YouTube بەينەحوستينگىندە «JOL KZ» ارناسىنىڭ سالتاناتتى اشىلۋ ءراسىمى ءوتتى. اتالعان كانالدا ەلىمىزدەگى اۆتوجول سالاسىنىڭ سوڭعى جاڭالىقتارى جاريالانىپ, تۇيتكىلدى ماسەلەلەرى كوتەرىلمەك, دەپ حابارلايدى Egemen.kz.
شاراعا قر يدم اۆتوموبيل جولدارى كوميتەتىنىڭ توراعاسى سايرانبەك بارماقوۆ, «جول اكتيۆتەرىنىڭ ۇلتتىق ساپا ورتالىعى» رمك باس ديرەكتورى زامير ساعىنوۆ, «قازجولعزي» اق پرەزيدەنتى باعدات تەلتاەۆ, «قازاۆتوجول» ۇك» اق باسقارما توراعاسى ۇلان ءالىپوۆ, «قازاقستاننىڭ اۆتوجولشىلار قاۋىمداستىعى» زتب پرەزيدەنتى باعلان بايماعامبەتوۆ جانە رەسپۋبليكالىق بۇقارالىق اقپارات قۇرالدارىنىڭ وكىلدەرى قاتىستى.
«قازاقستاندا العاش رەت اۆتوجول سالاسىنا ارنالعان ينتەرنەت-ارنا اشىلىپ وتىر. بۇل ماڭىزدى وقيعا. بۇگىنگى شاراعا سالا وكىلدەرى, جۋرناليستەر قاتىسىپ وتىر. ءبىز ارقاشاندا ديالوگ ءۇشىن, كونسترۋكتيۆتى ەسكەرتۋلەر ءۇشىن اشىقپىز. سەبەبى مەملەكەتتىك ورگاندار, جول كومپانيالارى, باق پەن بارشا قازاقستاندىقتاردىڭ بىرلەسكەن كۇشىنىڭ ارقاسىندا عانا جۇمىستى جاقسارتىپ, مەملەكەت باسشىسى الدىمىزعا جۇكتەگەن مىندەتتەردى ورىنداي الامىز. ال «JOL KZ» ارناسى اتالعان ماقسات ءۇشىن ۇلكەن اقپاراتتىق الاڭ بولماق», دەدى اۆتوموبيل جولدارى كوميتەتىنىڭ توراعاسى سايرانبەك بارماقوۆ.
بۇدان بولەك بىرىڭعاي اقپاراتتىق پلاتفورما دامۋىن پرەزيدەنت قاسىم-جومارت توقاەۆ اتاپ وتكەن «ەستۋشى مەملەكەت» تۇجىرىمداماسىن نىعايتۋعا ىقپال ەتەتىندىگى, سونداي-اق قويىلعان مىندەتتەردى شەشۋ الاڭىنا اينالاتىندىعى باسا ايتىلدى.
وسىلايشا, «JOL KZ» كانالىندا قۇرىلىس, رەكونسترۋكتسيالاۋ مەن جول جوندەۋ ماسەلەلەرى كوتەرىلەدى دەپ كوزدەلگەن. سونىمەن بىرگە, اتقارىلعان جۇمىستاردىڭ ساپاسى, جاڭا تەحنولوگيالار, جول قوزعالىسىنىڭ قاۋىپسىزدىگى باستى نازاردا بولادى.