قۇرلىقتىق حوككەي ليگاسىندا (قحل) باق سىنايتىن ەلوردانىڭ «بارىس» كلۋبى ءوز ايدىنىنداعى ماتچتار سەرياسىن ءساتسىز باستادى. «بارىس ارەنادا» مينسكىنىڭ «ديناموسىن» قابىلداعان قازاقستاندىق كوماندا 1:4 ەسەبىمەن جەڭىلىپ قالدى.
«بارىستىڭ» نەگىزگى قۇرامىن ءالى انىقتاي الماي جاتقان باس باپكەر يۋري ميحايليس كەيىنگى ەكى ويىندا سۆەدبەرگ, بلەيكەر, ۆيدەلل, ۆارون جانە فرەتتين بەستىگىن ءبىرىنشى مينۋتتان باستاپ مۇزايدىنعا شىعارىپ ءجۇر. بۇل بەستىك «نەفتەحيميكپەن» وتكەن ويىندا ءوز جەمىسىن بەرگەنىمەن, ەلورداداعى كەزدەسۋدە جەڭىستى جولدى جالعاستىرا المادى. ءبىرىنشى كەزەڭنىڭ 11-مينۋتىندا ەسەپ اشقان برەندون كوزۋن ارادا ءۇش مينۋت وتكەندە دۋبل اۆتورى اتانىپ, كومانداسىنىڭ ەكىنشى شايباسىن سوقتى. ال ەكىنشى كەزەڭنىڭ 32-مينۋتىندا ەگور شارانگوۆيچ كومانداسىنىڭ ەسەپتەگى ۇستەمدىگىن 3:0-گە جەتكىزدى.
ءۇشىنشى 20 مينۋتتا مۇزايدىن يەلەرىنەن ياكوب ليليا مەرگەندىگىمەن كوزگە ءتۇسىپ, ەسەپ ايىرماسىن قىسقارتۋعا مۇمكىندىك الدى. شۆەتسيالىق شابۋىلشى وسىمەن ەكىنشى ويىندا گول سوقتى. كەزدەسۋدىڭ اياقتالۋىنا ەكى مينۋت قالعاندا كيريلل ۆورونين ويىننىڭ نۇكتەسىن قويىپ, كومانداسىنا ماڭىزدى جەڭىس سىيلادى. جەرلەستەرىمىز كەلەسى كەزدەسۋىن بۇگىن ماگنيتوگورسكىنىڭ «مەتاللۋرگ» كومانداسىمەن وتكىزەدى.