الماتىداعى "سۋلپاك" ساۋدا ءۇيىنىن الدىندا جايقالىپ ءوسىپ تۇرعان اعاشتاردى كەسىلۋى تۇرعىنداردىڭ ۇلكەن نارازىلىعىن تۋدىرىپ وتىرعانى ايان, دەپ حابارلايدى Egemen.kz
بۇگىنگى ونلاين-بريفينگتە الماتى قالاسى اكىمدىگى مەن قالانىڭ قۇقىق قورعاۋ ورگاندارىنىڭ وكىلدەرى تولە بي كوشەسىندەگى اعاشتاردى زاڭسىز كەسۋ فاكتىسى بويىنشا سوتقا دەيىنگى تەرگەۋدىڭ بارىسى جانە قابىلدانعان شارالار تۋرالى باياندادى.
23 قاراشاعا قاراعان ءتۇنى تولە بي كوشەسىنىڭ بويىندا, "سۋلپاك" ساۋدا ءۇيىنىڭ ماڭىندا توعىز ەمەن, ەكى قاراعاش جانە ەكى اكاتسيا كەسىلگەن. اكىمدىككە كاسىپكەرلەر تاراپىنان اعاش كەسۋگە ءوتىنىش تۇسپەگەن.
الماتى قالاسى جاسىل ەكونوميكا باسقارماسىنىڭ باسشىسى ناتاليا ليۆينسكايانىڭ حابارلاۋىنشا, بوتانيكالىق باق ماماندارىنىڭ مالىمەتىنە سايكەس 9 كادىمگى ەمەن, الاسا قاراعاش, قاراعاش جانە 2 پسەۆدواكاتسيا روبينياسى (اق اكاتسيا) كەسىلگەن.
"ساراپشىلاردىڭ قورىتىندىسى بويىنشا, كادىمگە ەمەندەر سيرەك كەزدەسەتىن تۇرلەرگە جاتادى جانە قازاقستاننىڭ قىزىل كىتابىنا جويىلىپ بارا جاتقان تۇرلەردىڭ «ەكىنشى ساناتىنا» ەنگىزىلگەن. وسىعان بايلانىستى اكىمدىك پروكۋراتۋراعا قازاقستان رەسپۋبليكاسىنىڭ قىلمىستىق كودەكسىنىڭ 339-بابى بويىنشا قىلمىستىق ءىستى قايتا كۆاليفيكاتسيالاۋ تۋرالى ءوتىنىش جىبەردى", دەپ اتاپ ءوتتى ن. ليۆينسكايا.
وسىعان بايلانىستى الماتى پوليتسياسى دەپارتامەنتى باسشىسىنىڭ ورىنباسارى رۋستام ابدراحمانوۆ بۇل ءىس بويىنشا قىلمىستىق قۇقىق بۇزۋشىلىق قۇرامىنىڭ قازاقستان رەسپۋبليكاسىنىڭ قىلمىستىق كودەكسىنىڭ 2 ءبولىمىنىڭ «سيرەك كەزدەسەتىن جانە قۇرىپ كەتۋ قاۋپى تونگەن, سونداي-اق وسىمدىكتەر مەن جانۋارلاردىڭ تۇرلەرىن, ولاردىڭ بولىكتەرىن نەمەسە تۋىندىلارىن پايدالانۋعا تىيىم سالىنعان زاڭسىز اينالىم» 339-بابىنا وزگەرتىلگەنىن اتاپ ءوتتى.
"بۇگىنگى كۇنى بۇل ىسكە قاتىسى بار بارلىق ادامدار انىقتالىپ جاتىر. نەگىزگى كىنالى تۇلعا انىقتالدى, بۇل جك ديرەكتورى, الماتى قالاسىنىڭ تۇرعىنى, ول كۇدىكتى دەپ تانىلدى. ونىڭ ارەكەتتەرى قر قك 339-بابىنا سايكەس كەلەدى. ىسكە بىرقاتار ساراپتامالىق زەرتتەۋلەر تاعايىندالدى. قىلمىستىق ءىس بويىنشا تەرگەۋ ءجۇرىپ جاتىر. بۇل ادامنىڭ جاۋاپكەرشىلىگىنەن باسقا, ءبىز سونىمەن قاتار "سۋلپاك" كومپانياسىنىڭ جاۋاپكەرشىلىگىن قاراستىرامىز, ويتكەنى كورشىلەس اۋماقتى اباتتاندىرۋ بويىنشا كەلىسىم-شارت وسى كومپانيامەن جاسالعان", دەدى ر. ءابدىراحمانوۆ.
ءوز كەزەگىندە الماتى قالاسى پروكۋرورىنىڭ ءبىرىنشى ورىنباسارى بەرىك اداموۆ زاڭسىز اعاش كەسىلگەن جەردى كۇزەتىپ جۇرگەن پوليتسيا قىزمەتكەرلەرىنىڭ ارەكەتتەرىنىڭ زاڭعا سايكەستىگى تەكسەرىلەتىنىن اتاپ ءوتتى.
ء"بىز قالا تۇرعىندارىنىڭ الەۋمەتتىك جەلىلەردەگى شاعىمىن زەردەلەپ, تەكسەرىس جۇرگىزۋدەمىز, ونى المالى اۋدانىنىڭ پروكۋراتۋراسى جۇرگىزىپ جاتىر. پوليتسيانىڭ ءىس-ارەكەتىنە زاڭدى باعا بەرىلەدى. تەكسەرۋ ناتيجەلەرى بويىنشا پوليتسيا بولىمىنە بۇيرىق جىبەرىلەدى", دەدى ب. اداموۆ.
ن. ليۆينسكايانىڭ ايتۋىنشا, كەسىلگەن اعاشتاردىڭ ورنىنا وتەمدىك وتىرعىزۋ جۇرگىزىلەتىن بولادى. جاسىل ەكونوميكا باسقارماسى كوشەتتەردىڭ ورنالاسۋىن, اۋقىمى مەن كوشەتتەرگە قويىلاتىن تالاپتاردىڭ ساقتالۋىن قامتاماسىز ەتەدى.
قالالىق جاسىل ەكونوميكا باسقارماسىنىڭ باسشىسى مەگاپوليس اكىمدىگى قالا تۇرعىندارىنىڭ ادىلەتتى نارازىلىعىنا ورتاق ەكەنىن, بۇل ءىس الماتى قالاسىنىڭ اكىمى ب. ساعىنتاەۆتىڭ باقىلاۋىندا ەكەنىن باسا ايتتى.
ء"بىز الماتىلىقتاردى بىزگە جانە ەكولوگيالىق قۇرىلىمدارعا الماتىنىڭ جاسىل قورىن باقىلاۋعا كومەكتەسۋگە شاقىرامىز", دەپ اتاپ ءوتىپ, كاسىپكەرلەردى وسىنداي زاڭ بۇزۋشىلىقتاردىڭ الدىن الۋعا شاقىردى.
كەلتىرىلگەن شىعىننىڭ مولشەرىن انىقتاعاننان كەيىن, الماتىنىڭ جاسىل ەكونوميكا باسقارماسى كەسىلگەن اعاشتاردىڭ ورنىنا وتەمە وتىرعىزۋدى تالاپ ەتەدى. جاڭا ۇلگىدەگى ەرەجەلەر بويىنشا سەرىكتەستىك 260 اعاش وتىرعىزىپ, ولاردى ەكى جىل بويى كۇتىپ-باپتاۋى كەرەك.
سونىمەن بىرگە, ن. ليۆينسكايا وسى جىلدىڭ 1 جەلتوقسانىنان باستاپ باسقارما سايتتا جاسىل جەلەكتەردى كەسۋمەن اينالىساتىن كومپانيالاردىڭ رەيتينگىن جاريالاۋدى باستايتىنىن مالىمدەدى. سونداي-اق, جىل سوڭىنا دەيىن جاسىل كوميسسيانىڭ رەفورماسى اياقتالادى, ونىڭ قۇرامىنا قالالىق قوعامدىق كەڭەس مۇشەلەرى, بەلسەندىلەر مەن باق وكىلدەرى كىرەدى. سونىمەن قاتار, ساراپشىلارمەن بىرگە اعاشتاردى باعالاۋ ادىستەمەسى جاسالۋدا.
ن. ليۆينسكايانىڭ ايتۋىنشا, ەرتەڭ, 26 قاراشا كۇنى اكىمدىك قوعام بەلسەندىلەرىمەن جانە قامقور ازاماتتارمەن بىرگە تولە بي كوشەسىنىڭ بويىنا, سونىڭ ىشىندە "سۋلپاك" ءسۇ-ءنىڭ جانىنداعى ۋچاسكەگە, بيىكتىگى كەمىندە 4 م بولاتىن 30-عا جۋىق كوپجىلدىق ەمەن وتىرعىزادى. بۇل اعاش وتىرعىزۋ وتەمدىك جۇمىس كولەمىنە كىرمەيدى.