بۇگىن تاراپتاردىڭ ءوزارا باستاماسى بويىنشا Cىبايلاس جەمقورلىققا قارسى ءىس-قيمىل اگەنتتىگى مەن باسەكەلەستىكتى قورعاۋ جانە دامىتۋ اگەنتتىگى باسشىلىعىنىڭ كەزدەسۋى ءوتتى, دەپ حابارلايدى Egemen.kz
وندا جەمقورلىقتىڭ الدىن الۋ جانە باسەكەلەستىكتى قورعاۋ جانە مونوپوليستىك قىزمەتتى شەكتەۋ سالاسىنداعى پاراساتتىلىق قاعيداتتارىن ىلگەرىلەتۋ ماسەلەلەرى تالقىلاندى.
ونلاين-بايلانىس ارقىلى وتكەن ءىس-شاراعا مونوپولياعا قارسى ورگاننىڭ باسشىلىعى, ەكى ۆەدومستۆونىڭ اۋماقتىق بولىمشەلەرى, سونداي-اق, سىبايلاس جەمقورلىققا قارسى قىزمەتتىڭ جانىنداعى قوعامدىق كونسۋلتاتيۆتىك-كەڭەسشى ورگانداردىڭ وكىلدەرى قاتىستى.
كەزدەسۋ بارىسىندا قاتىسۋشىلار «ادالدىق الاڭى» جوبالىق كەڭسەلەرىنىڭ بارلىق مەملەكەتتىك ورگانداردا اشىلۋىنىڭ ماڭىزدىلىعىن اتاپ ءوتتى.
ولاردىڭ ماقساتى – سىبايلاس جەمقورلىق تاۋەكەلدەرىن ءتيىمدى تالداۋ جانە سىبايلاس جەمقورلىققا قارسى مونيتورينگ نەگىزىندە ناقتى ۆەدومستۆوارالىق الدىن الۋ جۇيەسىن قامتاماسىز ەتۋ, سونداي-اق قول جەتىمدىلىك, اشىقتىق جانە تۇتىنۋشىلارعا بەيىمدەلگەن حالىققا جايلى جاعدايلار جاساۋ.
اگەنتتىك توراعاسىنىڭ ورىنباسارى نۇرلان شابدار باسەكەلەستىكتى قورعاۋ جانە دامىتۋ اگەنتتىگىنىڭ باسىمدىعى – بۇل سالاداعى سىبايلاس جەمقورلىقتىڭ تومەندىگى مەن ءبىر عانا مەملەكەتتىك قىزمەتتىڭ بولۋى ەكەنىن اتاپ ءوتتى.
«سالاداعى سىبايلاس جەمقورلىققا قارسى ءىس-قيمىلدىڭ وڭ ناتيجەسىن بۇدان ءارى دە جەتىلدىرۋ ءۇشىن, وعان قارسى ينفراقۇرىلىم قۇرۋعا نازار اۋدارۋ قاجەت, ونىڭ ىشىندە, ازاماتتىق قوعاممەن ءوزارا ءىس-قيمىل جاساۋ جانە ادالدىق پەن حالىققا قىزمەت ەتۋ قاعيداتتارىن ۇستانبايتىن قىزمەتكەرلەر قاتارىن تازارتۋ سياقتى ماسەلەلەرگە ەرەكشە كوڭىل ءبولۋ كەرەك», دەيدى ن.شابدار.
ءوز كەزەگىندە, مونوپولياعا قارسى ورگان توراعاسىنىڭ ءبىرىنشى ورىنباسارى رۋستام احمەتوۆ قۇرىلعان «ادالدىق الاڭى» جوبالىق كەڭسەسى اياسىندا اگەنتتىكتىڭ ءاربىر باعىتى بويىنشا قوعامدىق مونيتورينگ جۇرگىزىلىپ, قوعامدىق باستامالار باسىمدىققا يە بولاتىنىن اتاپ ءوتتى.
«مەن سىبايلاس جەمقورلىققا قارسى قىزمەتپەن بىرلەسكەن جوبالىق كەڭسە اگەنتتىكتە ادالدىق پەن قولجەتىمدىلىك قاعيداتتارىن نىعايتۋعا سەرپىن بەرەدى دەپ سەنەمىن», دەدى ر.احمەتوۆ.
كەزدەسۋ سوڭىندا «قازاقستان رەسپۋبليكاسىنىڭ باسەكەلەستىكتى قورعاۋ جانە دامىتۋ اگەنتتىگى – ادالدىق الاڭى» جوبالىق كەڭسەسىنىڭ جارعىسىنا قول قويىلدى.
قوعامدىق جانە بۇقارالىق اقپارات قۇرالدارىنىڭ وكىلدەرىنەن قۇرىلعان جوبالىق توپ پەن ساراپشىلار كەڭەسى ۇسىنىستار جيناپ, تۇرمىستىق سىبايلاس جەمقورلىقتى جويۋ يدەيالارىنىڭ ءتىزىلىمىن جاسايتىن بولادى.