جامبىل وبلىسى نەگىزىنەن اۋىل شارۋاشىلىعى سالاسىنا قولايلى ايماق بولعاندىقتان, مۇندا اسىراۋشى سالانى العا باستىراتىن باستامالار كوپ. ولار مەملەكەت قولداۋىنىڭ ناتيجەسىندە جىل سايىن وركەن جايىپ, ورىستەپ كەلەدى. ماسەلەن, مويىنقۇم اۋدانىندا ورنالاسقان «اگروفيرما تۇرىكپەن» جشس بۇل كۇندە اسىل تۇقىمدى مال باعىپ, سانىن كوبەيتۋمەن اينالىسۋدا.
بۇگىندە تىرلىگى تىكتەلىپ, شارۋاسى شالقىعان سەرىكتەستىك مال باسىن كوبەيتىپ قانا قويماي, جەرگىلىكتى جۇرتشىلىقتى دا جۇمىسپەن قامتۋدا. اتالعان شارۋاشىلىق وسىدان 20 جىل بۇرىن, ياعني 2000 جىلى قۇرىلعان ەكەن. ءناسىبىن كاسىپتەن تاۋىپ وتىرعان شارۋاشىلىق باسشىسى باۋىرجان ابىلداەۆ كاسىبىن دامىتىپ قانا قويماي, ەڭبەك ادامدارىنا دا ءتيىستى جاعداي جاساپ وتىر. بۇگىندە «اگروفيرما تۇرىكپەن» شارۋاشىلىعىندا 74 ادام جۇمىس ىستەيدى. مالشىلاردىڭ ورتاشا ايلىعى – 180 مىڭ تەڭگە.
قازىرگى كەزدە اتالعان شارۋاشىلىقتا مال سانى 6 225 باس ءمۇيىزدى ءىرى-قاراعا جەتكەن. سونداي-اق سەرىكتەستىكتە 724 باس جىلقى جانە 680 باس ۇساق قارا مال باسى بار. ونىڭ ىشىندە 5 334 باس قالماق سيىرى مەن 930 باس قازاقتىڭ اقباس سيىرى بار. ال 2015-2020 جىلدار ارالىعىندا سالىنعان جالپى ينۆەستيتسيا كولەمى 3 ميلليارد تەڭگەدەن اسقان. ونىڭ ىشىندە اسىل تۇقىمدى مال ساتىپ الۋعا 2,5 ميلليارد تەڭگە ينۆەستيتسيا سالىنعان. سونىمەن قاتار تەحنيكا ساتىپ الۋعا 200 ميلليون, ال قوراجاي, قۇدىق, ۇڭعىما جانە مالشىلار ءۇيىن سالۋعا 400 ميلليون تەڭگە كولەمىندە قارجى جۇمسالعان. اۋىلشارۋاشىلىق ماقساتىندا 6 بىرلىك تراكتور, 13 بىرلىك تىركەمەلى شالعى, جاتكا, پرەسس-جيناۋشى, تيەگىش, اربا جانە تىرما بار. سونداي-اق 4 بىرلىك كاماز, HOWO, Huanghe اۋىر جۇك كولىگى الىنعان. اتالعان شارۋاشىلىقتا 131 زيل, 12 جەڭىل اۆتوكولىك جۇمىس ىستەيدى. جالپى, جەر كولەمى 12 508 0,44 گەكتاردى قۇرايدى. ونىڭ ىشىندە 120 192,26 گەكتار جايىلىم, 4 888,18 گەكتار ەگىستىك جەر بار. تالاي جىلدان بەرى تىنىمسىز ەڭبەك ەتىپ كەلە جاتقان سەرىكتەستىك بۇل كۇندە دامىعان, كوركەيگەن شارۋاشىلىقتاردىڭ قاتارىندا.
ەڭبەك ادامدارىنىڭ ەرلىكپەن بىردەي ەسەلى ەڭبەگى ەل باسشىلىعىنىڭ تاراپىنان دا ءتيىستى دەڭگەيدە باعالانۋدا. بيىل مەملەكەت باسشىسىنىڭ جارلىعىمەن «اگروفيرما تۇرىكپەن» جاۋاپكەرشىلىگى شەكتەۋلى سەرىكتەستىگى «قۇرمەت» وردەنىمەن ماراپاتتالدى. جوعارى مارتەبەلى سىيلىقتى تاۋەلسىزدىك كۇنىنە وراي تاراز قالاسىنداعى «بالاساعۇن» ورتالىق كونتسەرت زالىندا وتكەن سالتاناتتى جيىندا جامبىل وبلىسىنىڭ اكىمى بەردىبەك ساپارباەۆ اتالعان سەرىكتەستىكتىڭ باسشىسى باۋىرجان ابىلداەۆقا ارنايى تاپسىردى. بۇل قۇرمەت تە تالاي جىلعى توككەن تەردىڭ, ايانباي ەتكەن ەڭبەكتىڭ جەمىسى ەكەنىندە داۋ جوق.
جامبىل وبلىسى