«Egemen Qazaqstannyń» 16 جەلتوقسان كۇنگى سانىندا «ليتەرمەن كەلگەن...» دەگەن تاقىرىپپەن جەلتوقسان قاھارماندارىنىڭ سوتىنان تۇسىرىلگەن سۋرەتكە قاتىستى ماقالا باسىلدى.
مەنىڭ وعان قوساتىنىم دا سول وقيعاعا ۇقساس. مەن ول كەزدە قاراعاندى وبلىستىق «ورتالىق قازاقستان» گازەتىنىڭ ءبولىم مەڭگەرۋشىسى ەدىم. وبلىستىق گازەتتىڭ كىتاپحاناسى بارلىق وبلىستىق گازەتتەردى جازدىرىپ الاتىن. كىتاپحاناعا كەلىپ جاتقان گازەتتەر ءۇيىلىپ جاتادى. ءبىر كۇنى كىتاپحاناعا بارىپ, «جەتىسۋ» گازەتىن قاراسام, قايرات باستاعان ءتورت جىگىتتىڭ سۋرەتى شىعىپتى. جىگىتتەر قاسقايىپ تۇر. سۋرەتكە تاڭعالىپ, بولمەلەردى ارالاتىپ ءجۇرىپ, ارىپتەستەرىمە كورسەتىپ شىقتىم دا, گازەتتى كىتاپحاناعا اپارىپ قويدىم. ەرتەڭىندە كگب-دان كەلىپ جۇرەتىن جىگىت (سىرتىنان تانيمىز) كىتاپحاناعا كەلىپ كەتىپتى. سودان كەيىن رەداكتورىمىز تىلەۋحان ءجۇسىپوۆ كىتاپحاناشىنى شاقىرتىپ, «جەتىسۋ» گازەتىنىڭ سول ءنومىرىن سۇراتادى. گازەت ورنىندا جوق بولىپ شىعادى. مەن «كورگەنىمدى, باسقالارعا كورسەتكەنىمدى ايتتىم, ورنىنا اپارىپ قويدىم», دەدىم.
كگب قىزمەتكەرى ەرتەڭىنە تاعى كەلىپ, گازەتتى ىزدەتتى.
وسىلايشا ءبىر الەك بولعانىمىز بار. سول 1987 جىلعى جەلتوقساننىڭ سوڭعى كۇندەرى قازاق جۋرناليستەرى كورگەن كۇنىمىز قاراڭ بولعانىن ۇمىتپايمىن. وزىمىزبەن كورشى, ءبىر-ەكى قابات قانا جوعارى تۇراتىن ورىس گازەتىنىڭ جۋرناليستەرى بىزگە, كادىمگى جاۋىنداي قاراپ وتەدى. سالەمدەسپەيدى دە. قازتاگ-تان قازاقتى اشكەرەلەگەن ماتەريالدار ءتۇسىپ جاتادى. «يندۋستريالنايا كاراگاندى» كۇندە باسادى. «ورتالىق...» كەشىكتىرگەن بولادى. كەيدە رەداكتورىمىز شاقىرىپ الىپ اقىلداسادى, قازتاگ-تىڭ ورىسشادان اۋدارىلعان ماتەريالىن الدىنا جايىپ قويىپ «مىنانى نە ىستەيمىز», دەيدى. «بەرمەيىك» دەيمىز. ارينە, كەيدە «بەرمەيىك» دەۋىن دەسەك تە, دارمەن جوق, وبكومنان قورقىپ بەرەمىز. گازەتتىڭ سول ءنومىرىن اشپايمىز دا, جيىركەنىپ وتىرامىز. سونداي كۇن بولعان...
زارقىن تايشىباي