ەلورداداعى كونگرەسس-حوللدا تاۋەلسىزدىك مەرەكەسىنە ارنالعان «جىرىڭ بولىپ توگىلەمىن, ەلىم!» اتتى رەسپۋبليكالىق اقىندار ايتىسى ءوتتى. «نۇر وتان» پارتياسىنىڭ قولداۋىمەن وتكىزىلگەن ايتۋلى دوداعا ەلىمىزدىڭ ءتۇرلى ايماقتارىنان كەلگەن سايدىڭ تاسىنداي ىرىكتەلگەن ون اقىن قاتىسىپ, باقتارىن سىنادى.
ەلورداداعى كونگرەسس-حوللدا تاۋەلسىزدىك مەرەكەسىنە ارنالعان «جىرىڭ بولىپ توگىلەمىن, ەلىم!» اتتى رەسپۋبليكالىق اقىندار ايتىسى ءوتتى. «نۇر وتان» پارتياسىنىڭ قولداۋىمەن وتكىزىلگەن ايتۋلى دوداعا ەلىمىزدىڭ ءتۇرلى ايماقتارىنان كەلگەن سايدىڭ تاسىنداي ىرىكتەلگەن ون اقىن قاتىسىپ, باقتارىن سىنادى.
ايتىستى قۇتتىقتاۋ سوزبەن اشقان «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك پارتيا ءوزىنىڭ جاڭا Cاياسي دوكتريناسىندا ۇلتتىق ءداستۇرىمىزدى, ءتول مادەنيەتىمىزدى, رۋحانياتىمىزدى وتە جوعارى ورىنعا قويىپ وتىرعانىن ايتا كەلە, ەلباسى ساياساتىنىڭ ارقاسىندا ەگەمەندى ەل بولىپ دامىعان ەلۋ مەملەكەتتىڭ قاتارىنا ەندىك, دەدى. سونداي-اق, ول تەك كەمشىلىكتى عانا ەمەس, بىرلىكتى, بەيبىتشىلىكتى, تۇراقتىلىقتى جىرلاۋ كەرەكتىگىن دە تىلگە تيەك ەتە كەلە, «نۇر وتان» پارتياسى اقىندارىمىزدى قاشاندا قولدايتىندىعىن اتاپ كورسەتتى.
سونىمەن, العاشقى بولىپ ساحناعا مۇحتار نيازوۆ پەن جانداربەك بۇلعاقوۆ كوتەرىلدى. جالىنداعان جاس اقىندار ايتىسى جيىلعان جۇرتشىلىقتى وزدەرىنىڭ ۇتقىر سوزدەرىمەن تامسانتتى. جالپى, وتكىزىلىپ وتىرعان بۇل ايتىستىڭ ءوز ەرەجەسىنە ساي اقىندار شەك تاستاۋ ارقىلى ەكراندا بەلگىلەنگەن ارنايى تاپسىرماعا سايكەس ايتىستى ارى قاراي جالعاستىردى. بۇل جولى ولارعا وتىرىك ولەڭ ايتۋ ءتۇستى. قوس اقىن دا بۇل سىندا بارىن سالا ايتىستى. وسى تۇس مۇحتار نيازوۆتىڭ وتكەن جىلعى ايتىستىڭ التىن دومبىراسىن جەڭىپ العانىن ايتا كەتەيىك.
ەكىنشى جۇپتا كەزدەسكەن قانات مىرزاحان مەن ديدار قاميەۆتىڭ ءسوز تارتىستارى دا تارتىمدى شىقتى. بۇلارعا ءوز ايتىستارىنان كەيىنگى تاپسىرما قايىم ايتىس بولدى. تارىنىڭ قاۋىزىنداي ءتورت جول ولەڭگە تولعامدى ويدى سىيدىرۋ استە وڭاي ەمەس. الايدا, اقىننىڭ اقىندىعى كورىنەر ساتتە قانات پەن ديدار بۇل سىننان سۇرىنگەن جوق. قايىمداسا ايتىستى ەركىن جالعاستىردى.
ءۇشىنشى جۇپ ساحناعا شىققاندا كورەرمەندەر ىقىلاسى ەرەكشە بولدى. بۇل جولى جۇرتشىلىق الدىندا كوپتەن بەرى كورىنبەي جۇرگەن بەلگىلى ايتىسكەر بەكارىس شويبەكوۆ شىقتى. ونىڭ قارسىلاسى بۇگىندە وزىندىك وي ورامىمەن كوزگە ءتۇسىپ جۇرگەن جاقسىلىق ورىنباسار ەدى. جاقسىلىق ەلدەگى ورالماندار ماسەلەلەرىنەن وي تولعاسا, بەكارىس ءوزىنىڭ تولعامدى ويلارى مەن ۇتىمدى جاۋاپتارىنان جاڭىلعان جوق. قوس اقىن ءوز ايتىستارىنان سوڭ ەكراندا كورسەتىلگەن سۋرەتتى جىرلادى.
سارا توقتامىسوۆا مەن نۇرمات مانسۇروۆ ءتورتىنشى جۇپتا دوداعا ءتۇستى. ولار «ءبىز ءۇشىن نە قىمبات, نە ارزان؟» دەگەن تاقىرىپ توڭىرەگىندە وي تولعادى.
سوڭعى جۇپ – بالعىمبەك يماشەۆ پەن اينۇر تۇرسىنباەۆانى وقىرمانعا تانىستىرىپ جاتۋدىڭ قاجەتى بولا قويماس. جۋىردا عانا «كىل جۇيرىكتە كىم جۇيرىك؟» اتتى رەسپۋبليكالىق اقىندار ايتىسىندا باس جۇلدەنى يەلەنگەن اينۇر دا, ۇتىمدى ءسوز بەن ازىلگە بۇرا ايتىسۋدا قامشى سالدىرا قويمايتىن بالعىمبەك تە جۇمباق ايتىستىڭ كورىگىن قىزدىرا وتىرىپ, كوپ كوڭىلىنەن شىقتى.
قازىلار القاسىنىڭ ۇيعارىمىمەن اقتىق سايىسقا ديدار قاميەۆ, نۇرمات مانسۇروۆ, جانداربەك بۇلعاقوۆ, بالعىمبەك يماشەۆ جولداما الدى. دوداداعى ەرەكشەلىك سول, بۇل جولى اقىندارىمىز قۇلمامبەت ايتىسىنىڭ ۇلگىسىمەن تورتەۋى دە قاتار وتىرىپ ايتىستى. وسى تۇس زال تولى حالىق جانداربەككە دەم بەرۋمەن بولدى.
«جۇيرىكتەن جۇيرىك وزار جارىسقاندا» دەمەكشى, قازىلار القاسىنىڭ شەشىمىمەن جانداربەك بۇلعاقوۆ وسى ايتىستىڭ باس جۇلدەسىن يەلەندى. وعان سايىسقا تاعايىندالعان ءۇش ميلليون تەڭگە مەن التىن دومبىرا تابىس ەتىلدى. ال ءبىرىنشى ورىن ديدار قاميەۆكە بۇيىردى. ول ەكى ميلليون تەڭگە ولجالادى. ەكىنشى جۇلدە – ءبىر ميلليون تەڭگەنى نۇرمات مانسۇروۆ ەنشىلەسە, جۇلدەلى ۇشتىكتى بالعىمبەك يماشەۆ جەتى ءجۇز ەلۋ مىڭ تەڭگە سىيلىقپەن قورىتىندىلادى. سونىمەن بىرگە, ايتىسقا قاتىسقان بارلىق اقىندارعا بەس ءجۇز مىڭ تەڭگەدەن سىي-سياپات جاسالدى.
ۇيىمداستىرۋشىلار ايتىس ونەرىنە كوپ ەڭبەك سىڭىرگەن مەملەكەت جانە قوعام قايراتكەرى مىرزاتاي جولداسبەكوۆ پەن اقىن ءجۇرسىن ەرمانعا دا قۇرمەت كورسەتىپ, شاپان جاپتى. سونداي-اق, جاقىندا ومىردەن وزعان ايتىس ءدۇلد ۇلى ەسەنقۇل جاقىپبەكوۆ اتىنداعى جۇلدەنى «قازايتىس» سايتىنىڭ جەتەكشىسى ۇلاربەك نۇرعالىم مۇحتار نيازوۆقا تابىستادى.
شارا سوڭىندا قازىلار القاسىنىڭ توراعاسى, پارلامەنت ءماجىلىسىنىڭ دەپۋتاتى الدان سمايىل بارلىق اقىندارعا ساتتىلىك تىلەدى.
ءابدىراحمان قىدىربەك,
«ەگەمەن قازاقستان».
سۋرەتتەردى تۇسىرگەن سۇلتان سەيىتوۆ.