شىمكەنت قالاسىنىڭ 2018-2020 جىلدارعا ارنالعان دامۋ باعدارلاماسى اياقتالىپ, شاھاردا بىرقاتار جەتىستىكتەرگە قول جەتكىزىلدى. نەگىزگى ستراتەگيالىق قۇجاتى بولىپ سانالاتىن باعدارلامانىڭ ماقساتى – قالا ەكونوميكاسىن قارقىندى دامىتىپ, تۇرعىندارعا قولايلى جاعداي جاساۋ, دەپ حابارلايدى Egemen.kz
دامۋ باعدارلاماسى بەلگىلەنگەن باسىمدىقتار بويىنشا ىسكە اسىرىلدى. اتاپ ايتقاندا, ونەركاسىپ سالاسىندا 2018-2020 جىلدارى قۇنى 661,1 ملرد تەڭگەگە 52 جوبا ىسكە اسىرىلىپ, سالادا 2398 جۇمىس ورىندارى اشىلدى. وندىرىستىك ينفراقۇرىلىمى بار 3 ايماقتا ينۆەستيتسيا كولەمى 229,7 ملرد تەڭگە, 10 مىڭنان استام جۇمىس ورنىمەن 170 جوبا جۇزەگە اسىپ جاتىر.
اۋىل شارۋاشىلىعى سالاسىندا 2018-2020 جىلدارى 8,3 ملرد تەڭگەگە 21 جوبا ىسكە اسىپ, 453 جۇمىس ورنى اشىلدى. جىلىجايلار كولەمى 9,2 گەكتاردان 20,9 گەكتارعا دەيىن ۇلعايىپ, قارقىندى باۋ اۋماعى 195 گەكتارعا جەتكىزىلدى. مەملەكەت تاراپىنان 6,5 ملرد تەڭگەگە 583 شارۋاشىلىققا قولداۋ جاسالدى. وسى مەرزىمدە 307 ملن اقش دوللارىنا اۋىل شارۋاشىلىعى ونىمدەرى ەكسپورتتالدى.
قالا ەكونوميكاسىنا 3 جىلدا 1 ترلن تەڭگەدەن استام ينۆەستيتسيا تارتىلدى. ونىڭ ىشىندە 80 پايىزى – جەكە قاراجات ەسەبىندەگى ينۆەستيتسيالار, مەملەكەتتىك بيۋدجەتكە جۇكتەمە ازايىپ وتىر. ساۋدا سالاسىندا نىساندار سانى 2018 جىلمەن سالىستىرعاندا 2058 بىرلىككە كوبەيىپ, قازىر 4321 ساۋدا نىسانى جۇمىس ىستەيدى.
قالاداعى 8 بازار جاڭعىرتۋدان ءوتتى. مەملەكەت تاراپىنان 3 جىلدا 21,8 ملرد.تەڭگە كولەمىندە شاعىن جانە ورتا كاسىپكەرلىك سۋبەكتىلەرىنە قولداۋ كورسەتىلدى. شىمكەنت قالاسى اكىمدىگىنىڭ ءباسپاسوز قىزمەتى