الەمدىك اقپارات كوزدەرىندە ۇلىبريتانيادا COVID-19-دىڭ بۇرىنعىدان دا قاۋىپتى جاڭا شتامى پايدا بولعانى جايلى حابار تاراعالى كارى قۇرلىقتان مازا كەتكەن.
ۆيرۋستىڭ جاڭا شتامى جايىنداعى اقپارات 14 جەلتوقساندا شىعا باستادى. ەلدىڭ پرەمەر-ءمينيسترى بوريس دجونسون 20 جەلتوقساندا لوندوندا, شىعىس, وڭتۇستىك شىعىس جانە ۋەلس ايماقتارىندا لوكداۋن جاريا ەتىسىمەن ەۋروپانىڭ بىرقاتار مەملەكەتى ۇلىبريتانيامەن اراداعى بارىس-كەلىسكە شەكتەۋ قويا باستادى. اتاپ ايتقاندا, گەرمانيا دەنساۋلىق ساقتاۋ ءىسىنىڭ باسشىسى يەنس شپان ۇلىبريتانيادان دۇيسەنبى كۇنى, ياعني 21 جەلتوقساننان باستاپ اۋە بايلانىسىنىڭ توقتايتىنىن حابارلاسا, فرانتسيا 48 ساعاتقا بىرىككەن كورولدىكتەن جولاۋشى جانە جۇك تاسىمالىن دوعارا تۇرۋدى شەشكەن.
سونىمەن قاتار نيدەرلاند مەملەكەتى اۋە جانە تەمىرجول قاتىناسىن جاڭا جىلدىڭ باسىنا دەيىن ۇزەتىنىن مالىمدەپ, يتاليا ۇكىمەتى دە ارالعا سوڭعى ەكى اپتا ىشىندە بارعان ءوز ازاماتتارىنا ەلگە قايتا كىرۋدى كەيىن شەگەرۋ قاجەتتىگىن ايتىپ, ەكى اراداعى اۋە بايلانىسىنىڭ توقتاتىلاتىنىن حابارلادى. بەلگيا كورولدىگى دە ەتەك-جەڭىن قىمتاپ, ۇلىبريتانيامەن ۇشاق قاتىناسىن ازىرگە توقتاتاتىنىن مالىمدەگەن.
يتالياداعى دەنساۋلىققا جاۋاپ بەرەتىن ۆەدومستۆونىڭ حابارلاۋىنشا, جاڭا شتامنىڭ جۇعۋ جىلدامدىعى بۇرىنعىدان الدەقايدا جوعارى كورىنەدى. قاۋىپتى شتامعا قاتىستى قادامداردى ەو-عا مۇشە ەلدەردىڭ بارلىعى قابىلداپ جاتىر. ماسەلەن, ەستونيا مەن لاتۆيا دا جىلدىڭ سوڭىنا دەيىن ۇلىبريتانيامەن اراداعى اۋە قاتىناسىن توقتاتا تۇرماقشى.
جاڭا شتامم ەو قۇرامىنان باس تارتقان ۇلىبريتانيانى وقشاۋلاۋدا كارى قۇرلىقتاعى وداقتاستار ءۇشىن «قۇلاننىڭ قاسىنۋىنا, مىلتىق شۇرىپپەسىنىڭ باسىلۋىنا» ساياتىنداي جاقسى ءبىر تەتىك بولعانعا ۇقسايدى.