تۇركىستان وبلىسى پد تەرگەۋشىلەرى براكونەرلەردىڭ قىلمىستىق توبىنا قاتىستى 20 تومدىق ءىستى سوتقا جولدادى, – دەپ حابارلايدى Polisia.kz.
پوليتسەي التىناي جولىمبەكوۆا قىم-قۋىت وقيعاعا ورىلگەن شاردارا سۋ قويماسىنداعى براكونەرلەردىڭ قىلمىستىق توبىنا قاتىستى ءىستىڭ اشىلۋى جايىندا تومەندەگىدەي مالىمەت بەردى:
– وزدەرىڭىزگە بەلگىلى 2020 جىلدىڭ ماۋسىم ايىندا ەلدى دۇرلىكتىرگەن قىلمىس ورىن العان ەدى. پوليتسياعا شاردارا سۋ قويماسى اۋماعىندا بەلگىسىز ادامدار زاڭسىز بالىق اۋلاۋمەن اينالىساتىنى تۋرالى ارىز تۇسكەن. اتالعان دەرەك قر قك 335-بابى (بالىق رەسۋرستارىن, باسقا دا سۋ جانۋارلارىن نەمەسە وسىمدىكتەرىن زاڭسىز ءوندىرۋ) بويىنشا سدتبت-دە تىركەلدى. براكونەرلەردى ۇستاۋ ءۇشىن تۇركىستان وبلىسىنىڭ پد ارنايى جەدەل-تەرگەۋ توبىن قۇردى. ەكى ايدىڭ ىشىندە دەرلىك جەدەل ۋاكىلدەر دالەلدەمەلەر جينادى, قىلمىستىق كاسىپكە قاتىسقان بارلىق قاتىسۋشىلاردىڭ بايلانىسىن زەرتتەدى. جەدەل-ىزدەستىرۋ ءىس-شارالارى بارىسىندا پوليتسيا قىزمەتكەرلەرى 10 ادامنان تۇراتىن قىلمىستىق توپتى ۇستادى. ولاردىڭ بارلىعى تۇركىستان وبلىسى مەن شىمكەنت قالاسىنىڭ تۇرعىندارى. اراسىندا ءبىر ەرلى-زايىپتىلار بار. كۇدىكتىلەردەن زاتتاي دالەل رەتىندە بالىق اۋلاۋ قۇرالدارى, 13 قايىق, 389 پاترون, ءبىر جارىم توننادان استام جاڭا اۋلانعان بالىق جانە 425 كگ ىستالعان بالىق تاركىلەنىپ الىندى. كەلتىرىلگەن ماتەريالدىق شىعىن سەگىز ميلليون تەڭگەدەن استى. وسى ءىستىڭ اقيقاتىنا كوز جەتكىزۋ ءۇشىن مەن, وزىمە تاپسىرىلعان جاۋاپتى قىلمىستىق ىسكە جۇيەلى تالداۋ جاساپ, جەدەل تەرگەۋ ءىسىن باستادىم. بىزگە دالەلدەمەلەر بازاسىن مۇقيات جيناپ, بىرنەشە ساراپتاما مەن تەرگەۋ شارالارىن جۇرگىزۋگە تۋرا كەلدى. نەگىزىندە كۇدىكتىلەردىڭ كوپشىلىگى وزدەرى ىستەگەن قىلمىستارىن موينىنا المايدى. جاساعان قىلمىستى مويىنداتۋ ءۇشىن ناقتى ايعاقتار مەن دالەلدەر تاۋىپ, قىلمىستىق ءىس جۇرگىزۋ كودەكسىنىڭ تالاپتارىمەن تەرگەپ, ءاربىر ءىستى تەرەڭ ءارى تياناقتى زەرتتەگەندە عانا, ءىستىڭ سوڭعى نۇكتەسى قويىلادى. وسىنداي تىندىرىمدى تىرلىكتىڭ ارقاسىندا براكونەرلىككە كۇدىكتىلەردىڭ كىناسىن تولىعىمەن دالەلدەدىك. قىلمىستىق ءىستىڭ سوتقا دەيىنگى تەرگەۋ ماتەريالدارى 20 تومنان استى. براكونەرلەردىڭ قىلمىستىق توپ ەكەنى انىقتالدى. وندا بارلىق رولدەر ناقتى بولىنگەن: بىرەۋلەرى بالىقتى زاڭسىز اۋلاعان, سودان كەيىن ونى ساتىپ الۋشىلارعا ساتقان, كەلەسىلەرى الىنعان بالىق ونىمدەرىن شىمكەنت قالاسىنىڭ بازارلارىندا ساۋداعا شىعارعان. بۇل قىلمىستىق ءىس اشىلۋ ءۇشىن ءۇش اي كولەمىندە تەرگەلدى. ۇستالعان 10 كۇدىكتىنىڭ بەسەۋى كەپىلمەن بوساتىلعان, قالعانى “قولحاتتا”. قازىرگى ۋاقىتتا سوتقا دەيىنگى تەرگەۋ جۇمىستارى اياقتالدى جانە قىلمىستىق ءىس ايىپتاۋ اكتىسىمەن زاڭدى شەشىم قابىلداۋ ءۇشىن سوتقا جىبەرىلدى. بۇگىندە سوتتا قارالۋدا. ءوز باسىم ماعان جۇكتەلگەن ءاربىر ىسكە جاۋاپكەرشىلىكپەن قاراپ, ناتيجەلى اياقتاۋعا بارىمدى سالامىن, – دەپ اتاپ ءوتتى اعا تەرگەۋشى ا. جولىمبەكوۆا.