اتىراۋدا بۇدان بەس بۇرىن اقىن جۇمەكەن ناجىمەدەنوۆتىڭ ەڭسەلى ەسكەرتكىشى بوي كوتەرگەن ەدى. كەيىن №2 مەكتەپكە ەسىمى بەرىلدى. ەندى مىنە, سول مەكتەپتىڭ الدىندا قالامگەردىڭ ەسكەرتكىش-ءمۇسىنى اشىلدى, دەپ حابارلايدى Egemen.kz.
كەشە – قازاقتىڭ كورنەكتى اقىنى, ءانۇران اۆتورلارىنىڭ ءبىرى, قر مەملەكەتتىك سىيلىعىنىڭ يەگەرى جۇمەكەن ناجىمەدەنوۆتىڭ تۋعان كۇنى. قازاق پوەزياسىندا جارقىراي كورىنگەن قالامگەردىڭ ومىرگە كەلگەنىنە 85 جىل تولدى. ارتىنا مول شىعارماشىلىق مۇرا قالدىرعان اقىننىڭ ەسىمى جاڭعىرىپ كەلەدى.
«كەڭەستىك وكىمەت 1956 جىلى قازاق جەرىنىڭ سولتۇستىك ايماعىنداعى اقمولا, پەتروپاۆل, پاۆلودار, قوستاناي, قاراعاندى وبلىستارىن قازاق رەسپۋبليكاسى قۇرامىنان بولۋگە ارەكەتتەندى. سول كەزدە ءشامشى قالداياقوۆ پەن جۇمەكەن ناجىمەدەنوۆ قازاق جاستارىنىڭ «تۋعان جەردى تالاۋعا بەرمەيمىز» دەگەن ءور رۋحىن ءسوز بەن سازعا سىيعىزا بىلگەن ەدى» دەيدى وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى اقىلبەك رىسقاليەۆ.
اقىنعا ارنالعان ەسكەرتكىش-ءمۇسىننىڭ اشىلۋىنا قوعام قايراتكەرلەرى عاريفوللا ەسىم, سارسەنباي ەڭسەگەنوۆ, اقىن, قر مەملەكەتتىك سىيلىعىنىڭ يەگەرى اقۇشتاپ باقتىگەرەەۆا, قالامگەردىڭ شىعارمالارىن زەرتتەپ جۇرگەن زاڭگەر مارات ازبانباەۆ, قىزى ايكەن جۇمەكەنقىزى, ءوڭىردىڭ زيالى قاۋىم وكىلدەرى قاتىستى. اقىن اتى بەرىلگەن مەكتەپتىڭ الدىنا ەسكەرتكىش-ءمۇسىندى ورناتۋ قوعام قايراتكەرى سارسەنباي ەڭسەگەنوۆ ۇسىنىسىمەن قولعا الىنىپتى. تۋىندىنى جەرگىلىكتى ءمۇسىنشى سەرىك ماتەنيازوۆ جاسادى.
«جۇمەكەن ناجىمەدەنوۆتىڭ بەينەسىن سومداۋ وڭاي بولعان جوق. قيىندىقتار كەزدەستى. سەبەبى, اقىننىڭ سۋرەتى كوپ بولعانىمەن, بەت ءپىشىنىن ناقتى كورسەتەتىن ساپالى فوتولارى بىرازعا دەيىن تابىلمادى. كينوپلەنكاعا جازىلعان سيۋجەتتەر بار ەكەن. الايدا ونى كورۋ مۇمكىن بولمادى. اقىننىڭ ۇلكەن قىزى ايكەنمەن حابارلاسىپ, ساپالى فوتولارىن تاپتىق. قالامگەردىڭ ىنىلەرى دە وبرازىن سومداۋدا كوپ كومەگىن بەردى» دەيدى ءمۇسىنشى سەرىك ماتەنيازوۆ.
بىلتىر جۇمەكەن ناجىمەدەنوۆ اتىنداعى مەكتەپتە پەداگوگ-ۇيىمداستىرۋشىسى ۆەرا ميدەنوۆانىڭ ايتۋىنشا, اقىنعا ارنالعان مۇراجاي اشىلدى. وندا اقىننىڭ تۇتىنعان بۇيىمدارى, قولجازبالارى مەن 7 تومدىق شىعارمالار جيناعى قويىلىپتى.
سونداي-اق, كورنەكتى اقىننىڭ تۋعانىنا 85 جىل تولۋىنا ارنالعان شارا ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىندە «ج. ناجىمەدەنوۆ جانە قازاق پوەزياسىنىڭ كوركەمدىك دامۋ باعىتتارى» اتتى حالىقارالىق عىلىمي-تەوريالىق ونلاين كونفەرەنتسيامەن جالعاستى. كونفەرەنتسيانىڭ پلەنارلىق ماجىلىسىندە اتىراۋ وبلىسىنىڭ اكىمى ماحامبەت دوسمۇحامبەتوۆتىڭ قۇتتىقتاۋى وقىلدى. ونلاين كونفەرەنتسيادا «جۇلدىزدى جۇمەكەن» كىتابىنىڭ اۆتورى عاريفوللا ەسىم, مەملەكەتتىك سىيلىق يەگەرى اقۇشتاپ باقتىگەرەەۆا, قازاقستان مەن قىرعىزستاننىڭ ەڭبەك سىڭىرگەن قايراتكەرى يليا جاقانوۆ, جازۋشى مەرەكە قۇلكەنوۆ, اقىن ەسەنعالي راۋشانوۆ, فيلولوگيا عىلىمدارىنىڭ دوكتورى, پروفەسسور قادىر ءجۇسىپ پەن قىتاي, تۇركيا, ازەربايجان ەلدەرىنەن بەلگىلى پروفەسسورلار بايانداما جاساپ, قازاق قالامگەرىنىڭ شىعارماشىلىق, ادامي بولمىسىن ءار قىرىنان اڭگىمەلەپ بەردى.