فۋتزالدان ەۋرو-2022 دوداسىنىڭ ىرىكتەۋ كەزەڭىندەگى قازاقستان قۇراماسىنىڭ سوڭعى قارسىلاسى انىقتالدى. ەكى ويىن قورىتىندىسى بويىنشا كيپردەن باسىم تۇسكەن يزرايل ويىنشىلارى قازاقستانمەن ءبىر توپتا ونەر كورسەتەتىن بولدى.
فۋتزالدان قازاقستان قۇراماسى بۇعان دەيىن ماجارستان جانە بەلارۋسپەن بىرگە 5-توپتا وينايتىنى بەلگىلى بولعان ەدى. ايتا كەتەيىك, 2020 جىلعى الەم چەمپيوناتىنا ىرىكتەۋ كەزەڭىندە ءساتتى ونەر كورسەتۋىنىڭ ارقاسىندا قازاقستان قۇراماسى اۆتوماتتى تۇردە ەۋرو-2022 ىرىكتەۋىنىڭ ءۇشىنشى توپتىق كەزەڭىنە جولداما العان بولاتىن. ەۋرو-2022 ىرىكتەۋ كەزەڭىنىڭ توپتىق ويىندارى 6 جەلتوقساندا باستالىپ, 2021 جىلدىڭ 14 ساۋىرىندە اياقتالادى. ىرىكتەۋ ماتچتارى بيىل ءبىرىنشى رەت ء«ۇي – قوناق» جۇيەسىندە وتەدى.
32 كوماندا 8 توپقا ءبولىنىپ, 15 جولداما ءۇشىن باق سىنايدى. توپتا ءبىرىنشى ورىن العان سەگىز قۇراما جانە ەكىنشى ورىنداعى ەڭ ۇزدىك التى كوماندا ەۋروپا چەمپيوناتىنا تىكەلەي جولداما الادى. سونداي-اق سوڭعى جولدامانى توپتا وزگەلەرگە قاراعاندا ناشار ويناپ, بىراق ەكىنشى ورىن العان ەكى كوماندا ءوزارا ساراپقا سالادى. ەۋروپا چەمپيوناتى 2022 جىلدىڭ 19 قاڭتارى مەن 6 اقپانى ارالىعىندا نيدەرلاندتا وتەدى.