جامبىل وبلىسىنىڭ ءالجان انا اۋىلىندا جاڭا سپورتتىق-ساۋىقتىرۋ كەشەنى اشىلدى. مۇندا شاعىن فۋتبول, ۆولەيبول, باسكەتبول, ەركىن كۇرەس, بوكس, تحەكۆوندو جانە دزيۋدو سياقتى بىرنەشە سپورت سەكتسيالارى جۇمىس ىستەيدى, دەپ حابارلايدى Egemen.kz.
«Samruk-Kazyna Trust» الەۋمەتتىك جوبالاردى دامىتۋ قورى «سامۇرىق-قازىنا» اق-نىڭ «مەنىڭ ەلىم» الەۋمەتتىك ينۆەستيتسيالار باعدارلاماسى اياسىندا اۋدانى 1400 شارشى مەتردەن اساتىن سپورت كەشەنىنىڭ قۇرىلىسىنا قاراجات ءبولدى. مۇندا ءتۇرلى سپورتتىق ءىس-شارالار, اۋداندىق جانە وبلىستىق دەڭگەيدەگى جارىستار, سونداي-اق جاتتىعۋ جيىندارى وتەدى. كەشەنگە ۇلكەن ارەنا, امبەباپ زال, بوكس جانە كۇرەس زالى جانە 4 كيىم اۋىستىراتىن بولمە كىرەدى.
«مەملەكەت باسشىسى بۇقارالىق سپورتتى دامىتۋعا ۇلكەن كوڭىل بولەدى. ءبىزدىڭ وبلىستا 13 دەنە شىنىقتىرۋ جانە ساۋىقتىرۋ كەشەنىنىڭ قۇرىلىسى جۇرگىزىلۋدە, ونىڭ تورتەۋى قورداي اۋدانىنىڭ اۋىلدارىندا. ءالجان انا اۋىلىندا جاڭا سپورت كەشەنىنىڭ اشىلۋى سالاۋاتتى ءومىر سالتىن ۇستانۋعا ىقپال ەتەتىنىنە سەنەمىز. ەندى اۋىلدىڭ ۇلدارى-قىزدارى دا, وزگە تۇرعىندار دا اۋدان ورتالىعىنا بارۋعا ۋاقىت پەن قاراجات جۇمساماي, جاقىن جەردەگى كەشەندە سۇيىكتى سپورت تۇرلەرىمەن اينالىسا الاتىنى قۋانتادى», - دەپ اتاپ ءوتتى بەردىبەك ساپارباەۆ اۋىل تۇرعىندارىن ايتۋلى وقيعامەن قۇتتىقتاۋ سوزىندە.
سونداي-اق, سپورت كەشەنىنىڭ اشىلۋ سالتاناتىنا جامبىل وبلىسىنىڭ تۋماسى, ءىۆا بويىنشا كاسىبي بوكستان الەم چەمپيونى, ازيا چەمپيونى, قازاقستاننىڭ بىرنەشە دۇركىن چەمپيونى مارات مازىمباەۆ تا قاتىستى. كاسىپقوي سپورتشى جاقىن ارادا وسى تاماشا كەشەننىڭ قابىرعاسىنان تاۋەلسىز قازاقستاننىڭ ءانۇرانىن الەمدىك ارەنادا شىرقاتاتىن وليمپيادا جانە الەم چەمپيوندارى شىعاتىنىنا سەنىم ءبىلدىردى.
بارلىق سپورت زالدارى قاجەتتى قۇرال-سايماندارمەن جابدىقتالعان, ونىڭ ىشىندە بوكس رينگى ورناتىلعان, كۇرەس ماتى جانە جامىلعى, بوكس سومكەسى جانە باسقا دا ترەناجەرلار ساتىپ الىنعان. مۇندا جەرگىلىكتى بالالار مەن جاسوسپىرىمدەر سپورت مەكتەبىنىڭ 120 وقۋشىسى 6 جاتتىقتىرۋشىمەن بىرگە جاتتىعاتىن بولادى.
ايتا كەتەيىك, عيمارات پاندۋستارمەن جانە ارنايى دارەتحانالارمەن جابدىقتالعان. سونىمەن قاتار, مۇندا العاشقى مەديتسينالىق كومەك كورسەتۋ ءۇشىن ءدارى-دارمەكتەرمەن جابدىقتالعان مەديتسينالىق كابينەت بار.
بۇل «Samruk-Kazyna Trust» الەۋمەتتىك جوبالاردى دامىتۋ قورىنىڭ «سامۇرىق-قازىنا» اق كومپانيالار توبى اتىنان ىسكە اسىرىپ جاتقان جامبىل وبلىسىنداعى العاشقى جوبا ەمەس. وسىلايشا, 2020 جىلى وڭىردە امبەباپ سپورت الاڭدارى اشىلدى, قورداي اۋدانىندا ءبىلىم الۋىندا ەرەكشە قاجەتتىلىكتەرى بار بالالارعا ارنالعان پسيحولوگيالىق-پەداگوگيكالىق قولداۋ كابينەتى مەن رەسۋرستىق ورتالىق اشىلادى دەپ كۇتىلۋدە. سونىمەن قاتار, جاقىن ارادا تارازدا ەلباسىنىڭ «قامقورلىق» باستاماسى اياسىندا وڭالتۋ ورتالىعى جانە مۇگەدەك بالالارعا ارنالعان ينكليۋزيانى قولداۋ كابينەتى اشىلادى.