نۇر-سۇلتان قالاسىنىڭ اكىمى التاي كولگىنوۆ «جاستار» اۋدانىنداعى تازارتۋ قوندىرعىسىنىڭ قۇرىلىسىمەن ارنايى بارىپ تانىستى. بۇل تۋرالى ول Instagram پاراقشاسىندا جازدى, دەپ حابارلايدى Egemen.kz.
«قۇرىلىس جۇرگىزىپ, ينجەنەرلىك جەلىلەردى تارتۋ بارىسىندا جاۋىن-شاشىن كارىزدەرى مەن كوللەكتورلاردى دا ۇمىتپاعان ءجون. ولاردى تازارتىپ, قاراۋسىز قالعان جاۋىن-شاشىن كارىزدەرى مەن ارىق جۇيەسىن بالانسقا الىپ, جاۋىن-شاشىن قۇبىرلارىنا زاڭسىز جالعانۋدى انىقتاپ, ت.س.س. جۇمىستاردى جوسپارلى تۇردە جۇرگىزۋ كەرەك.
جارتى جىل ىشىندە وتكىزۋ قابىلەتىن جاقسارتۋ ماقساتىندا 54 شاقىرىم كوللەكتور, 4 مىڭ قاق سۋىن جيناۋ جانە قاداعالاۋ قۇدىعى, 32 مىڭ پوگومەتر ارىق جۇيەسى تازارتىلدى. ارىقتار مەن قۇدىقتاردان شىعارىلعان قوقىستىڭ ءوزى 2,5 مىڭ توننانى قۇرادى, جاسالعان مۇنداي جۇمىستار جەتىپ-ارتىلادى. جاۋىن سۋى اعاتىن قۇبىرلارعا 230 ءۇي-جايدىڭ زاڭسىز جالعانعانى انىقتالدى. بۇل جۇمىستار تۇراقتى اتقارىلىپ كەلەدى», دەپ جازدى التاي كولگىنوۆ.
ول ءسوزىن جالعاي وتىرىپ, «جاستار» اۋدانىنداعى, ياعني تاشەنوۆ پەن اممان كوشەلەرىنىڭ قيىلىسىنداعى تازارتۋ قوندىرعىسىنىڭ قۇرىلىسى جاۋىن-شاشىن كوللەكتورلارىنىڭ رەكونسترۋكتسياسىن دا كوزدەي̆تىنىن ايرىقشا اتاپ ءوتتى. ايتۋىنشا بۇل جوبا ەكى كەزەڭدە جۇزەگە اسىرىلاتىن بولادى.
«بۇگىنگى ارالاۋ بارىسىندا «جاستار» اۋدانىنداعى (تاشەنوۆ پەن اممان كوشەلەرىنىڭ قيىلىسى) تازارتۋ قوندىرعىسىنىڭ قۇرىلىسىمەن تانىستىم. بۇل قۇرىلىس كەلىپ تۇرعان جاۋىن-شاشىن كوللەكتورلارىنىڭ رەكونسترۋكتسياسىن دا كوزدەيدى. بۇل جوبانى ءبىز ەكى كەزەڭدە جۇزەگە اسىرامىز.
ءبىرىنشى كەزەڭى - بىلتىرعى كۇزدە باستالدى. بۇرىن قالدىق سۋ وزەنگە تىكەلەي اعىزىلىپ, ونى لاستاپ, قالا ەكولوگياسىنا كەرى اسەرىن تيگىزەتىن. جوسپارىمىز جۇزەگە اسقان سوڭ, ەندى جاڭبىر مەن قار سۋى ەسىلگە اعىزار الدىندا تازارتىلاتىن بولدى», — دەدى قالا اكىمى.
التاي كولگىنوۆ بيىلعى كوكتەمدە بۇل جوسپاردىڭ ەكىنشى كەزەڭى اياقتالاتىنىن اتاپ ءوتتى.
«ناتيجەسى — كەلىپ تۇرعان جاۋىن-شاشىن كوللەكتورلارىنىڭ رەكونسترۋكتسياسى بولماق. جاڭا قوندىرعىلاردىڭ قۋاتى تاۋلىگىنە 42 مىڭ تەكشە مەتر بولادى. بۇل قوندىرعىلار تاشەنوۆ, باراەۆ, ءۋاليحانوۆ, يمانباەۆا جانە رەسپۋبليكا داڭعىلىن سۋعا كەتۋدەن ساقتايدى.
قوندىرعىلار جەر استىمەن جۇرگىزىلىپ, ال ۇستىنە - كىشى ارحيتەكتۋرالىق مۇسىندەرمەن كومكەرىلگەن ءارى جاسىل جەلەكتى سكۆەر سالامىز.
سونىمەن بىرگە, ب. مومىش ۇلى كوشەسىندەگى ايتۋلى پروبلەمالى جەرگە جاۋىن-شاشىن كارىز جۇيەسىنىڭ ماگيسترالدىق كوللەكتورىنىڭ قۇرىلىسى اياقتالدى. جاڭا قوندىرعى قازىرگى جاۋىن-شاشىن كارىزدەرىنىڭ وتكىزۋ قابىلەتىن 1,5 ەسەگە ارتتىرادى», — دەيدى اكىم.
ال تەلمان تۇرعىن الابىنىڭ تازارتۋ قوندىرعىلارى مەن ماگيسترالدى كوللەكتورىنىڭ وتكىزۋ قابىلەتى تاۋلىگىنە 36 مىڭ تەكشە مەتر بولماق.
«جوبا جۇزەگە اسقان سوڭ - وسى الاپتىڭ جانە № 27 كوشەنىڭ قۇرىلىس ءجۇرۋى مۇمكىن اۋماقتارىنان قاق سۋىن اعىزىپ اكەتۋ مۇمكىن بولادى. بۇعان قوسا, ءبىرشاما تازارتۋ قوندىرعىلارى مەن جاۋىن-شاشىن كارىزدەرى باسقا جەرلەرگە دە سالىندى. بۇل جۇمىستار جۇيەلى تۇردە جۇرگىزىلىپ كەلەدى», دەپ جازدى التاي كولگىنوۆ.