شىمكەنتتە 1 جەلتوقسان – تۇڭعىش پرەزيدەنت كۇنىنە وراي ۇيىمداستىرىلعان رەسپۋبليكالىق "كىتاپ FEST" فەستيۆالىنىڭ اشىلۋىنا قالا اكىمىنىڭ ءبىرىنشى ورىنباسارى شىڭعىس مۇقان, ىشكى ساياسات جانە جاستار ىستەرى جونىندەگى باسقارما باسشىسى جانار بەكتاەۆا, زيالى قاۋىم وكىلدەرى قاتىستى, دەپ حابارلايدى Egemen.kz.
– ەلباسى نۇرسۇلتان نازارباەۆ «قۇندىلىقتار جۇيەسىندە ءبىلىم – كىتاپ» دەگەن بولاتىن. پرەزيدەنت قاسىم-جومارت كەمەل ۇلى دا ۇلتتىق قوعامدىق سەنىم كەڭەسىندە سويلەگەن سوزىندە كىتاپحانالارعا, ولاردىڭ جاي-كۇيىنە, كىتاپتاردىڭ شىعارىلۋىنا كوڭىل ءبولىپ, باسىمدىق بەرگەن ەدى. بۇگىنگى كۇنى زامان تالابىنا قاراي كىتاپتار ەلەكتروندى نۇسقاعا كوشتى. شىندىعىندا كىتاپ وقۋ كورسەتكىشى بۇرىنعىدان تومەندەدى. بۇرىن ۇيلەردە سورە تولى توم-توم كىتاپ جينالىپ تۇراتىن. قازىر قازىنامىز كوپ ۇيدەن كورىنبەيدى. ءبىر اپتا بۇرىن قالا تۇرعىندارىنىڭ اراسىندا كىتاپ وقۋ تۇرعىسىندا ساۋالناما جۇرگىزىلدى. ناتيجەسىندە «قاشان كىتاپ وقىدىڭ؟» دەگەن سۇراققا ساۋالناماعا قاتىسۋشىلاردىڭ 43 پايىزى «ەسىمدە جوق» دەپ جاۋاپ بەرگەن, – دەي كەلە شىڭعىس مۇقان وقىرمانعا ارتىق ءبىلىم كىتاپتا ەكەنىن جەتكىزدى.
سونداي-اق فەستيۆالدىڭ اشىلۋ سالتاناتىندا شىمكەنتتىك «جەبە» باسپا ءۇيىنىڭ ەلباسى ن. نازارباەۆقا ارنالعان «كەمەڭگەر. دانا. كوشباسى» كىتابىنىڭ تانىستىرىلىمى ءوتتى. ەلباسىنىڭ سىنىپتاسى روزا تىلەمىسوۆا, ارداگەر جۋرناليست بايدۋللا قونىسبەك تۇڭعىش پرەزيدەنت كۇنىنىڭ ماڭىزدىلىعىنا توقتالىپ, وي-پىكىرلەرىن ورتاعا سالدى. بۇدان بولەك, ءىس-شارادا نۇر-سۇلتان, الماتى, قاراعاندى جانە شىمكەنت قالالارىنان باسپا ۇيلەرى, كىتاپ دۇكەندەرى, قالالىق كىتاپحانالار وقىرماندارعا جاڭا كىتاپتارىن ۇسىندى.
ايتا كەتەيىك, قالا تۇرعىندارى مەن قوناقتارى كورمە ورتالىعىندا 30 قاراشا مەن 5 جەلتوقسان ارالىعىندا كىتاپ الەمىنە ساياحات جاساي الادى.