"ورتاق كۇش-جىگەرىمىزدىڭ جانە شقو تۇرعىندارىنىڭ جوعارى جاۋاپكەرشىلىگىنىڭ ارقاسىندا ءبىز COVID-19 ينفەكتسياسىنىڭ تارالۋ دەڭگەيىن تومەندەتە الدىق.
بۇگىندە ايماقتا كوروناۆيرۋستىڭ كوبەيۋ كوەففيتسيەنتى باسەڭدەدى. قاراشانىڭ باسىمەن سالىستىرعاندا رەپرودۋكتيۆتى R سانى 1,85-تەن 0,84-كە دەيىن, ال توسەك قورىنىڭ قامتىلۋ پايىزى 31,1-دەن 14,5-كە دەيىن تومەندەدى. ۆيرۋس جۇقتىرعاندار سانى 7 قاراشادا 353 ادام بولسا, كەشە 73 قۇرادى.
ەڭ باستىسى, وبلىسىمىزدا كوروناۆيرۋستى وقشاۋلاۋ ورتالىعى ارقىلى ۆيرۋستىڭ جۇقتىرۋ تىزبەگىن باقىلاۋ جانە توسقاۋىل قويۋ جۇيەسى قۇرىلدى. 1 قاراشادان باستاپ 584 مەدەپيد توپتار ينفەكتسيانىڭ 3,5 مىڭ وشاعىندا بايلانىستا بولعان 21 618 اداممەن جۇمىس جۇرگىزدى.
سونداي-اق, COVID-19 ۋاقتىلى انىقتاپ, ەمدەۋ ءۇشىن قولدانىستاعى 13 پتر-زەرتحاناسىنا جەرگىلىكتى بيۋدجەت ەسەبىنەن قوسىمشا 6 قوستىق. الداعى كۇندەرى تاعى بىرەۋى اشىلادى. پاندەميا باستالعاننان بەرى شقو-دا 355 مىڭ تەست وتكىزىلدى, ونىڭ ىشىندە تەك قاراشادا 101 095 مىڭ زەرتتەۋ جۇرگىزىلدى. بۇل ەل بويىنشا جوعارى كورسەتكىشتەردىڭ ءبىرى.
مونيتورينگتىك توپتار دا ءتيىمدى جۇمىس اتقاردى. 1 قاراشادان باستاپ 166 توپپەن 1906 رەيد جۇرگىزىلدى, 4426 نىسان تەكسەرىلدى, ونىڭ 1055-ىندە بۇزۋشىلىقتار انىقتالدى, 48 ملن.تەڭگەگە 735 ايىپپۇل سالىندى.
دارىگەرلەرىمىز تۇراقتى نەگىزدە COVID-19 ينفەكتسياسىن جۇقتىرعان ناۋقاستاردى ەمدەۋ سحەماسىن وزەكتەندىرۋ جۇمىسىن جۇرگىزۋدە. 12 قاراشادان باستاپ ناۋقاستاردىڭ كەلىسىمىمەن وبلىستىڭ اۋرۋحانالارىندا "فاۆيپيراۆير" پرەپاراتى قولدانىلۋدا. ناتيجەسى جاقسى, سىرقاتتان ساۋىققان ازاماتتار سانى ارتتى. سونىمەن قاتار, دونورلاردىڭ كومەگىمەن جينالعان 3200 يممۋندىق پلازما دا بەلسەندى تۇردە قولدانىلىپ جاتىر.
وسى جانە باسقا دا شارالاردىڭ ارقاسىندا ءبىز كوروناۆيرۋستىڭ «سارى ايماعىنا» كىردىك. بۇل قولدانىستاعى شەكتەۋلەرگە بىرقاتار جەڭىلدىكتەر ەنگىزۋگە مۇمكىندىك بەرەدى. الايدا ىندەتتەن ازىرگە ۆاكتسينا جوق, سوندىقتان كۆي-دەن ەڭ سەنىمدى قورعانىس – ساقتىق شارالارى مەن الەۋمەتتىك قاشىقتىق بولىپ قالا بەرمەك. ءبىزدىڭ قازىرگى باستى مىندەتىمىز - سىرقاتتىڭ وسۋىنە جول بەرمەۋ, ەمدەۋ مەكەمەلەرىنىڭ تيىمدىلىگىن ارتتىرۋ جانە حالىقتىڭ دەنساۋلىعىن ساقتاۋدى قامتاماسىز ەتۋ. ءوزىڭىز بەن جاقىنىڭىزعا قورعان بولىڭىز!", دەپ جازدى ايماق باسشىسى دانيال احمەتوۆ Facebook-پاراقشاسىندا.