ينۆەستيتسيالىق تابىس – 1,1 ترلن تەڭگە

قازاقستاندا زەينەتاقى اكتيۆتەرىن ۇلتتىق بانك سەنىمگەرلىك باسقارۋعا العانى بەلگىلى. سوندىقتان قارجىلىق رەتتەۋشى قورداعى سومانى ءتۇرلى قارجى قۇرالى رەتىندە ينۆەستيتسيالاي الادى. تاۋەكەلدەردى ازايتۋ ماقساتىندا قور قارجىسى ينۆەستيتسيالىق تابىس تابۋ ءۇشىن ءارتۇرلى ۆاليۋتامەن جۇمسالادى. قازىرگى ۋاقىتتا ينۆەستيتسيالاردىڭ ۇشتەن ەكىسى تەڭگەمەن, ۇشتەن ءبىرى شەتەل ۆاليۋتاسىمەن كورسەتىلگەن. ونىڭ ىشىندە كوپ بولىگى اقش دوللارىمەن نومينالدانعان.

بىرىڭعاي جيناقتاۋشى زەي­نەت­اقى قورىنىڭ حابارلاۋىنشا, سالىمشىلاردىڭ جيناعىنداعى سوما زەينەتاقى اكتيۆتەرىن ينۆەستيتسيالاۋ ناتيجەلەرىنە سايكەس كۇن سايىن قايتا ەسەپتەلىپ, قايتا باعالانادى ەكەن. ينۆەستيتسيالىق تابىستىڭ قۇرامىنا باعالى قاعازدار سىياقىسى, قارجى قۇرالدارىن نارىقتىق قايتا باعالاۋ, ۆاليۋتالىق قايتا باعالاۋ, سىرتقى باسقارۋداعى اكتيۆتەردىڭ كىرىستەرى جانە تاعى باسقالارى كىرەدى.

وسى جىلدىڭ ون ايىندا سالىمشى­لار­دىڭ شوتتارىنا 1,1 ترلن تەڭگە كولەمىندە تازا ينۆەستيتسيالىق كىرىس ەسەپتەلگەن. بۇل 2019 جىلدىڭ سايكەس كەزەڭىندەگى كورسەتكىشتەن ەكى ەسە ارتىق. ءبىر جىل بۇرىنعى تازا ينۆەستيتسيالىق كىرىس 551,1 ملرد تەڭگەنى قۇراعان بولاتىن. بۇل رەتتە وتكەن جىلدىڭ 1 قاراشاسىنان وسى جىلدىڭ 1 قاراشاسىنا دەيىنگى ارالىقتاعى كىرىس 10,88 پايىزعا تەڭ بولدى. وسى ارالىقتاعى ينفلياتسيا 7,1 پايىز بولعانىن ەسكە سالا كەتكەن ءجون. 2020 جىلدىڭ باسىنان بەرى كىرىستىلىك 9,94 پايىزدى كورسەتسە, ينفلياتسيا 5,5 پايىزدى قۇرادى.

بارلىق زەينەتاقى اكتيۆتەرى بجزق-عا بىرىكتىرىلگەن ساتتەن باستاپ ۇلتتىق بانك قامتاماسىز ەتكەن ينۆەستيتسيالىق تابىس شامامەن 4,6 ترلن تەڭگەگە جەتتى. ال زەينەتاقى جيناقتارىنىڭ جالپى كولەمىندەگى تازا ينۆەستيتسيالىق تابىستىڭ ۇلەسى – 34,5 پايىز.

قازاقستاننىڭ جيناقتاۋشى زەينەت­اقى جۇيەسى قۇرىلعان 1998 جىلدان بەرگى تازا ينۆەستيتسيالىق تابىس 5,4 ترلن تەڭگەدەن اسقان. وسى ۋاقىت ىشىندە ينۆەستيتسيالىق كىرىستىلىك 596,69 پايىزعا, ال ينفلياتسيا 485,55 پايىز­عا تەڭ بولدى. وسىلايشا 2020 جىلعى 1 قاراشاداعى جاعداي بويىنشا زەينەتاقى اكتيۆتەرىنىڭ جالپى ناقتى تابىستىلىعى 111,14 پايىزدى قۇرادى.