سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ يتاليانىڭ سىبايلاس جەمقورلىققا قارسى ءىس-قيمىل ۇلتتىق باسقارماسىنىڭ پرەزيدەنتى دجۋزەپپە بۋسيامەن ونلاين كەزدەسۋ وتكىزدى, دەپ حابارلايدى Egemen.kz.
سىبايلاس جەمقورلىققا قارسى كۇرەس ۆەدومستۆوسىنىڭ باسشىسى يتالياندىق ارىپتەستەرىن ەلىمىزدە جۇرگىزىلىپ جاتقان كەشەندى رەفورمالارمەن تانىستىرىپ, ساياسي ترانسفورماتسيانىڭ ماڭىزدىلىعىن اتاپ ءوتتى. قازاقستاننىڭ ءولىم جازاسىن جويۋعا, اكىمشىلىك راسىمدىك-پروتسەستىك كودەكستى قابىلداۋعا, جالا جابۋدى دەكريميناليزاتسيالاۋعا جانە پارلامەنتاريزمدى كۇشەيتۋگە باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىنىڭ فاكۋلتاتيۆتىك ەكىنشى حاتتاماسىنا قوسىلۋ ماسەلەلەرىنە ەرەكشە نازار اۋدارىلدى.
ول سونداي-اق سىبايلاس جەمقورلىققا قارسى زاڭنامالىق باستامالاردى ىسكە اسىرۋ ماسەلەلەرىنە توقتالدى. اتاپ ايتقاندا, سىبايلاس جەمقورلىق ءۇشىن سوتتالعانداردىڭ مەرزىمىنەن بۇرىن شارتتى تۇردە بوساتىلۋىن بولدىرماۋ, شەتەلدىك بانكتەردەگى شوتتاردى يەلەنۋگە تىيىم سالۋ جانە قۇقىق قورعاۋ ورگاندارى قىزمەتكەرلەرى مەن سۋديالاردىڭ سىبايلاس جەمقورلىق ءۇشىن جاۋاپكەرشىلىگىن كۇشەيتۋ بولىگىندە سوڭعى نوۆەللالاردى اتاپ ءوتتى.
ءوز كەزەگىندە دجۋزەپپە بۋسيا اگەنتتىكتىڭ جۇرگىزىپ جاتقان جۇمىسىنا وڭ باعا بەرىپ, ساياسي ەرىك-جىگەر مەن سوڭعى 1,5 جىلدا قابىلدانعان سەرپىندى شارالاردى اتاپ ءوتتى.
كەزدەسۋ بارىسىندا شەتەلدىك ارىپتەستەر ءوز ۆەدومستۆوسىنىڭ يتاليانىڭ قۇقىقتىق جۇيەسىندەگى ءرولى تۋرالى ايتىپ بەردى. بۇل ورگان سىبايلاس جەمقورلىقتىڭ الدىن الۋعا باعىتتالعان, ونىڭ ىشىندە مەملەكەتتىك ورگانداردىڭ ءتيىستى ءۇش جىلدىق جوسپارلاردى ورىنداۋىن باقىلاۋدى جۇزەگە اسىرادى. ول سونداي-اق مۇددەلەر قاقتىعىسى ماسەلەلەرىن رەتتەۋ مەن حاباردار ەتۋشىلەردى قورعاۋدى جانە مەملەكەتتىك ورگاندار قىزمەتىندە اشىقتىق قاعيداتتارىن ىسكە اسىرۋدى قوسا العاندا, مەملەكەتتىك قىزمەتشىلەر اراسىندا ادالدىق مادەنيەتىن ىلگەرىلەتۋگە جاۋاپتى.
يتاليانىڭ سىبايلاس جەمقورلىققا قارسى ۆەدومستۆوسى مەملەكەتتىك جانە كۆازيمەملەكەتتىك سەكتورلاردا وتكىزىلەتىن مەملەكەتتىك ساتىپ الۋلاردىڭ باعا كومپلاەنسىنەن باستاپ قول قويىلعان اكتىلەردى تەكسەرۋگە دەيىنگى تولىق تسيكلىن باقىلاۋ قۇقىعىنا يە.
ەۋروكوميسسيا بيۋدجەت قاراجاتىنىڭ شىعىستارىن باقىلاۋدىڭ ۇزدىك قۇرالى رەتىندە تانىعان مەملەكەتتىك كەلىسىم-شارتتاردىڭ ۇلتتىق ءتىزىلىمى قىزىعۋشىلىق تۋدىرادى. بۇل رەسۋرستا سوڭعى 13 جىلداعى دەرەكتەر ساقتالعان. بۇل تەرەڭ رەتروسپەكتيۆتى تالداۋ جۇرگىزۋگە مۇمكىندىك بەرەدى.
كەزدەسۋ قورىتىندىسى بويىنشا تاراپتار قىزمەتكەرلەردىڭ قۇزىرەتتىلىگىن ارتتىرۋ سالاسىنداعى ىنتىماقتاستىقتى نىعايتۋعا, سونداي-اق قىزىقتىراتىن تاقىرىپتار بويىنشا ناقتى كەڭەستەر وتكىزۋگە كەلىستى.