اتىراۋدا تۇڭعىش پرەزيدەنت كۇنىنە ارنالعان كونفەرەنتسيا ءوتتى

كونفەرەنتسياعا مەملەكەتتىك قىزمەت ىستەرى اگەنتتىگى ءتورايىمى انار جايىلعانوۆا, پارلامەنت سەناتى جانىنداعى سەناتورلار كەڭەسى توراعاسىنىڭ ورىنباسارى بىرعانىم ءايتىموۆا, پرەزيدەنت جانىنداعى مەملەكەتتىك باسقارۋ اكادەمياسىنىڭ رەكتورى ەرلان ءابىلوۆ, مەملەكەتتىك ورگان باسشىلارى, قوعام بەلسەندىلەرى, وقۋ ورىندارىنىڭ وكىلدەرى مەن اگەنتتىكتىڭ اۋماقتىق دەپارتامەنتتەرىنىڭ جەتەكشىلەرى قاتىستى.

العاش ءسوز العان وبلىس اكىمى ماحامبەت دوسمۇحامبەتوۆ اتالعان كونفەرەنتسيانىڭ تۇڭعىش پرەزيدەنت كۇنى قارساڭىندا ۇيىمداستىرىلۋىنىڭ ماڭىزىنا توقتالدى.

"قازىرگى زامانعا ساي مىقتى مەملەكەتتىك اپپارات قۇرۋ ءىسى تۇڭعىش پرەزيدەنت-ەلباسى  نۇرسۇلتان نازارباەۆتىڭ ەسىمىمەن بايلانىستى ەكەنى داۋسىز. تاۋەلسىزدىكتىڭ ەلەڭ-الاڭ شاعىندا الدىمىزدا سىن-تەگەۋرىندەر تۇردى. وسىعان وراي ەلباسى جاڭا جاعدايلارعا توتەپ بەرەتىن مەملەكەتتىك باسقارۋ جۇيەسىن قالىپتاستىرۋدى كوزدەدى. قازاقستاننىڭ باسەكەگە قابىلەتتىلىگىن ارتتىرۋدا مەملەكەتتىك اپپاراتتىڭ كادرلىق الەۋەتى ماڭىزدى ءرول اتقاراتىنىن جاقسى ءتۇسىندى. مەملەكەتتىك اپپاراتتىڭ ساپاسى كەز كەلگەن ەلدىڭ دامۋ پروتسەسىندە شەشۋشى فاكتورعا يە. سوندىقتان بۇل ەلدىڭ ستراتەگيالىق باسىمدىقتارىنىڭ ءتيىمدى ورىندالۋىن قامتاماسىز ەتۋى تۇرعىسىنان ەرەكشە ماڭىزدى بولدى. ۇلت كوشباسشىسىنىڭ ساياسي ەرىك-جىگەرىنىڭ ناتيجەسىندە قازاقستان پوستكەڭەستىك ەلدەر اراسىندا وسى باعىتتا العاش بولىپ جۇيەلى قادامدار جاسادى", دەدى وبلىس اكىمى ماحامبەت دوسمۇحامبەتوۆ.

اكىم وڭىردەگى مەملەكەتتىك قىزمەتشىلەردى الەۋمەتتىك-ەكونوميكالىق تۇرعىدان قولداۋ باعىتىندا اتقارىلىپ جاتقان جۇمىستاردى اتاپ ءوتتى.

"جىل باسىندا جەرگىلىكتى اتقارۋشى ورگاندار فاكتورلى-بالدىق شكالاعا نەگىزدەلگەن ەڭبەكاقى تولەۋدىڭ جاڭا جۇيەسىنە كوشتى. پيلوتتىق مودەلدىڭ ەنگىزىلۋى جەرگىلىكتى دەڭگەيدە كادرلاردىڭ اۋىسۋىنىڭ ازايۋىنا سەپتىگىن تيگىزدى. ماسەلەن, مەملەكەتتىك قىزمەتشىلەردىڭ اۋىسۋى بىلتىرعى سايكەس كەزەڭمەن سالىستىرعاندا 4,6%-دان 2,6%-عا دەيىن ازايعان. بۇل مەملەكەتتىك اپپارات تۇراقتىلىعىن قامتاماسىز ەتۋگە مۇمكىندىك بەردى. سونىمەن قاتار, جالاقى مولشەرىنىڭ ءوسۋى مەملەكەتتىك قىزمەتكە دەگەن قىزىعۋشىلىقتى ارتتىردى", - دەدى وبلىس اكىمى.

ماحامبەت دوسمۇحامبەتوۆتىڭ ايتۋىنشا, بوس لاۋازىمدارعا جاريالانعان كونكۋرستاردا ءبىر ورىنعا قاتىسۋشىلاردىڭ سانى 50%-عا وسكەن. سونىڭ ناتيجەسىندە مەملەكەتتىك اپپارات بىلىكتى كادرلارمەن تولىعۋدا. قازىر وبلىس اكىمدىگىندەگى مەملەكەتتىك قىزمەتكەرلەردىڭ ساپالىق قۇرامى دا ارتتى. مەملەكەتتىك قىزمەتكەرلەر قاتارى 1 عىلىىم دوكتورى, 2 عىلىم  كانديداتى, 3 PhD دوكتورى جانە "بولاشاق" باعدارلاماسىنىڭ 3 تۇلەگىمەن تولىقتى. ال بوس لاۋازىمداردىڭ سانى وتكەن جىلدىڭ وسى كەزەڭىمەن سالىستىرعاندا 4,1%-عا دەيىن ازايىپ وتىر.

تۇڭعىش پرەزيدەنت كۇنىنە ورايلاستىرىلعان كونفەرەنتسيادا ءتورت وزەكتى ماسەلە تالقىعا ءتۇستى. قاتىسۋشىلار جاڭا مىڭجىلدىقتاعى مەملەكەتتىك اپپاراتتىڭ ىلگەرى دامۋى, اۋىلدىق وكرۋگ اكىمدەرىنىڭ مارتەبەسى سىندى ماسەلەلەر اياسىندا وي ءبولىسىپ, پىكىر الماستى.

ەندى اتالعان كونفەرەنتسيانى تۇڭعىش پرەزيدەنت كۇنى قارساڭىندا جىل سايىن وتكىزۋ كوزدەلىپ وتىر.