تۇڭعىش پرەزيدەنت كۇنىنە وراي وتاندىق لوۋكوستەر Fly Arystan كومپانياسىنىڭ تۇركىستان مەن نۇر-سۇلتان قالالارى اراسىنداعى تۇراقتى رەيسى اشىلدى, دەپ حابارلايدى Egemen.kz
يندۋستريا جانە ينفراقۇرىلىمدىق دامۋ مينيسترلىگىنىڭ ازاماتتىق اۆياتسيا كوميتەتىنىڭ حابارلاۋىنشا, نۇر-سۇلتان-تۇركىستان رەيسىنە 168 بيلەت (93%), تۇركىستان - نۇر-سۇلتان رەيسىنە 161 بيلەت ساتىلعان.
ء"بىرىنشى كەزەڭدە تۇركىستان قالاسىنىڭ جاڭا حالىقارالىق اۋەجايىنان "Fly Arystan", "Qazaq Air" جانە "SCAT" اۋە كومپانيالارى نۇر-سۇلتان, الماتى قالالارىنا كۇندەلىكتى رەيستەر ورىندايدى جانە تۇركى الەمىنىڭ رۋحاني ورتالىعى رەتىندە تۇركىستان قازاقستاننىڭ باسقا وبلىس ورتالىقتارمەن بايلانىسادى. حالىقارالىق باعىتتاردىڭ ىشىندە ەڭ الدىمەن ىستانبۇل, دۋبايعا رەيستەر اشۋ جوسپارلانىپ وتىر. بولاشاقتا باسقا قالالارعا, ونىڭ ىشىندە ماسكەۋ, باكۋ, سامارقاند جانە باسقا قالالارعا رەيستەر اشىلاتىن بولادى", دەپ حابارلادى ازاماتتىق اۆياتسيا كوميتەتى.
سونىمەن بىرگە تۇركىستان اۋەجايى شەتەل اۋە كومپانيالارىنىڭ ۇشۋى ءۇشىن "اشىق اسپان" رەجىمىندە جۇمىس ىستەيدى. بۇل اۋەجايدىڭ ۇشۋ گەوگرافياسىن كەڭەيتۋگە جانە شەتەلدىك تۋريستەردى تارتۋعا ىقپال ەتەدى.