بۇگىن, 12 جەلتوقساندا, "جاستار" عىلىمي-زەرتتەۋ ورتالىعىندا اقپارات جانە قوعامدىق دامۋ ۆيتسە-ءمينيسترى اسحات ورالوۆتىڭ قاتىسۋىمەن "قازاقستان جاستارى – 2020" ۇلتتىق بايانداماسىنىڭ ساراپتامالىق تالقىلاۋى ءوتتى, دەپ حابارلايدى Egemen.kz
"جاستار" عىلىمي-زەرتتەۋ ورتالىعى اقپارات جانە قوعامدىق دامۋ مينيسترلىگىنىڭ قولداۋىمەن "قازاقستان جاستارى" ۇلتتىق بايانداماسىنىڭ سەگىزىنشى باسىلىمىن دايىندادى. بايانداما سوڭعى عىلىمي زەرتتەۋلەر مەن مەملەكەتتىك ورگانداردىڭ ءتيىستى رەسمي ستاتيستيكاسىن تالداۋعا سۇيەنە وتىرىپ جاسالعان. بايانداما جالپى 6000 رەسپوندەنتتى قامتىعان 3 بۇقارالىق الەۋمەتتانۋلىق زەرتتەۋدىڭ ناتيجەلەرىنە نەگىزدەلگەن. قازاقستان جاستارى تۋرالى ۇلتتىق باياندامادا 8 ءبولىم بار جانە ساراپشىلار قاۋىمداستىعىنىڭ ۇسىنىستارىن ەسكەرە وتىرىپ, تالقىلاۋ ناتيجەلەرى بويىنشا پىسىقتالىپ, كوپشىلىككە ۇسىنىلماق.
بيىل COVID-19 كوروناۆيرۋستىق ينفەكتسيا الەمدىك پاندەمياسىنىڭ قازاقستاندىق جاستاردىڭ جاعدايى مەن تىرشىلىگىنە اسەرى زەرتتەلگەنىن اتاپ وتكەن ءجون. ۇلتتىق بايانداما ۋاكىلەتتى مەملەكەتتىك ورگاندارعا ءتيىستى پراكتيكالىق ۇسىنىمدار مەن ۇسىنىستار دايىندادى. سونداي-اق ساراپشىلار قاۋىمداستىعى, فوكۋس-توپتىق زەرتتەۋلەر نەگىزىندە ناقتى شارالار ازىرلەنگەن. ۇلتتىق باياندامانىڭ ساراپتامالىق تالقىلاۋىنا قازاقستاندىق ساراپشىلار – "قوعامدىق پىكىر" زەرتتەۋ ينستيتۋتىنىڭ نەگىزىن قالاۋشى ءارى عىلىمي كەڭەسشى ب.ي. راكيشەۆا, ساياساتتانۋشى, قر پرەزيدەنتى جانىنداعى ۇلتتىق قوعامدىق سەنىم كەڭەسىنىڭ مۇشەسى ا.ا. سارىم, BTS Education ءبىلىم بەرۋ جوبالارىنىڭ جەتەكشىسى س. نۇربەك, "التەرناتيۆا" وزەكتى زەرتتەۋلەر ورتالىعىنىڭ ديرەكتورى ا. چەبوتارەۆ, مەملەكەتتىك عىلىمي-تەحنيكالىق ساراپتاما ۇلتتىق ورتالىعىنىڭ ۆيتسە-پرەزيدەنتى ج.م. ءسابيتوۆ, سونىمەن قاتار شەتەلدىك ساراپشىلار – پيتتسەر-كوللەدجىنىڭ ۇيىمداستىرۋشىلىق زەرتتەۋلەر كافەدراسىنىڭ اديۋنكت-پروفەسسورى باربارا دجۋنيسباي (كاليفورنيا, اقش), نازارباەۆ ۋنيۆەرسيتەتىنىڭ دوتسەنتى كاسا ريتا (ريگا, لاتۆيا) جانە ت.ب. قاتىستى.
اقپارات جانە قوعامدىق دامۋ ۆيتسە-ءمينيسترى: "ۇلتتىق بايانداما – بۇل زەرتتەۋ توبىنىڭ كەشەندى جۇمىسىنىڭ جانە دە ءارتۇرلى سالاداعى مامانداردىڭ ءوزارا ارەكەتتەسۋىنىڭ ناتيجەسى. قۇجاتتىڭ باستى ەرەكشەلىگى – جاستاردىڭ ۇستانىمدارىن ەسكەرە وتىرىپ جاسالعاندىعىندا. جاستاردىڭ پىكىرى – الەۋمەتتانۋلىق زەرتتەۋلەردىڭ ناتيجەسى. سول ناتيجەگە سۇيەنە وتىرىپ قازاقستاندىق جاستاردىڭ ءومىرىنىڭ نەگىزگى سالالارىنداعى جاعدايى زەرتتەلدى, ءبىزدىڭ جاستارىمىزدى تولعاندىراتىن ماسەلەلەر ايقىندالىپ, شەشۋ جولدارى ۇسىنىلدى, جاستار سالاسىن ودان ءارى دامىتۋدىڭ تەندەنتسيالارى انىقتالدى", دەپ اتاپ ءوتتى.
BTS Education ءبىلىم بەرۋ جوبالارىنىڭ جەتەكشىسى ساياسات نۇربەك قازاقستاندىق جاستار بويىنشا ۇلتتىق باياندامانىڭ قولدانبالى اسپەكتىسىنە نازار اۋدارۋ قاجەت ەكەندىگىنە توقتالدى. ايدوس سارىمنىڭ پىكىرىنشە, «جاستار» عىلىمي-زەرتتەۋ ورتالىعى – بىرەگەي ورتالىق, سوندىقتان ونىڭ نەگىزىندە قازاقستاندىق جاستاردىڭ ماسەلەلەرى بويىنشا بارلىق زەرتتەۋلەر جيناقتالاتىن ورتاق پلاتفورما قۇرۋ كەرەك. الي اۆدجۋ سەيت, يىلدىرىم بەيازىت ۋنيۆەرسيتەتىنىڭ PhD پروفەسسورىنىڭ (انكارا, تۇركيا) پايىمداۋىنشا, قازاقستاننىڭ ءبىلىم بەرۋ جۇيەسىندە بىرنەشە ماسەلە بار. مۇعالىمدەردىڭ جالاقىسى تومەن. وقۋشىلار مۇعالىم ماماندىعىن كوبىرەك تاڭداۋى ءۇشىن مۇعالىم مەن پەداگوگ ماماندىعى تارتىمدى بولۋى كەرەك.
"مەن ۇكىمەتتىڭ بۇل پروبلەمالاردى بىلەتىنىنە جانە ولاردى شەشۋ ءۇشىن شارالار قابىلداپ جاتقانىنا قۋانىشتىمىن», دەدى ول. پيتتسەر-كوللەدجىنىڭ ۇيىمداستىرۋشىلىق زەرتتەۋلەر كافەدراسىنىڭ اديۋنكت-پروفەسسورى باربارا دجۋنيسباي, (كاليفورنيا, اقش) بولسا, "جاستاردى اتقارىلعان ءىستىڭ «سوڭعى پايدالانۋشىسى" نەمەسە "پايدا كورۋشىلەرى" دەپ قاراستىرعاننان گورى, ولاردى نەگە باسىنان باستاپ شەشىم ىزدەۋ ۇدەرىسىنە قاتىستىرماسقا؟", دەدى ول.
بۇل ەكى وڭ ناتيجەگە: 1) باعدارلاما ناتيجەلەرىنىڭ ودان ءارى جاقسارۋىنا; 2) جاستارعا ساياساتتى قۇرۋعا ساياسي, ازاماتتىق جانە جەكە قاتىسۋعا قاجەتتى مۇمكىندىكتەر بەرىپ, سول ارقىلى وسى پروتسەستىڭ ءار كەزەڭىندە ەلدىڭ دامۋىنا ۇلەس قوسۋىنە جەتكىزۋى مۇمكىن.
ال نازارباەۆ ۋنيۆەرسيتەتىنىڭ دوتسەنتى كاسا ريتا (ريگا, لاتۆيا): "ۇلتتىق ءبىلىم بەرۋ – بۇل قوعام ءومىرىنىڭ باسقا سالالارىمەن تىعىز بايلانىستى ەكوجۇيە. جۇيە بويىنشا ءبىلىم بەرۋ ساپاسىن ارتتىرۋ ءبىلىم بەرۋدىڭ بارلىق دەڭگەيلەرىندە وقىتۋ مەن كوشباسشىلىق ۇدەرىستەرىن جاقسارتۋ جانە وقىتۋدىڭ فورمالدى جانە فورمالدى ەمەس تاسىلدەرىن ەنگىزۋ بويىنشا ءبىر مەزگىلدە جانە ۇيلەسىمدى ارەكەتتى تالاپ ەتەدى, بۇل "قازاقستان جاستارى – 2020" بايانداماسىندا ۇسىنىلعان", دەدى.
بايانداما – ساراپشىلار مەن بارلىق دەڭگەيدەگى ءارتۇرلى سالانىڭ وكىلدەرى اراسىنداعى كەشەندى جۇمىس پەن ءوزارا ارەكەتتىڭ ناتيجەسى. "قازاقستان جاستارى – 2020" ۇلتتىق بايانداماسىنىڭ جاڭالىعى مەن وزەكتىلىگى: بۇل – قۇجاتتا ساراپشىلار مەملەكەت پەن ازاماتتىق قوعام جاھاندىق كوروناۆيرۋس پاندەمياسى اياسىندا جاستارعا قالاي جانە قانداي كومەك بەرە الادى دەگەن سۇراقتارعا جاۋاپ تابۋعا تالپىنىس.