قۇرمانعازى اۋدانىنىڭ پوليتسيا قىزمەتكەرلەرى رەسەيلىك تۇرعىننىڭ ەكى ەلدىڭ ازاماتتىعىمەن جۇرگەنىن انىقتادى, دەپ حابارلايدى Egemen.kz.
"بۇرىنعى اتىراۋلىق 1999 جىلى وتباسىلىق جاعدايىنا بايلانىستى رەسەي فەدەراتسياسىنا كوشىپ كەتكەن. ول 2000 جىلى سول ەلدىڭ ازاماتتىعىن قابىلداعان. بىراق بۇل تۋرالى ءتيىستى ورىندارعا حابارلاماعان", دەپ ءمالىم ەتتى وبلىستىق پوليتسيا دەپارتامەنتىنىڭ ءباسپاسوز قىزمەتىنەن.
قازاقستان رەسپۋبليكاسى مەن رەسەي فەدەراتسياسىنىڭ تولقۇجاتتارىمەن جۇرگەن بۇل ازاماتقا قاتىستى قۇرمانعازى اۋدانى پوليتسيا قىزمەتكەرلەرىمەن قر اكىمشىلىك قۇقىقبۇزۋشىلىق تۋرالى كودەكسىنىڭ 496-بابىنىڭ 2-بولىگىمەن (شەتەل ازاماتتىعىن الۋ فاكتىسىن حابارلاماۋ) اكىمشىلىك حاتتاما تولتىرىلدى. جيناقتالعان قۇجاتتار قۇرمانعازى اۋداندىق سوتىنا جولدانىپ, 200 ايلىق ەسەپتىك كورسەتكىش مولشەرىندە ايىپپۇل سالىندى.