اتىراۋدا «براندو» اتالاتىن زاۋىت بار. بۇعان دەيىن ءبىر رەتتىك شپريتستەر شىعارعان ەدى. ەندى بۇل زاۋىتتا جىلىنا 30 ملن مەديتسينالىق بەتپەردە شىعارىلماق.
قاۋىپتى ىندەتتىڭ ءبىرىنشى تولقىنىندا بۇل وڭىردە دە مەديتسينالىق بەتپەردەنىڭ تاپشىلىعى بايقالدى. كەيبىر ءدارىحانالاردا ونىڭ باعاسى شارىقتاپ, 500 تەڭگەدەن استى. ەل-جۇرت قينالعان سونداي ساتتە ءبىر رەتتىك شپريتستەر مەن وزگە دە پرەپاراتتى تەگىن تاراتقان زاۋىتتىڭ قۇرىلتايشىسى ماحمۋت مەراليەۆ ەندى مەديتسينالىق بەتپەردە شىعارۋعا بەت بۇردى. ونىڭ بۇل جوباسى ۇكىمەت تاراپىنان قولداۋ تاۋىپ وتىر. ەندى مەديتسينالىق ماسكانىڭ العاشقى پارتياسى تاۋەلسىزدىك كۇنى قارساڭىندا ساتىلىمعا تۇسەدى.
– قازىر مەديتسينالىق بەتپەردە شىعارۋدى قولعا العان «دوكتور حاۋس» جشس-دا 20 ادام جۇمىس ىستەيدى. ءبىر رەتتىك مەديتسينالىق بەتپەردە توقىلماعان ماتەريالدان تىگىلەدى. ونى پايدالانۋ ۋاقىتى – 2 ساعات. ەرەسەكتەرگە ارنالعان ءۇش قاباتى بار قورعانىش بەتپەردەنىڭ جىلىنا 30 ملن داناسى شىعارىلادى, – دەيدى زاۋىتتىڭ باس ينجەنەرى مۇحتار ماحمەتوۆ. – بولاشاقتا بالالارعا ارنالعان بەتپەردە دە دايىندالادى.
ونىڭ ايتۋىنشا, قازىر بەتپەردە دايىندايتىن ەكى جەلى جۇمىس ىستەپ تۇر. ەندى جاقىندا ءۇشىنشىسى ىسكە قوسىلادى. ال ءتورتىنشى جەلى كورشىلەس رەسەيدەن كەلە جاتىر. زاۋىتتىڭ قۋاتى ايىنا 1 ميلليون 800 مىڭ دانا بەتپەردە شىعارۋعا ەسەپتەلىپتى.
– ءبىزدىڭ ماقساتىمىز – ساپالى بەتپەردە شىعارۋ. سول سەبەپتەن بەتپەردەنىڭ ساپاسى ءجىتى تەكسەرىلەدى. ارنايى قاپتاماعا 50 دانادان توپتاپ سالامىز. ءبىر قوراپتا 2 مىڭ داناسى بار, – دەيدى زاۋىتتىڭ اۋىسىم باسشىسى ريزا جالمۇرزينا.