نۇر-سۇلتاندا 25 قاراشا مەن 10 جەلتوقسان ارالىعىندا «ايەلدەرگە قاتىستى زورلىق-زومبىلىقسىز 16 كۇن» رەسپۋبليكالىق اكتسياسى اياسىندا ءىس-شارالار وتۋدە. نەگىزگى ماقسات - تۇرمىستىق زورلىق-زومبىلىق پەن ادام ساۋداسىمەن كۇرەسۋ. شاراعا مۇددەلى مەملەكەتتىك ورگانداردىڭ, ۇكىمەتتىك ەمەس ۇيىمداردىڭ, قوعامنىڭ, داعدارىس ورتالىقتارىنىڭ جانە بۇقارالىق اقپارات قۇرالدارىنىڭ وكىلدەرى قاتىسۋدا, دەپ حابارلايدى Egemen.kz.
«تۇرمىستىق قۇقىق بۇزۋشىلىق جاساۋعا بەيىم ادامداردى, قولايسىز وتباسىلاردى تەكسەرۋ جۇمىستارى جۇرگىزىلۋدە. قازىرگى ۋاقىتتا بىزدە ەسەپتە تۇرعان 463 وتباسى تەكسەرىلدى. سونىڭ ىشىندە 342 ادامعا قاتىستى قورعاۋ نۇسقاماسى شىعارىلعان بولاتىن. بۇل ادامداردى ۋچاسكەلىك پوليتسيا ينسپەكتورلارى تۇرعىلىقتى مەكەنجايىنا بارىپ تەكسەردى. سونداي-اق بەينەبايلانىس ارقىلى دا تەكسەرۋلەر جۇرگىزىلۋدە. سونىمەن قاتار سوتپەن ءجۇرىس-تۇرىسىنا ەرەكشە تالاپ قويىلعان 70 ادام تەكسەرىلدى», - دەدى نۇر-سۇلتان قالاسى پوليتسيا دەپارتامەنتى ايەلدەردى زورلىق-زومبىلىقتان قورعاۋ ءبولىمىنىڭ اعا ينسپەكتورى گۇلميرا شىراحمەتوۆا.
مۇنان بولەك اكتسيا اياسىندا نۇر-سۇلتان قالالىق پوليتسيا دەپارتامەنتى جوسپارلى تۇردە بىرقاتار ءىس-شارالار وتكىزۋدە. اتاپ ايتقاندا, مۇددەلى مەملەكەتتىك ورگاندارمەن, ۇەۇ وكىلدەرىمەن, جۇرتشىلىقتى جانە باق وكىلدەرىن تارتا وتىرىپ «جانۇيا» وتباسى ينستيتۋتىن قولداۋ ورتالىعىندا دوڭگەلەك ۇستەل ءوتتى. وعان Zoom پلاتفورماسى ارقىلى دا تۇرعىندار قاتىستى. سونىمەن قاتار اكتسيا اياسىندا ء«ۇمىت» داعدارىس ورتالىعىنا, «انالار ۇيىنە» بارىپ, ونداعى قىزمەت الۋشىلارعا پسيحولوگيالىق ترەنينگتەر وتكىزىلدى. بۇل جۇمىستار الداعى ۋاقىتتا دا جالعاسادى.
«حالىق كوپ شوعىرلانعان جەرلەردە, ساۋدا ۇيلەرىندە حالىقتى اقپاراتتاندىرۋ ماقساتىندا پوليتسيا دەپارتامەنتىمەن الەۋمەتتىك بيۋرو وتكىزىلۋدە. الداعى ۋاقىتتا مۇددەلى مەملەكەتتىك ورگاندارمەن, سوت جانە پروكۋراتۋرامەن بىرلەسىپ ونلاين بريفينگتەر وتكىزۋ جوسپارلانعان», - دەيدى گۇلميرا شىراحمەتوۆا.
قازىرگى ۋاقىتتا ء«ۇمىت» داعدارىس ورتالىعىنداعى 24/7 رەجيمىندە جۇمىس 49-72-89 ءنومىرى, سونىمەن قاتار نۇر-سۇلتان قالالىق پوليتسيا دەپارتامەنتىنىڭ ايەلدەردى زورلىق زومبىلىقتان قورعاۋ توبىنىڭ سەنىم تەلەفونى - 71-60-63 ءنومىرى ارقىلى ءتيىستى كومەك كورسەتىلەدى.