جۇما كۇنى الماتى قالاسى اكىمدىگىنىڭ ۇيىمداستىرۋىمەن كسرو حالىق ءارتىسى شولپان جانداربەكوۆانىڭ قۇرمەتىنە ورناتىلعان ەسكەرتكىش تاقتانىڭ سالتاناتتى اشىلۋ ءراسىمى بولىپ ءوتتى.
جۇما كۇنى الماتى قالاسى اكىمدىگىنىڭ ۇيىمداستىرۋىمەن كسرو حالىق ءارتىسى شولپان جانداربەكوۆانىڭ قۇرمەتىنە ورناتىلعان ەسكەرتكىش تاقتانىڭ سالتاناتتى اشىلۋ ءراسىمى بولىپ ءوتتى.
مەملەكەتتىك سىيلىقتىڭ لاۋرەاتى شولپان جانداربەكوۆانىڭ ەسىمىن ماڭگى ەستە قالدىرۋ ماقساتىندا قايراتكەردىڭ سوڭعى جىلدارى تۇرعان ۇيىنە ورناتىلعان ەسكەرتكىش تاقتانىڭ اشىلۋ راسىمىنە مادەنيەت قايراتكەرلەرى, زيالى قاۋىم وكىلدەرى, ش. جانداربەكوۆانىڭ شاكىرتتەرى جانە تۋىستارى قاتىسىپ, ەستەلىكتەر ايتتى.
ونەرگە وشپەس تالانتىمەن قىزمەت ەتكەن جانداربەكوۆا شولپان يسابەكقىزى 1922 جىلعى 1 قاڭتاردا قاراعاندى وبلىسىنىڭ قارقارالى اۋدانىندا دۇنيەگە كەلگەن. الماتى تەاتر-كوركەمسۋرەت ۋچيليششەسىن بىتىرگەن. م. اۋەزوۆتىڭ «ەڭلىك-كەبەگىندەگى» ەڭلىك, «قارا قىپشاق قوبىلاندىداعى» قۇرتقا, «ايمان-شولپانداعى» شولپان, «تۇنگى سارىنداعى» جۇزتايلاق, «اباي ءانى» كينوفيلمىندەگى ماعىش جانە ت.ب. وبرازداردى سومداعان. س.ءجۇنىسوۆتىڭ «اجار مەن اجالىندا» اجار ءرولىن شەبەر ورىنداعانى ءۇشىن قازاقستاننىڭ مەملەكەتتىك سىيلىعىن العان.
ج.مولەردىڭ «ساراڭىندا» مارياننا, ۋ.شەكسپيردىڭ «وتەللوسىندا» دەزدەمونا, يا.گالاننىڭ «تاڭ الدىنداعى ماحابباتىنداعى» پاراسكا, م.كاورۋدىڭ «شىعىستاعى ءبىر بەيباعىندا» كەي سىندى رولدەرىمەن ءوز زامانىنداعى كورەرمەندەردىڭ ولشەۋسىز ءىلتيپاتىنا يەلەنگەن شولپان اپامىز ونەرگە قالتقىسىز بەرىلىپ, ونى جان-تانىمەن سۇيگەن ەرەكشە جان. تالانتتى اكتريسانىڭ ۇلتتىق ونەرگە سىڭىرگەن ەڭبەگى ەلەنىپ, قازاقستاننىڭ جانە كسرو-نىڭ حالىق ءارتىسى اتاقتارى بەرىلگەن.
ۇلكەن دارىن يەسى, ەكى مارتە «ەڭبەك قىزىل تۋ» وردەنىمەن جانە كوپتەگەن مەدالدارمەن ماراپاتتالعان ش.جانداربەكوۆا بار تۇيگەن-توقىعانىن كەلەر ۇرپاققا قالدىرۋ ماقساتىندا وقىتۋشىلىق قىزمەتپەن دە اينالىستى. الماتى مەملەكەتتىك ونەر ينcتيتۋتىندا, قازاق ۇلتتىق ونەر اكادەمياسىندا ءدارىس وقىپ, شاكىرت تاربيەلەدى.
ايناش ەسالي,
«ەگەمەن قازاقستان».
الماتى.
سۋرەتتى تۇسىرگەن بەرسىنبەك سارسەنوۆ.