ارقالىق قالاسىنداعى دالا ولكەسى تاريحى وبلىستىق مۇراجايىنداعى قۇندى جادىگەرلەردىڭ ءبىرى – تورعايداعى ۇلت-ازاتتىق كوتەرىلىسىنىڭ باس ساردارى امانگەلدى يمانوۆتىڭ قانجارى.
مۋزەي قىزمەتكەرى باتىرلان ساعىنتاەۆتىڭ ايتۋىنشا, «تورعاي وڭىرىندەگى كوتەرىلىسشىلەر ابدىعاپار جانبوسىن ۇلىن حان كوتەرىپ, كەنەسارىنىڭ باس باتىرلارىنىڭ ءبىرى بولعان يمان باتىردىڭ نەمەرەسى امانگەلدى ۇدەرباي ۇلىن سارداربەكتىككە سايلاعان. 1916 جىلى 21 قازان كۇنى قازىرگى جانگەلدين اۋدانىنىڭ كولەمىندە جاتقان تاتىر كولىنىڭ جاعاسىندا جازالاۋشى وتريادتار مەن امانگەلدى ساربازدارىنىڭ اراسىندا العاشقى شايقاس بولعان. تاريحتا تاتىر شايقاسى دەگەن اتپەن قالعان كەسكىلەستە 21 جاستاعى عاپباس سالامات ۇلى اتتى جاس سارباز جازالاۋشى وتريادتىڭ بارلاۋشىسىن اتىپ جىعىپ, ءوزىنىڭ ەرلىگىمەن كوزگە تۇسەدى. عاپباستىڭ ەرلىگىنە ريزا بولعان امانگەلدى باتىر وعان ءوزىنىڭ قانجارىن سىيعا بەرگەن. عاپباس ازامات سوعىسى جىلدارىندا دا اسكەري ءىس-قيمىلدارعا بەلسەنە ارالاسىپ, ولكەدە بەيبىت عۇمىر ورناعاننان كەيىنگى كەزەڭدە حالىق سوتى, بولىستىق كەڭەستىڭ توراعاسى سياقتى جاۋاپتى قىزمەتتەردى اتقارعان. 1972 جىلى ارقالىق قالاسىنداعى دالا ولكەسى تاريحى مۇراجايى اشىلعاندا عاپباس امانگەلدى سىيعا تارتقان قانجاردى وسى مۇراجايعا تاپسىرعان. قانجاردى مۇراجايدىڭ سول ۋاقىتتاعى باسشىسى تاڭاتقان رىساەۆ قابىلداپ العان».
مۇراجايداعى قۇندى جادىگەرلەردىڭ ءبىرى سانالاتىن قانجار زلاتوۋست قارۋ-جاراق زاۋىتىندا 1863 جىلى جاسالعان. قانجار ەكى ءجۇزدى. بولاتتان جاسالىپ, سابى جەزدەن قۇيىلعان. قانجاردىڭ سابىندا جاسالعان جىلى (1863) مەن ەكى باستى سامۇرىق بەينەلەنگەن تاڭباسى بار. قانجاردىڭ ۇزىندىعى – 64 سم, ءجۇزى – 49 سم, سابى – 15 سم. ءجۇزىنىڭ ەنى – 4 سم. سالماعى – 1030 گر. قىنىنىڭ تۇبىندەگى مەتالل بولىگى ءتۇسىپ قالعان. قىننىڭ باۋى قولدان تاعىلعان.
بۇگىندە مۇراجايدىڭ قۇندى جادىگەرلەرىنىڭ ءبىرى ساناتىنداعى باتىر قانجارى 1916 جىلعى كوتەرىلىسكە ارنالعان ەكسپوزيتسيا زالىندا امانگەلدىنىڭ ءابىلحان قاستەەۆ سالعان پورترەتى, كەيكى باتىر ءۇيىنىڭ كەبەجەسى سەكىلدى كونە جادىگەرلەرمەن بىرگە ساقتاۋلى تۇر.
قوستاناي وبلىسى