وتكەن مەرەكە كۇندەرى ءبىر توپ قازاقستاندىق بوكسشى نۇر-سۇلتاندا جانە الماتىدا وتكەن كاسىپقوي بوكس كەشىندە شارشى الاڭعا شىعىپ, قازاقستاندىق بوكس جانكۇيەرلەرىن جىگەرلى جەڭىستەرىمەن قۋانتتى.
16 جەلتوقساندا ەلوردادا ۇيىمداستىرىلعان بوكس كەشىنىڭ باستى جەكپە-جەگىندە ونەر كورسەتكەن اي̆دوس ەربوسىن ۇلى (15-0, 10 كو) گانالىق يسا ساميرمەن (19-1, 16 كو) جۇدىرىقتاسىپ, وزىنە تيەسىلى WBC Asia, WBA International جانە WBO Global بەلدىگىن قورعاپ قالدى. ەكىنشى ورتا سالماقتا وتكەن جەكپە-جەك نەبارى ءۇشىنشى راۋندتا وتانداسىمىزدىڭ جەڭىسىمەن اياقتالدى. سونىمەن قاتار وسى كەشتىڭ اندەركاردىندا باق سىناعان جەرلەستەرىمىز دانيل سەمەنوۆ, ەۆگەني پاۆلوۆ, اۋەسقوي بوكستاعى الەم چەمپيونى بەكزات نۇرداۋلەتوۆ جانە ازيا چەمپيونى بەك نۇرماعانبەت كەزەكتى جەڭىستەرىنە قول جەتكىزدى.
بوكستان ۇلتتىق قۇراما كاپيتانى قامشىبەك قوڭقاباەۆ باستاعان جىگىتتەر دە الماتى رينگىنىڭ شاڭىن قاقتى. جاسوسپىرىمدەر وليمپياداسىنىڭ كۇمىس جۇلدەگەرى تالعات شايكەن باستاپ بەرگەن جەڭىستى جولدى WBC تۇجىرىمى بويىنشا جاستار اراسىنداعى الەم چەمپيونى سۇلتان زاۋىربەك, 2017 جىلى 75 كيلودا بوكستان ەل چەمپيونى اتانعان اباي تولەش جانە تاعى باسقا بىرقاتار بوكسشىلارمىز ءساتتى جالعاپ, قوڭقاباەۆ جەڭىستى جولدى تۇيىندەدى.