ءومىرى ونەرمەن بىتە قايناسىپ جاتقان سەمەي قالاسىنىڭ حالقى جاڭا 2021 جىلدى قارسى الۋعا ەرەكشە دايىندالىپ جاتىر. ارينە, ەلدەگى جاعدايعا بايلانىستى مەرەكەلىك كونتسەرتتەردىڭ بولمايتىنى انىق. بىراق ف.دوستوەۆسكي اتىنداعى ادەبي-مەموريالدىق مۋزەيدە «بىلتىرعى قار-2020» اتتى كورمە اشىلدى.
تاريحي مۋزەيدە ۇيىمداستىرىلعان كورمەگە 200-دەن استام ءارتۇرلى جاڭاجىلدىق اتريبۋت قويىلعان. كورمە سورەلەرى زاماناۋي شىرشا ويىنشىقتارىمەن قاتار, كەڭەستىك كەزەڭنىڭ كوزىندەي انتيكۆاريات دۇنيەلەرمەن تولىقتىرىلعان.
بۇرىن-سوڭدى ۇيىمداستىرىلماعان كورمەگە كەلۋشىلەر جاڭا جىل قارساڭىندا جازىلعان كونە حاتتاردى, XIX عاسىردىڭ اياعىنان باستاپ, بۇگىنگى كۇنگە دەيىنگى شىرشانى بەزەندىرۋگە ارنالعان زاتتاردى كورە الادى.
– ەرەكشە اسەردەمىن. بەينەبىر بالالىق شاعىما قايتا ورالعانداي سەزىمدە تۇرمىن. ول زاماننىڭ سالتى بويىنشا تۋعان-تۋىستارعا, جورا-جولداستارعا اق پاراققا اق تىلەگىمىزدى اقتارىپ وتىرىپ حات جازۋشى ەدىك. مىنە, كورمەدە سول زاماننىڭ اشىقحاتتارىن, شىرشاعا ىلەتىن كەڭەستىك ويىنشىقتاردى كورىپ, بالا كۇنىم ەسكە ءتۇستى, – دەيدى مەكتەپ مۇعالىمى لاۋرا قاجانوۆا.
كورمەنى ۇيىمداستىرۋشى ۆلاديميرا سولوۆەۆانىڭ ايتۋىنشا, جاڭاجىلدىق سارعايعان حاتتاردىڭ, ويىنشىقتاردىڭ ءوز تاريحى بار ەكەن.
سونىمەن قاتار «بىلتىرعى قار-2020» اتتى كورمەدەن جەرگىلىكتى قولونەرشىلەر جاساعان جاڭاجىلدىق زاتتار دا ورىن تاپقان. وتكەن عاسىر مەن بۇگىنگى زاماندى ۇشتاستىرا ۇيىمداستىرىلعان كورمە 2021 جىلدىڭ 20 قاڭتارىنا دەيىن جالعاسادى. كورمەنى تاماشالايمىن دەۋشىلەر, شەكتەۋ شارالارىنا وراي الدىن الا تەلەفون ارقىلى جازىلىپ, بەلگىلەنگەن ۋاقىتتا عانا كەلۋلەرىنە رۇقسات.
سەمەي