الماتىنىڭ تۇركسىب اۋدانىندا دۇكەنگە قاراقشىلىق شابۋىل جاسالدى, دەپ حابارلايدى Polisia.kz.
شابۋىل تۋرالى حابار "102" نومىرىنە 27 جەلتوقسانعا قاراعان ءتۇنى ءتۇستى. پاترۋلدىك جاساق بىردەن كورسەتىلگەن مەكەنجايعا بارعان. پوليتسەيلەردى دۇكەندە 72 جاستاعى ايەل قارسى الدى.
جابىرلەنۋشىنىڭ ايتۋىنشا, دۇكەنگە مەديتسينالىق بەتپەردە تاققان ءتورت ادام باسا-كوكتەپ كىرىپ كەلگەن. قاسكويلەر زەينەتكەردى تاپانشامەن قورقىتقان, اسپانعا ءبىر رەت وق اتىپ, اقشا تالاپ ەتكەن.
وسىدان كەيىن قاراقشىلار قوسالقى ءۇي-جايدا تاعى بىرنەشە ساتۋشى جۇرگەنىن كورىپ, قاشىپ كەتتى.
بۋران-288 پاترۋلدىك پوليتسياسىنىڭ ەكيپاجى ەكى كۇدىكتىنى ءىزىن سۋىتپاي ۇستادى. ولار جيىرما جاستا, قازىر ۋاقىتشا قاماۋ يزولياتورىندا وتىر.
تۇركسىب اۋدانى پوليتسيا باسقارماسىنىڭ باسشىسى ەركىن امانتاەۆتىڭ ايتۋىنشا, ءتىنتۋ بارىسىندا فيگۋرانتتاردىڭ بىرىنەن پنەۆماتيكالىق تاپانشا تابىلدى.
قالعان ەكى كۇدىكتىنىڭ كىم ەكەنى انىقتالىپ جاتىر. اتالعان دەرەك قىلمىستىق كودەكستىڭ 192-بابى 2-تارماعى بويىنشا سوتقا دەيىنگى تەرگەۋدىڭ بىرىڭعاي رەەسترىنە تىركەلدى.
كۇدىكتىلەر مۇلكى تاركىلەنىپ, بەس جىلدان ون جىلعا دەيىن باس بوستاندىعىنان ايىرىلۋى مۇمكىن.