اۋىل شارۋاشىلىعى مينيسترلىگىندە جەر رەسۋرستارىن باسقارۋ كوميتەتى مەن جەرگىلىكتى اتقارۋشى ورگانداردىڭ مەملەكەت باسشىسىنىڭ اۋىل شارۋاشىلىعى جەرلەرىن ءتيىمدى پايدالانۋ تاپسىرماسىنىڭ ورىندالۋ بارىسى تۋرالى القا وتىرىسى ءوتتى, دەپ حابارلايدى Egemen.kz.
اشم جەر رەسۋرستارىن باسقارۋ كوميتەتىنىڭ ءتورايىمى گ. بيمەندينا پرەزيدەنتتىڭ تاپسىرماسىنا سايكەس مينيسترلىك اۋىل شارۋاشىلىعى جەرلەرىنىڭ كوسمومونيتورينگىن ەنگىزۋ ءۇشىن زاڭنامالىق بازا دايىنداعانىن جانە پايدالانىلمايتىن جەرلەرگە سالىق مولشەرلەمەسى 20 ەسەگە ارتقانىن ايتتى.
بۇل پايدالانىلماي جاتقان جەرلەردى انىقتاۋ پروتسەسىن ەداۋىر جەدەلدەتتى. 2020 جىلى 8 ملن-داي پايدالانىلماعان گەكتار انىقتالدى, بۇل – 2016, 2017 جانە 2018 جىلدارى اتقارىلعان جۇمىس كورسەتكىشىنەن جارتى ميلليونعا ارتىق.
«مەملەكەت باسشىسى ۇلتتىق قوعامدىق سەنىم كەڭەسىنىڭ ەكىنشى وتىرىسىندا بارلىق دايىندىق جۇمىستارىن اياقتاپ, 2020 جىلى بىرقاتار وبلىستا جەردى كوسمومونيتورينگتەۋ بويىنشا پيلوتتىق جوبا ەنگىزۋدى تاپسىرعان بولاتىن. اتالعان تاپسىرماعا سايكەس كوسمومونيتورينگ بويىنشا سىناق جوباسى اقمولا, قوستاناي, شىعىس قازاقستان جانە ماڭعىستاۋ وبلىستارىندا جۇزەگە اسىرىلدى. بۇل ايماقتار كەزدەيسوق تاڭدالعان جوق, سەبەبى ءدال وسى ايماقتاردان جەر پايدالانۋ سالاسى بويىنشا ەڭ كوپ شاعىمدار كەلىپ تۇسكەن ەدى», دەدى گ. بيمەندينا.
ونىڭ ايتۋىنشا, 4 وڭىردە 8,3 ملن گا پايدالانىلمايتىن جەر انىقتالعان. ونىڭ ىشىندە 0,7 ملن گا – ەگىستىك جانە 7,6 ملن گا – جايىلىمدىق جەرلەر.
«مەملەكەتتىڭ مەنشىگىنە 4,2 ملن گا جەر قايتارىلدى, 4,8 ملن گا جەر اۋىل شارۋاشىلىعى اينالىمىنا تارتىلدى. بۇل جەردى پايدالانۋ مەن قورعاۋعا مەملەكەتتىك باقىلاۋدىڭ كۇشەيتىلگەنىن, سونداي-اق, قابىلدانىپ جاتقان شارالاردىڭ قاتاڭداتىلعانىن كورسەتەدى», دەپ تولىقتىردى جەر رەسۋرستارىن باسقارۋ كوميتەتىنىڭ ءتورايىمى.
2020 جىلدىڭ جەلتوقسانىندا پيلوتتىق جوبا ءوز جۇمىسىن اياقتادى. سىناما ءساتتى بولعاندىقتان, ۇكىمەت 2021 جىلعى 1 قاڭتاردان باستاپ بۇكىل رەسپۋبليكا اۋماعىندا «كوسمومونيتورينگتى» ەنگىزۋ تۋرالى شەشىم قابىلدادى.
سونىمەن قاتار قر اشم اۋىل شارۋاشىلىعى جەرلەرىن وندىرىستىك اينالىمعا تارتۋ ماسەلەسىن جۇيەلى شەشۋ ءۇشىن ەكى زاڭ جوباسىن ازىرلەپ ۇسىندى. ولار جەر قاتىناستارىن تسيفرلاندىرۋ, سونداي-اق پايدالانىلمايتىن اۋىل شارۋاشىلىعى جەرلەرىن تەكسەرۋ كەزەڭدەرى مەن قايتارىپ الۋ مەرزىمدەرىن 2 جىلدان 1 جىلعا دەيىن قىسقارتۋدى كوزدەيدى.
زاڭعا ەنگىزىلەتىن وزگەرىستەر - جەر زاڭناماسىن جەتىلدىرۋگە, جەر ۋچاسكەلەرىن بەرۋ ءتارتىبىنىڭ راسىمدەرىن جەڭىلدەتۋگە, جەر قاتىناستارى سالاسىنداعى قىزمەتتەردى تسيفرلاندىرۋ ارقىلى حالىقتىڭ مەملەكەتپەن ءوزارا ءىس-قيمىلىن قىسقارتۋعا باعىتتالعان.