4-5 جەلتوقسان كۇندەرى "استانا بالەت" تەاترىندا "سۇلتان بەيبارىس" قويىلىمىنىڭ پرەمەراسى وتەدى, دەپ حابارلايدى Egemen.kz.
قويىلىمدا مىسىر مەن سيريانىڭ ماملۇك سۇلتانى بولعان بەيبارىستىڭ تاعدىرى كورسەتىلەدى. تاعدىردىڭ قالاۋىمەن بالا تۋعان ۇيىنەن جىراقتاپ, جالدامالى جاۋىنگەر-ماملۇك بولۋ ءۇشىن قۇل بازارىندا ساتىلعان. اسكەري ىستە تابىسقا جەتكەن بەيبارىس ۋاقىت وتە كەلە اسكەردى عانا ەمەس, بۇكىل ەلدى باسقارعان. وسىلايشا تاريحتاعى جاڭا بەلەستى باستاعان.
بالەتتى قويۋعا قازاقستاننىڭ تالانتتى ونەر قايراتكەرلەرى اتسالىستى. مىسالى, ليبرەتتونى اقىن, قازاقستاننىڭ ەڭبەك سىڭىرگەن قايراتكەرى باقىت قايىربەكوۆ جازسا, حاميت شانعاليەۆ پەن الىبەك الپيەۆ مۋزىكامەن ارلەدى. قويۋشى-حورەوگراف مۋكارام اۆاحري - قر ەڭبەك سىڭىرگەن قايراتكەرى, "استانا بالەت" تەاترىنىڭ باس بالەتمەيستەرى. قويۋشى-حورەوگرافتىڭ كومەكشىسى - ايجان ءجۇنىسوۆا. سونداي-اق قويىلىمعا حالىقارالىق جوبالارىمەن تانىمال, شەتەلدىك بىلىكتى ماماندار ستسەنوگراف جانە قويۋشى-سۋرەتشى لەونيد باسين پەن كوستيۋمدەر ارلەۋشىسى اسيا سولوۆەۆا ات سالىستى.
"بالەت پەن ۇلتتىق ءبيدى دامىتۋ جانە قولداۋ" قورىنىڭ تاريحي بالەت قويۋ تۋرالى يدەياسى "سامۇرىق-قازىنا" اق قولداۋىمەن جۇزەگە اسىرىلۋدا.
قويۋشى-حورەوگراف مۋكارام ءاۆاحريدىڭ ايتۋىنشا, بىزگە تانىس سيۋجەتتى جاڭا فورمادا قويا وتىرىپ, تاڭسىق ويلارعا جەتەلەيدى.
"سۇلتان بەيبارىس" بالەتىنىڭ دايىنداعى ءبىر جىل بۇرىن باستالعان ەدى, بىراق كوروناۆيرۋس پاندەمياسىنا بايلانىستى پرەمەرانى بىرنەشە رەت كەيىنگە قالدىرۋعا تۋرا كەلدى. جوبا اۆتورلارى بالەت كورەرمەنگە جول تارتقانعا دەيىن ءتۇرلى قىزىقتاردى ايتىپ, قازاق ونەر الەمىنە جاڭا فورماتتاعى دۇنيە بولاتىنىن ايتادى.
پرەمەرا 4-5 جەلتوقسان كۇندەرى "استانا بالەت" تەاترىندا بارلىق سانيتارلىق نورمالاردى ساقتاي وتىرىپ وتەدى. ادام سانى شەكتەۋلى جانە ماسكا تاعۋ مىندەتتى.
بالەتتىڭ پرەمەراسى قارساڭىندا بولاشاقتا ەلدىڭ بارلىق تەاتر ورىندارىن بىرىكتىرۋگە جانە ونىڭ قوعامداعى ءرولىن كەڭىنەن ناسيحاتتاۋعا ارنالعان vteatre.kz جاڭا پيلوتتىق پلاتفورماسىنىڭ ىسكە قوسىلۋى تۋرالى دا ايتىلۋدا.