بيىلعى قىس سولتۇستىك قازاقستاندا ازىرگە جايلى بولىپ تۇر. قار دا ءالى از ەدى. تەك كەشەدەن باستاپ قانا قار مولىنان ءتۇسىپ, اق بوران ۇدەتىپ تۇر, دەپ حابارلايدى Egemen.kz
سارىارقانىڭ تورىندەگى مۇنداي اق بوراندار دايىندىعى جوق, قىسقا يكەمسىز جانداردى بىردەن تابادى. تاجىكستاننان شىعىپ رەسەيدىڭ تۇمەن وبلىسىنا جەمىس الىپ بەت العان ەكى تاجىك ازاماتىن دا اق بوران سولتۇستىك قازاقستان جەرىندە بيىلدىققا العاشقى رەت «ۇستاپتى». قىستىق سولياركا قۇيماعان ولاردىڭ كولىكتەرى پەتروپاۆل – قوستاناي تراسساسىندا تۇرىپ قالعان. جەڭىل كيىنگەن جىلى جەردىڭ ەكى ازاماتى بوراننان كەيىنگى 20 گرادۋستىق سۋىق ىزعاردا قويۋلانا تۇسكەن ءتۇن قاراڭعىلىعىمەن ءۇسىپ قالارى ءسوزسىز ەدى. بىراق ولاردىڭ ءبىرىنىڭ ەسىنە وسىندايدا كومەككە كەلەتىن 112 ءنومىرى ءتۇسىپ, تەلەفون سوعادى.
15 ءمينوت شاماسىندا جەتىپ كەلگەن تج ءبولىمىنىڭ قىزمەتكەرلەرى ساعىندىق ءماجيتوۆ پەن جانات مۇمەمبەتقاليەۆ قىسىلعاندارعا قول ءۇشىن سوزادى. ولار جولاۋشىلاردىڭ «مەرسەدەس – بەنتس» كولىگىن ەڭ جاقىن اۋدان ورتالىعى – پرەسنوۆكاعا سۇيرەپ اپارۋدى ۇيىمداستىرادى. ونداعى ءورت ءسوندىرۋ ءبولىمىنىڭ جىلى بوكسىندا ماشينا جوندەلىپ, قىسقى سولياركا قۇيىلادى. ەرىندەرى ەرىندەرىنە تيمەي دىرىلدەگەن ۋميدجون مەن فيرۋزدجونعا ىستىق شايمەن جىلى تاماق بەرىلىپ, بويلارىن جىلىتادى. اقىرى تاجىكستان ازاماتتارى ءبىزدىڭ جىگىتتەرگە العىستارىن شەكسىز جاۋدىرىپ, ۇزاماي جولعا شىعادى.
سولتۇستىك قازاقستان وبلىسى