاعىمىز بار ۇلتپىز. شىنىمەن دە شەتەلدەرگە وقۋعا كەتەتىن جاستارىمىز بار. مەن دە سولاردىڭ ءبىرىمىن. بىراق وقۋدان سوڭ ەلگە قايتقان ازاماتتارىمىز از ەمەس. شەتەلدە العان ءبىلىمىمىز بەن تاجىريبەمىزدى مەملەكەت ءۇشىن پايدالانۋىمىز كەرەك. سەبەبى ءبىز قازاقستانعا سەنەمىز.
«قازاق رۋعا بولىنبەيدى, رۋدان قۇرالادى», دەيدى. ءدال سولاي. ءبىز تىلگە, دىنگە, ەتنوسقا بولىنبەيتىن ۇلت رەتىندە دامۋىمىز كەرەك. ولاي بولسا ەشقانداي دا دەسترۋكتيۆتى سىرتقى نە ىشكى كۇشتەر تاۋەلسىزدىگىمىزگە كەرى اسەر ەتپەيدى. وسى فاكتورلارعا ءمان بەرسەك, مەملەكەتتىلىگىمىز ماڭگى بولادى. مەن وعان كامىل سەنەمىن.
ماكسيم سپوتكاي,
ۇلتتىق قوعامدىق سەنىم كەڭەسىنىڭ مۇشەسى