توعىزۇمالاق ويىنى ادامزاتتىڭ ماتەريالدىق ەمەس مادەني مۇرالارىنىڭ رەپرەزەنتاتيۆتىك تىزىمىنە ەنگىزىلدى.
ماتەريالدىق ەمەس مادەني مۇرانى (مەمم) قورعاۋ جونىندەگى ۇكىمەتارالىق كوميتەت ءتيىستى ۇسىنىس ءۇشىن داۋىس بەردى. ول كوميتەتتىڭ 2020 جىلدىڭ 14-19 جەلتوقسانى ارالىعىندا ونلاين رەجيمدە ءوتىپ جاتقان 15-سەسسياسى اياسىندا وتكىزىلدى. وتاندىق دەلەگاتسيا قۇرامىندا – قازاقستاننىڭ يۋنەسكو جانىنداعى تۇراقتى وكىلدىگىنىڭ قىزمەتكەرلەرى مەن يۋنەسكو جانە يسەسكو ىستەرى جونىندەگى ۇلتتىق كوميسسيا جانىنداعى مەمم بويىنشا ۇلتتىق كوميتەتتىڭ ساراپشىلارى. ايتا كەتەيىك, قازاقستان 2018-2021 جج. ارالىعىندا كوميتەت جۇمىسىنا يۋنەسكو-نىڭ وسى بەدەلدى ورگانىنىڭ مۇشەسى رەتىندە قاتىسىپ كەلەدى.
اتالمىش سەسسيادا ۇكىمەتارالىق كوميتەت 42 نوميناتسيانى, ونىڭ ىشىندە قازاقستان, قىرعىزستان جانە تۇركيا بىرلەسە ەنگىزگەن «توعىزۇمالاق» ويىنىن قاراستىردى.
توعىزۇمالاق (قىرعىزداردا – توگۋز كورگوول, تۇرىكتەردە – مانگالا/گەچيۋرمە) – ادامنىڭ ۇتقىرلىق پەن تاپقىرلىق قاسيەتىن ۇشتايتىن, ءارى ماتەماتيكالىق ويلاۋ مەن توزىمدىلىككە باۋليتىن ويىن. ول ەجەلگى تۇركىلەر قاسيەتتى ساناعان 9 سانىنا نەگىزدەلگەن. ويىندى كەيدە «قويشىلار الگەبراسى» دەپ تە اتادى. ويتكەنى, ويىن كەزىندە بارلىق ءتورت نەگىزگى ماتەماتيكالىق امال قولدانىلادى. ويىن جىلدامدىق پەن ءادىس-ءتاسىل ساناۋعا قۇرىلعان.
«توعىزقۇمالاقتىڭ» ەنۋىمەن بىرگە مەمم رەپرەزەنتاتيۆتىك تىزىمىندەگى ادامزاتتىڭ مادەني مۇراسى ساناتىنداعى قازاقستاندىق ەلەمەنتتەر سانى 11-گە جەتىپ وتىر. بۇعان دەيىن بۇل تىزىمگە دومبىرا كۇي ونەرى, كيىز ءۇي جاساۋ ءداستۇرى, ايتىس, قازاق كۇرەسى, ناۋرىز مەيرامى, ساياتشىلىق, جىڭىشكە نان – قاتىرما, اسىق ويىنى, قورقىت مۇراسى جانە قازاق جىلقىشىلارىنىڭ ءداستۇرلى كوكتەمگى مەرەكەلىك ادەت-عۇرىپتارى (بيە بايلاۋ, ايعىر قوسۋ, قىمىز مۇرىندىق) كىرگەن بولاتىن.