ناۋرىز مەيرامىن اتاپ ءوتۋ تۇجىرىمداماسىن جاساپ, كوكتەم مەرەكەسىنىڭ مازمۇنىن بايىتا تۇسكەن ءجون. بۇكىل قوعامدى ۇيىستىراتىن قۇندىلىقتار نەعۇرلىم كوپ بولسا, بىرلىگىمىز دە سوعۇرلىم بەكەم بولادى. بۇل تۋرالى قر پرەزيدەنتى قاسىم-جومارت توقاەۆ باس باسىلىمدا جاريالاعان «تاۋەلسىزدىك بارىنەن قىمبات» اتتى ماقالاسىندا ايتتى, - دەپ حابارلايدى Egemen.kz.
پرەزيدەنت ماقالاسىندا ءبىزدى قاي زاماندا دا قيىندىقتاردان امان الىپ كەلە جاتقان باستى قۇدىرەت – ەل بىرلىگى ەكەنىن اتاپ ءوتتى.
«ىنتىماعى جاراسقان جۇرتتىڭ قاشاندا ۇپايى تۇگەل. ءتۇرلى جاعدايلارعا بايلانىستى قازاق جەرىنە ءار كەزەڭدە ءارتۇرلى ۇلت وكىلدەرى كوپتەپ قونىستاندى. قازاق حالقى ەشكىمدى جات كورمەي, باۋىرىنا باستى. بۇگىندە ولاردىڭ تۋعان جەرى دە, وتانى دا – قازاقستان. ءبىز كوپەتنوستىق سيپاتىمىزدى ارتىقشىلىعىمىزعا اينالدىرا العانىمىز انىق. كوپتەگەن شەتەلدىك ساراپشىلاردىڭ ەلىمىزگە قاتىستى «ەۋرازياداعى شىرپى تيسە لاپ ەتكەلى تۇرعان قۋراي», «failed state» سياقتى بولجامدارىن جوققا شىعاردىق. بۇل جولدا تىنىشتىق پەن تۇراقتىلىقتىڭ باستاۋى بولعان قازاقستان حالقى اسسامبلەياسى ءتيىمدى جۇمىس اتقاردى», - دەدى قاسىم-جومارت توقاەۆ.
مەملەكەت باسشىسى «ەشكىمدى ۇلتىنا قاراپ, بولە-جارعان جوقپىز. ءبارىنىڭ ءوسىپ-ونۋىنە تولىق جاعداي جاسادىق, بىردەي مۇمكىندىك بەردىك. ءبىزدىڭ ۇلتارالىق كەلىسىم ساياساتىمىز الەمدى مويىنداتتى. حالقىمىزدىڭ وسىنداي ىرىس-ىنتىماققا نەگىزدەلگەن جاراسىمىن باعالاي ءبىلۋىمىز كەرەك», - دەي كەلە, بۇل – كەمەل كەلەشەككە باستايتىن بىردەن-ءبىر دۇرىس جول ەكەنىن ايتتى.
«سوندىقتان, ۇلتارالىق تاتۋلىق پەن كەلىسىمدى ساقتاۋ – مەملەكەتتىك ورگانداردىڭ عانا ەمەس, بۇكىل قوعامنىڭ جانە ءاربىر ازاماتتىڭ مىندەتى. تۇپتەپ كەلگەندە, ەلىمىزدەگى تۇراقتىلىق پەن بەرەكە-بىرلىك ءۇشىن بارلىعىمىز بىردەي جاۋاپتىمىز.
وسى ورايدا, حالقىمىزدى بىرىكتىرەتىن ورتاق قۇندىلىقتاردى بارىنشا دارىپتەپ, وي-ساناعا بەرىك ورنىقتىرۋىمىز كەرەك», - دەدى قاسىم-جومارت توقاەۆ.