مەملەكەت باسشىسى قاسىم-جومارت توقاەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋ ماقساتىندا تۇركىستان وبلىسىنىڭ بارلىق اۋداندارىندا حالىقتىق كەڭسەلەر اشىپ, تۇرعىندارعا كەدەرگىسىز قىزمەت كورسۋ كوزدەلگەن. سارىاعاش اۋدانىندا «حالىقتىق كەڭسە» اشىلۋى دا وسى باعىتتا اتقارىلعان جۇمىستاردىڭ ءبىرى, دەپ حابارلايدى Egemen.kz
سىبايلاس جەمقورلىققا قارسى ءىس-قيمىل اگەنتتىگى تۇركىستان وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى ميراس قارعاباي مەن اۋدان اكىمى مۇحيت وتارشيەۆتىڭ قاتىسۋىمەن اشىلعان «حالىقتىق كەڭسەدە» تۇرعىندارعا قولجەتىمدى, اشىق جانە جەدەل قىزمەت كورسەتەتىن 7 دەربەس ءبولىم بار.
اتاپ ايتساق, ءبىلىم, جەر قاتىناستارى, اۋىلشارۋاشىلىق, تۇرعىن-ءۇي كوممۋنالدىق شارۋاشىلىعى, ەكونوميكا جانە قارجى, ساۋلەت جانە قالا قۇرىلىسى, جۇمىسپەن قامتۋ جانە الەۋمەتتىك باعدارلامالار بولىمدەرى بويىنشا 90 مەملەكەتتىك قىزمەت ءتۇرى كورسەتىلىپ, تۇرعىنداردىڭ كەدەرگىسىز قىزمەت الۋىنا جاعداي جاسالعان.
سونداي-اق ەلەكتروندىق تسيفرلىق قولتاڭبا (ەتسق) الۋعا, جاردەماقى تاعايىنداۋعا ءوتىنىش, تۇرعىن ءۇي كەزەگىنە تىركەلۋ, جەر, ءۇي قۇجاتتارىن زاڭداستىرۋعا كومەك بەرەتىن قولايلى قىزمەتتەر قاراستىرىلعان.
اۋدان اكىمى مۇحيت وتارشيەۆ اشىلۋ راسىمىندە «حالىقتىق كەڭسە» الداعى ۋاقىتتا مەملەكەتتىك قىزمەت كورسەتەتىن مەكەمەلەردى ءبىر جەردە شوعىرلاندىرىپ قانا قويماي, جەرگىلىكتى اتقارۋشى ورگانداردىڭ تۇرعىندارمەن اشىقتىق قاعيداتىنا نەگىزدەلە وتىرىپ جۇمىس ىستەۋىنە ىقپال ەتەتىنىن اتاپ ءوتتى.