نۇرلان نىعماتۋلين ءماجىلىستىڭ جۇمىسىن قورىتىندىلادى

پالاتا توراعاسى اتاپ وتكەندەي, دەپۋتاتتىق كورپۋستىڭ جۇمىسى تولىقتاي  تۇڭعىش پرەزيدەنتىمىز, ەلباسى نۇرسۇلتان ءابىش ۇلى نازارباەۆتىڭ ستراتەگيالىق تاپسىرمالارىن جانە مەملەكەت باسشىسى قاسىم-جومارت كەمەل ۇلى توقاەۆتىڭ باستامالارىن, سونداي-اق حالىققا جولداۋىن ساپالى زاڭدارمەن قامتاماسىز ەتۋگە ارنالدى.  ونىڭ ىشىندە, الەۋمەتتىك قورعاۋ, دەنساۋلىق ساقتاۋ, ءبىلىم, شاعىن جانە ورتا بيزنەستى قولداۋ, ەكولوگيالىق جاعدايدى جاقسارتۋ نەگىزگى باعىتتاردىڭ ءبىرى بولعانىن العا تارتقان نۇرلان نىعماتۋلين, قابىلدانعان بارلىق زاڭدار حالقىمىزدى الەۋمەتتىك قولداۋعا, ەلىمىزدى ودان ءارى  دامىتۋعا ىقپال ەتەتىنىن جەتكىزدى.  

تۇتاستاي العاندا, وسى شاقىرىلىم بارىسىندا پارلامەنت پالاتالارىنىڭ 23 بىرلەسكەن وتىرىسى, ءماجىلىستىڭ 1208 ماسەلە قارالعان 186 جالپى وتىرىسى وتكەن.   وسى ۋاقىت ىشىندە پالاتانىڭ قاراۋىندا 487 زاڭ جوباسى بولىپ, ونىڭ 432-ءسى ماقۇلدانىپ, سەناتقا جولداندى. ال, بۇگىنگى تاڭدا 391 زاڭ جوباسىنا مەملەكەت باسشىسى قول قويدى. تاعى ەرەكشە ايتا كەتەتىن جاعداي, ءماجىلىس دەپۋتاتتارى وسى شاقىرىلىمدا 60 زاڭ جوباسىنا وزدەرى باستاماشى بولدى.

سونداي-اق, ءماجىلىس «حالىق دەنساۋلىعى جانە دەنساۋلىق ساقتاۋ جۇيەسى تۋرالى», «ەكولوگيالىق كودەكس», «اكىمشىلىك راسىمدىك-پروتسەستىك كودەكس» جانە سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى (سالىق كودەكسى), سونداي-اق, كەدەندىك رەتتەۋ جانە جەر قويناۋى جانە جەر قويناۋىن پايدالانۋ تۋرالى التى ماڭىزدى كودەكستى قابىلدادى. سونىمەن قاتار, ءماجىلىس توراعاسى نۇرلان نىعماتۋلين شاقىرىلىم بارىسىندا «Nur Otan», «اق جول», «حالىق كوممۋنيستەرى» پارتيالارىنىڭ فراكتسيالارى مەن قازاقستان حالقى اسسامبلەياسىنىڭ دەپۋتاتتىق توبى بەلسەندى جۇمىس ىستەگەنىن ايتا كەلىپ:   - ەرەكشە ايتۋ كەرەك, ءبىزدىڭ دەپۋتاتتىق كورپۋس ەلدە قالىپتاسقان جاعداي كەزىندە دە, كارانتين كەزىندە ءوز جۇمىسىن ءبىر كۇنگە توقتاتقان جوق. قايتا, زامانعا ساي تەحنولوگيالاردى پايدالانىپ, ءتيىمدى  جۇمىس جاسادىق, - دەدى نۇرلان نىعماتۋلين. ءماجىلىس قىزمەتى بارىسىندا حالىق كوتەرگەن ناقتى ماسەلەلەردى شەشۋگە ۇنەمى كوڭىل ءبولىپ كەلەدى. وسى بەس جىل ىشىندە ماجىلىسمەندەر 1150 دەپۋتاتتىق ساۋال جولداپ, تۇرعىنداردان 23 700-گە جۋىق حات كەلىپ, ءتيىستى جاۋابى قايتارىلعان.

سونداي-اق, دەپۋتاتتار وڭىرلەردى ارالاپ, 17 مىڭنان استام كەزدەسۋلەر ۇيىمداستىرىپ, 1 ملن.استام حالىقپەن كەزدەسۋلەر وتكىزدى. نۇرلان نىعماتۋلين التىنشى شاقىرىلىمداعى پارلامەنت ءماجىلىسىنىڭ جۇمىسى اشىق تا ناتيجەلى بولعانىن اتاپ ءوتىپ, زاڭ جوبالارىن تالقىلايتىن جۇمىس توپتارىنىڭ قۇرامىنا پارلامەنتتىك ەمەس پارتيالاردىڭ, ۇكىمەتتىك ەمەس ۇيىمدار مەن قوعامدىق بىرلەستىكتەردىڭ وكىلدەرى شاقىرىلاتىنىن اتاپ ءوتىپ, ءماجىلىستىڭ جالپى وتىرىستارى, كوميتەتتەردىڭ جيىندارى بەدەلدى اقپاراتتىق سايتتاردا, پورتالداردا ونلاين تۇردە كورسەتىلەتىنىنە توقتالدى.

وتىرىستى قورىتىندىلاعان ءماجىلىس توراعاسى دەپۋتاتتارعا ەلىمىزدىڭ زاڭنامالىق بازاسىن جەتىلدىرىپ, وتاندىق پارلامەنتاريزمدى دامىتۋعا قوسقان ەلەۋلى ۇلەستەرى ءۇشىن, سونداي-اق, زاڭ شىعارۋ پروتسەسىنە بەلسەندى ارالاسقان بارلىق مەملەكەتتىك ورگانداردىڭ, ازاماتتىق قوعامنىڭ, ساراپتامالىق قوعامداستىقتىڭ وكىلدەرىنە العىسىن ءبىلدىردى.