قاسىم-جومارت توقاەۆ «Egemen Qazaqstan» گازەتىندە جاريالاعان «تاۋەلسىزدىك بارىنەن قىمبات» اتتى ماقالاسىندا ەلى مەن جەرىن ءسۇيۋ ءۇشىن جاس ۇرپاق بايتاق قازاقستاننىڭ عاجايىپ جاۋھارلارىن بىلۋگە ءتيىس ەكەنىن ايتتى. قر پرەزيدەنتى وڭتۇستىك ءوڭىر تۇرعىندارىنىڭ سولتۇستىك ايماقتارعا قونىستانۋىنا قولايلى جاعداي جاسالاتىنىن مالىمدەدى, دەپ حابارلايدى ەgemen.kz.
«باتىستا بوزجىرا مەن شەرقالا, كۇنگەيدە اقسۋ-جاباعىلى مەن سايرام-وگەم, جەتىسۋدا حان ءتاڭىرى مەن شارىن, كولساي مەن قايىڭدى, قاپال- اراسان, التىنەمەل مەن بۇرحان بۇلاق, شىعىستا مۇزتاۋ مەن شىڭعىستاۋ, مارقاكول مەن راحمان قاينارى, ارقادا بۋراباي مەن باياناۋىل, ۇلىتاۋ مەن قارقارالى, تەرىسكەيدە يمانتاۋ مەن ايىرتاۋ جانە باسقا دا كورىكتى جەرلەرىمىز جەتىپ ارتىلادى. جەر ءجانناتىن الىستان ىزدەۋدىڭ قاجەتى جوق. ءبارى وزىمىزدە بار. جاستارعا وسىنداي كەرەمەت تابيعاتىمىزدى تانىتىپ, ونى قادىرلەۋگە باۋلۋىمىز كەرەك», - دەدى مەملەكەت باسشىسى.
قاسىم-جومارت توقاەۆ ۋاقىت ۇتتىرماي قولعا الىپ, دايەكتى تۇردە ىسكە اسىراتىن تاعى ءبىر شارۋا بار ەكەنىن ايتتى. ول - حالىقتىڭ قالالىق جەرلەرگە جاپپاي كوشۋى سالدارىنان كوپتەگەن اۋىلداردا, اسىرەسە, شەكارا ماڭىنداعى ەلدى-مەكەندەردە تۇرعىندار سانى كۇرت ازايۋى.
ء«بىز ەڭبەك كۇشى كوپ وڭتۇستىك ءوڭىر تۇرعىندارىنىڭ سولتۇستىك جانە شىعىس ايماقتارعا قونىستانۋىنا قولايلى جاعداي جاساپ, وسى جۇمىستى نازاردا ۇستايمىز. بۇل – وتە وزەكتى ءارى ەلىمىزدىڭ قاۋىپسىزدىگىنە قاتىستى ماسەلە. بۇعان قوسا سوڭعى جىلداردا ءتۇرلى سەبەپتەرگە بايلانىستى باسەڭدەپ قالعان قانداستار كوشىن بارىنشا قولداپ, ولاردى جوعارىدا ايتىلعان وڭىرلەرگە ورنالاستىرۋدى جانداندىرامىز», - دەدى پرەزيدەنت.
قاسىم-جومارت كەمەل ۇلى بۇل ەكى ماسەلەنىڭ دە ستراتەگيالىق ماڭىزى بارىن, سوندىقتان وعان كەزەكتى ناۋقان رەتىندە قاراۋعا بولمايتىنىن دا باسا ايتتى.
«جەرگىلىكتى بيلىك مۇنداي جۇمىستاردى جوعارىعا كوپىرگەن اقپار بەرۋ ءۇشىن ەمەس, مەملەكەتتىك مۇددە جانە اعايىنعا شىنايى جاناشىرلىق تۇرعىسىنان جاساۋعا ءتيىس», - دەدى مەملەكەت باسشىسى.