تۇركىستان وبلىستىق ءماسليحاتىنىڭ كەزەكتى ەلۋ ءتورتىنشى سەسسياسىندا وبلىس اكىمى ومىرزاق شوكەەۆ مەملەكەت باسشىسى قاسىم – جومار توقاەۆتىڭ تاپسىرمالارى تۇركىستاندى دامىتۋعا تىڭ سەرپىن بەرگەنىن, سوندىقتان قاسيەتتى قالانى دامىتۋ جۇمىستارى ودان ارى جاندانا تۇسەتىنىن اتاپ ءوتتى, دەپ حابارلايدى Egemen.kz
سونداي-اق وبلىس اكىمى ەلىمىزدەگى ەڭ كوپ جاڭا نىساندار سالىنىپ جاتقان تۇركىستاندا الداعى ۋاقىتتا بىرقاتار جاڭا نىسان ەل يگىلىنە بەرىلەتىنىن ايتتى.
«ەلباسى نۇرسۇلتان نازارباەۆتىڭ باستاماسىمەن تۇركىستان حالىقارالىق دەڭگەيدەگى قالاعا اينالىپ كەلەدى. قۇرىلىس قارقىنى باسەڭدەمەيدى. تۇركىستان قالاسى وبلىس ورتالىعى بولعاننان كەيىن وڭىردە وتە ۇلكەن, اۋقىمدى جۇمىستار اتقارىلۋدا. سىزدەرمەن بىرگە اۋىزبىرشىلىكپەن جۇمىس ىستەدىك. بىزدەرگە جاۋاپتى تاپسىرمالار بولدى. ونىڭ ىشىندە ارينە تۇركىستان قالاسىن وبلىس ورتالىعى رەتىندە قالىپتاستىرۋ. بارلىعىمىزدىڭ ماقساتىمىز – وبلىستىڭ الەۋمەتتىك - ەكونوميكالىق, رۋحاني - مادەني سالاسىن بىرگە دامىتۋ بولدى. وڭىردە اتقارىلىپ جاتقان جۇمىستاردىڭ ناتيجەسىن وزدەرىڭىز كورىپ وتىرسىزدار. قالادا اكىمشىلىك - ىسكەرلىك ورتالىعى, مادەني - رۋحاني ورتالىق جانە ق.ا.ياساۋي كەسەنەسىنىڭ اينالىسىندا قۇرىلىستار جۇرگىزىلىپ جاتىر. كوپتەگەن اياقتالعان نىساندار قازىردىڭ وزىندە ءوزىنىڭ ساۋلەتتىك ناقىشىمەن قالا كوركىنە ەرەكشە رەڭك بەرىپ تۇر», دەدى سەسسيا وتىرىسىندا ومىرزاق شوكەەۆ.
وبلىستىق ءماسليحات سەسسياسىنىڭ كۇن تارتىبىنە 2021-2023 جىلدارعا ارنالعان وبلىس بيۋدجەتىن بەكىتۋ, وبلىس اكىمدىگى جانىنداعى سىبايلاس جەمقورلىققا قارسى ءىس-قيمىل ماسەلەلەرى جونىندەگى كوميسسيانىڭ دەربەس قۇرامىن بەكىتۋ, وبلىستىق ءماسليحات تۇراقتى كوميسسيالارىنىڭ 2020 جىلعى قىزمەتى جونىندەگى ەسەپتەرى مەن 2021 جىلعا ارنالعان جۇمىس جوسپارى سەكىلدى بارلىعى 19 ماسەلە قارالدى. اتالعان ماسەلەلەردى قاراۋ ناتيجەسى بويىنشا وبلىستىق ءماسليحات دەپۋتاتتارى ءتيىستى شەشىمدەر قابىلدادى.
التىنشى شاقىرىلىمداعى وبلىستىق ءماسليحاتتىڭ سەسسياسىندا ءوز وكىلەتتىلىگىن اياقتاعان بىرقاتار دەپۋتاتتار ارنايى ماراپاتتارعا يە بولدى.