اقتوبەدە 24 جاستاعى قىزدىڭ سومكەسىندەگى 2,5 ميلليون تەڭگەنى ۇرلاپ كەتكەن جىگىت ۇستالىپ, قاماۋعا الىندى, – دەپ حابارلايدى Polisia.kz.
اعىمداعى جىلدىڭ 15 جەلتوقسانىندا ساعات 15.55 شاماسىندا “102” تەلەفون ارقىلى 101 اتقىشتار بريگاداسى كوشەسىندەگى كافەلەردىڭ بىرىندە بەلگىسىز بىرەۋ 24 جاستاعى قالا تۇرعىنىنىڭ ۇستەل ۇستىندە جاتقان سومكەسىندەگى اقشاسىن اشىق تۇردە ۇرلاپ كەتكەندىگى تۋرالى حابارلاما ءتۇستى. كەلگەن پاترۋلدىك پوليتسيا ناريادتارىنا جابىرلەنۋشى ريۋكزاكتا 4.100 اقش دوللارى, 824 مىڭ تەڭگە سوماسىندا اقشا بولعاندىعىن حابارلادى. جالپى شىعىن 2,5 ميلليون تەڭگەنى قۇرادى.
قابىلدانعان جەدەل-ىزدەستىرۋ ءىس-شارالارىنىڭ ناتيجەسىندە كۇدىكتى انىقتالىپ, كۇدىكتى قىلمىس جاسالعاننان كەيىن بقو, ورال قالاسىنا كەتىپ قالعان. جەدەل تۇردە كورشى وبلىسقا جەدەل ۋاكىلدەر شىعىپ, ورال قالاسىنىڭ 32 جاستاعى تۇرعىنىن ۇستاپ, پوليتسيا بولىمىنە جەتكىزدى.
اتالعان فاكتى قر قك 191-باپتىڭ 3-بولىگى (توناۋ) بويىنشا سوتقا دەيىنگى تەرگەۋ امالدارى جۇرگىزىلۋدە. كۇدىكتى قر قىجك-ءنىڭ 128-بابىنا سايكەس اقتوبە قالاسىنىڭ ۋۇي-نە قاماۋعا الىندى.