سەناتتا جۋرناليستەردى ماراپاتتاۋ ءراسىمى ءوتتى

ماۋلەن اشىمباەۆ جۇلدەلەردىڭ تاۋەلسىزدىك كۇنى قارساڭىندا تاپسىرىلۋىنىڭ سيمۆوليكالىق ءمانى بار ەكەنىنە نازار اۋداردى.

«تاۋەلسىزدىك – ءبىزدىڭ ەڭ باستى قۇندىلىعىمىز. شىن مانىندە, تاۋەلسىزدىكتىڭ ارقاسىندا ەڭسەلى ەل بولدىق. بۇكىل الەم مويىنداعان مەملەكەت رەتىندە قالىپتاستىق. ەكونوميكادا, ساياساتتا, الەۋمەتتىك جانە رۋحاني باعىتتا اۋىز تولتىرىپ ايتارلىقتاي جەتىستىكتەرگە قول جەتكىزدىك. وتاندىق بۇقارالىق اقپارات قۇرالدارىنىڭ جانە جۋرناليستيكانىڭ دامۋى دا وسى ەگەمەندىكتىڭ ارقاسى», – دەدى سەنات توراعاسى.

سونىمەن قاتار ماۋلەن اشىمباەۆ پارلامەنت قابىلداعان ءار زاڭ مەن شەشىمدى حالىققا جەتكىزىپ, اقپارات تاراتۋدا بۇقارالىق اقپارات قۇرالدارىنىڭ ماڭىزى زور ەكەنىن اتاپ ءوتتى.

«قازىرگى تاڭدا مەملەكەت باسشىسىنىڭ تاپسىرماسىمەن كوپتەگەن تىڭ باستامالار قولعا الىنۋدا. سوعان بايلانىستى ازاماتتاردىڭ الەۋمەتتىك جاعدايىن جاقسارتۋعا, ادام قۇقىعىن قامتاماسىز ەتۋگە, دەنساۋلىق ساقتاۋ, ءبىلىم بەرۋ سالالارىن جەتىلدىرۋگە ارنالعان زاڭدار قابىلدانۋدا. شاعىن جانە ورتا بيزنەستى قولداۋ, قورشاعان ورتانى قورعاۋ, سىبايلاس جەمقورلىقپەن كۇرەس باعىتتارى دا باستى نازاردا. سونىڭ ءبارىن حالىققا جەتكىزىپ, ءار زاڭنىڭ ءمانى مەن ماڭىزىن ءتۇسىندىرۋ ىسىندە جۋرناليستەردىڭ ءرولى ەرەكشە», – دەدى سەنات توراعاسى.

ول قازىرگىدەي سىن-قاتەرلەر كوبەيگەن زاماندا اقپاراتتىڭ ءمانى ارتا تۇسكەنىن دە تىلگە تيەك ەتتى. سوعان بايلانىستى جۋرناليستەرگە جۇكتەلەتىن مىندەتتىڭ سالماعى اۋىر ەكەنىنە نازار اۋدارىپ, ىندەت كەزىندەگى تىلشىلەر قاۋىمىنىڭ بەلسەندىلىگىنە توقتالدى.

«جۋرناليستەر قاۋىمىنىڭ پاندەميا كەزىندەگى ەسەلى ەڭبەگىن ەرەكشە اتاپ وتكەن ءجون. سىزدەر دارىگەر, ءتارتىپ ساقشىلارىمەن بىرگە ىندەتپەن كۇرەستىڭ الدىڭعى شەبىندە جۇردىڭىزدەر. بۇل ەڭبەكتەرىڭىز ەڭ جوعارى باعاعا لايىق», – دەدى ماۋلەن اشىمباەۆ.

ايتا كەتەيىك, «امانات» جانە «تۋعان ەل» بايقاۋلارى جۋرناليستەر كۇنىنە وراي سەناتتىڭ ۇيىمداستىرۋىمەن وتكىزىلدى. قورىتىندىسى ماۋسىم ايىندا جاريالانعانىمەن ەلدەگى ەپيدەميولوگيالىق احۋالعان بايلانىستى ماراپاتتاۋ ءراسىمى كەيىنگە شەگەرىلدى.

بيىل ەكى بايقاۋعا ەلىمىز بويىنشا 120-عا جۋىق (118) جۇمىس كەلىپ ءتۇستى. بايقاۋ قورىتىندىسىن شىعارعان كەزدە پاندەميا تۇسىندا بەلسەندىلىگىمەن كوزگە تۇسكەن جۋرناليستەر دە نازاردان تىس قالعان جوق. سونىمەن قاتار ينتەرنەت-جۋرناليستيكا, الەۋمەتتىك جەلى سالالارىندا ەڭبەك ەتىپ جۇرگەن ماماندار ءۇشىن دە ارنايى سىيلىقتار تاعايىندالدى.

ودان بولەك, بۇگىن تمد پارلامەنتارالىق اسسامبلەياسىنىڭ ناگرادالارىن يەلەنگەن ەلىمىزگە بەلگىلى جۋرناليستەر دە ماراپاتتالدى.

«امانات» بايقاۋىنىڭ لاۋرەاتتارى:

گران-پري – وڭعار توقانوۆ, «Qazaqstan» تەلەارناسىنىڭ ءتىلشىسى.

ءبىرىنشى ورىن – جادىرا جولمۇحامەتوۆا, «ينفورمبيۋرو» اقپارات اگەنتتىگىنىڭ ءتىلشىسى.

ەكىنشى ورىن – لاۋرا تۇسىپبەكوۆا, «كازاحستانسكايا پراۆدا» گازەتىنىڭ ءتىلشىسى.

ءۇشىنشى ورىن – تاتيانا كوۆالەۆا, «Zakon.kz» پورتالىنىڭ ءتىلشىسى.

«تۋعان ەل» بايقاۋىنىڭ لاۋرەاتتارى:

گران-پري – ازامات قاسىموۆ, «Egemen Qazaqstan» گازەتىنىڭ ءتىلشىسى.

ءبىرىنشى ورىن – «ەۋرازيا» ءبىرىنشى ارناسىنىڭ «سەنات online» تەلەجوباسىنىڭ ۇجىمى.

ەكىنشى ورىن – ميرلان التىنبەك, «حابار 24» اگەنتتىگىنىڭ ءتىلشىسى.

ءۇشىنشى ورىن – ءامىربولات حۋسايان, «Azattyq Ruhy» اقپارات اگەنتتىگىنىڭ ءتىلشىسى.

ارناۋلى ماراپات يەگەرلەرى:

عازيز ابىشەۆ – Abishev Analytics تەلەگرام-ارناسىنىڭ اۆتورى;

يۆان سۋحورۋكوۆ پەن رومان پاۆلوۆ – «Tengrinews» ينتەرنەت-رەسۋرسىنىڭ ءجۋرناليسى جانە بەينە-ينجەنەرى;

ۇلپان بەگالينا – «Atameken business» ارناسىنىڭ ءتىلشىسى;

ايحان ءشارىپوۆ – «AIQYN» گازەتىنىڭ ءتىلشىسى;

سىرىم يتقۇلوۆ – «Hola news» شەف-رەداكتورى;

«Ainews» جانە «Aitube.kz» ينتەرنەت جوبالارىنىڭ ۇجىمدارى.