الەمدى ابىگەرگە سالعان ىندەت ەلىمىزدىڭ دە شەكاراسىن اينالىپ وتپەگەنى انىق. سول سەبەپتى الەۋمەتتىك سالاداعى جۇمىستار دا وزگەشە سيپات الدى. نەگە دەسەڭىز, وسى ۋاقىتقا دەيىنگى جوسپارلانعان ءتۇرلى جوبالار, ماقساتتار مەن يدەيالار تۇرالاپ قالدى.
اتقارىلۋعا ءتيىس اۋقىمدى شارالار توقتاتىلدى. دەسەك تە ۇكىمەت وسىنداي تۇتقيىلدان كەلگەن ىندەتكە ءتيىستى شارالار قولدانىپ, ەل-جۇرتتى امان ساقتاپ قالۋ جولىندا ىرگەلى ىستەر اتقارعانىن ايتىپ ءوتۋ كەرەك. حالىقتىڭ باسىم بولىگى اۋىرىپ, اۋىرعاندار ايىعىپ, قۇربان بولعاندارى دا بار ەكەنىن بىلەمىز. جالپى العاندا مەملەكەت ءولىم-ءجىتىم سانىنىڭ از بولۋىن قامتاماسىز ەتۋ ءۇشىن الەۋمەتتىك سالا توڭىرەگىندە جۇيەلى جۇمىستار جۇرگىزدى.
الەۋمەتتىك پسيحولوگيالىق تۇرعىدان حالىقتىڭ كوزى ەندى اشىلدى ما دەپ ويلايمىن. وعان سەبەپ – ىندەتپەن بىرگە كەلگەن ءتۇرلى جاڭاشىلدىقتار مەن قۇبىلىستار.
ءومىردىڭ ءوزى كۇرەس پەن مايدان دەيمىز عوي, بۇل ەندى ەكى ەسەلەنە تۇسەرى حاق. حالىق سونى تۇسىنگەن سياقتى. سونىمەن قاتار وسى ۋاقىتقا دەيىن «دەنساۋلىق – زور بايلىق» دەپ اۋىزشا ايتقانىمىزبەن, جۇرەكپەن ءھام سانامەن سەنۋ بولمادى. اۋرۋ اسقىنعاندا دارىگەرگە كورىنەتىنىمىز شىندىق, دەي تۇرعانمەن ءوزىمىزدىڭ ءتان ساۋلىعىمىزعا ءمان بەرىپ, اۋىرىپ ەم ىزدەگەنشە, اۋىرمايتىن جول ىزدەيتىن دارەجەگە جەتكەندەيمىز. دەنساۋلىق بۇعان دەيىن ادامي قۇندىلىقتار ساناتىنىڭ ۇشتىگىنە ەنسە, بۇل جولى دا سول بيىگىنەن تۇسكەن جوق. كەرىسىنشە ادامدار ونىڭ قادىر-قاسيەتىن تەرەڭ تۇسىنگەندەي. ەلدەگى ازاماتتار كوبى تابىسىنان ايىرىلعانىنا قاراماستان, امان-ەسەن جۇرگەنىنە, ءبىر جۇتىم اۋانى ەمىن-ەركىن جۇتقانىنا شۇكىر ەتىپ, تاۋبەسىنە كەلىپ وتىر. سەبەبى كورىنبەيتىن جاۋمەن سوعىسا ءجۇرىپ امان قالۋدىڭ ءوزى ۇلكەن ولجا بولدى.
مەملەكەت دامۋىنىڭ ءار سالاسىنا اسەر ەتكەن پاندەميا كەمشىلىگىمىزدى دە, جەتىسپەۋشىلىگىمىزدى دە ايقىنداپ بەرگەن سياقتى. بىزدە وقۋ سالاسىنداعى ولقىلىقتار مەن كەمشىن تۇستارىمىزدى سارالاپ, توتەپ بەرۋ ءۇشىن ءتۇرلى امال-تاسىلدەر ويلاستىرىپ جاتىرمىز. قاشىقتان وقىتۋ نەمەسە ونلاين وقىتۋدى ءبىلىم سالاسىندا بۇرىندا قولدانعانبىز, بىراق تولىق مەڭگەرمەگەن ەكەنبىز. تەحنيكالىق, مەتوديكالىق-ديداكتيكالىق جاعىنان وقىتۋشىلار قاۋىمى بەيعام ءجۇردى. سەبەبى بۇل بۇرىن اسا قاجەتتىلىك تۋدىرمادى. بۇرىن ينفورماتيكا بىرەۋدىڭ كاسىبى, بىرەۋدىڭ ماماندىعى بولدى. قازىرگى ۋاقىتتا ءبارىمىز ءبىرىنشى ينفورماتيك, سودان كەيىن بارىپ عالىم نەمەسە جۋرناليست بولۋىمىز كەرەك. پاندەميا جۇرتقا ينفورماتيكانىڭ جەكە-دارا كاسىپ ەمەس ەكەنىن, كەرىسىنشە قوعامدىق قولدانبالى داعدىمىز ەكەنىن ۇيرەتتى. سول ارقىلى ءبىلىمىڭدى, بىلگەنىڭدى, قارىم-قابىلەتىڭدى كورسەتەتىن دەڭگەيگە جەتكىزدى.
رامازان ساتتار ۇلى,
الەۋمەتتانۋ عىلىمدارىنىڭ
كانديداتى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ دوتسەنتى